មីយ៉ាន់ម៉ា ៖ ជនជាតិមីយ៉ានម៉ា២នាក់ដែលជាភ្នាក់ងារ កាសែតរ៉យទ័រ ដែលបានជាប់ពន្ធនាគារ ក្រោមការចោទពីរដ្ឋាភិបាលថារំលោភបំពានច្បាប់ចែងពី ការការពារព័ត៌មានសម្ងាត់ជាតិ មីយ៉ាន់ម៉ា កាលពីខែសីហា ឆ្នាំ២០១៨នោះ នៅព្រឹកថ្ងៃទី៧ ខែឧសភា ឆ្នាំ២០១៩ ត្រូវបានដោះលែងឲ្យមានសេរីភាពវិញហើយជាមួយអ្នកទោសជាង៦ពាន់នាក់ផ្សេងទៀត។
សាក្សី និងប្រធានពន្ធនាគារមីយ៉ាន់ម៉ា បញ្ជាក់ប្រាប់ប្រភពព័ត៌មានផ្សាយកាលពីថ្ងៃអង្គារ ទី៧ ខែឧសភាថា អ្នកកាសែតឈ្មោះវ៉ាឡន(Wa Lone) និងខ្យាវស៊ូអូ( Kyaw Soe Oo )ត្រូវបានដោះលែងឲ្យមានសេរីភាព ក្រោយទទួលបានការលើកលែងទោសពីប្រធានាធិបតីមីយ៉ានម៉ាលោកវីនម្យីង( Win Myint) ជាមួយគ្នានិងអ្នកទោសសរុប ៦ ៥២០នាក់ផ្សេងទៀត ។
កាលពីថ្ងៃទី២៣ ខែមេសា ឆ្នាំ២០១៩ តុលាការកំពូលមីយ៉ាន់ម៉ាបានជំទាស់ទៅនឹងបណ្តឹងឧទ្ធរណ៍ចុងក្រោយ របស់អ្នកកាសែត២រូបនេះប្រឆាំងទៅនឹងការជាប់ពន្ធនាគាររយៈពេល៧ឆ្នាំរបស់ពួកគេ ។
ការចោទប្រកាន់នោះ ដោយសារតែអ្នកកាសែត២រូបនេះ បានផ្សាយអត្ថបទអំពីកងកម្លាំងសន្តិសុខដែលរំលោភបំពានទៅលើជនមូស្លីមរ៉ូហ៊ីងយ៉ា ។ ការលើកលែងទោសអ្នកាសែត២រូបនេះត្រូវបានគេមើលឃើញថាគឺដើម្បីសម្រាលការចាប់អារម្មណ៍ពីលោកខាងលិចលើប្រទេសមីយ៉ាន់ម៉ារឿងរំលោភសិទ្ធមនុស្ស.
លោកវ៉ាឡន(Wa Lone) និងខ្យាវស៊ូអូ( Kyaw Soe Oo ) ត្រូវបានឃាត់ខ្លួនក្នុងខែធ្នូ ឆ្នាំ ២០១៧ ក្នុងពេលដែលអ្នកទាំងពីរកំពុងស៊ើបអង្កេតរឿងការសម្លាប់រង្គាលលើជនជាតិរ៉ូហ៊ីងយ៉ាក្នុងស្រុកមួយស្ថិតប៉ែកខាងជើងរដ្ឋរ៉ាក់ឃីន។ បន្ទាប់មកក្នុងថ្ងៃទី៧ កញ្ញា ឆ្នាំ ២០១៨ តុលាការបានកាត់ទោសពួកគេឲ្យជាប់ក្នុងពន្ធនាគារចំនួន ៧ឆ្នាំពីបទកាន់កាប់ឯកសារសម្ងាត់ដែលអាចបង្កផលប៉ះពាល់ដល់សន្តិសុខជាតិ។
រឿងរ៉ាវមួយនេះបានធ្វើឲ្យភូមា ពិសេសលោកស្រីអ៊ុង សានស៊ូជីទទួលគំនាបខ្លាំងពីសហគមន៍អន្តរជាតិ ពិសេសពីសហរដ្ឋអាអាមេរិក សហភាពអឺរ៉ុប ឬមួយពីអង្គការសហប្រជាជាតិ៕
