បន្ទាយមានជ័យ៖ថ្មីៗនេះមានការចែករំលែកពេញបណ្តាញសង្គមបង្ហាញនូវរឿងរ៉ាវដែលអាចទុកជាគំរូមួយសម្រាប់យុវជនខ្មែរយើងឲ្យមានឆន្ទៈតស៊ូក្នុងជីវិត។
នាងជា សិស្សថ្នាក់ទី១២ឈ្មោះ រិម ស្រីនិច ដែលទើបតែទទួលបានជ័យលាភីលេខ៤ ផ្នែកអក្សរសិល្ប៍ខ្មែរថ្នាក់ទី១២ ក្នុងការប្រលងសិស្សពូកែទូទាំងប្រទេស ឆ្នាំ២០១៩ និងតំណាងខេត្តបន្ទាយមានជ័យតែម្នាក់គត់។
ជាមួយនិងការសាទរអ្វីគួរឲ្យក្តុកក្តួលនោះគឺប្អូនស្រីរស់នៅក្នុងគ្រួសារមួយដែលជីវភាពខ្វះខាត ។ឪពុកជាកម្មករ ម្តាយស៊ីឈ្នួលបោកខោអាវឲ្យគេ តែយ៉ាងណាប្អូនស្រីនៅតែតស៊ូនិងទទួលជ័យលាភីនៅក្នុងការប្រឡងសិស្សពូកែ។គណនីហ្វេសប៊ុករបស់លោកគ្រូស៊ីដេតឌួង( Sideth Duong )បានឲ្យដឹងថា៖ “នេះគឺជាសិស្សនៃវិទ្យាល័យមង្គលបូរី ថ្នាក់ទី១២B ដែលបានប្រឡងជាប់សិស្សពូកែថ្នាក់ជាតិផ្នែកអក្សរសិល្ប៍ តំណាងខេត្តបន្ទាយមានជ័យតែម្នាក់គត់ ដោយបានចំណាត់ថ្នាក់លេខ៤។
គ្រួសារនាងក្រីក្រ ដោយឪពុកជាកម្មករ ម្តាយស៊ីឈ្នួលបោកខោអាវឲ្យគេ។ ទោះជាយ៉ាងនេះក៏ដោយ ក៏ប្អូនមិនបណ្តែតបណ្តោយខ្លួនតាមស្ថានភាពគ្រួសារឡើយ ផ្ទុយទៅវិញប្អូនបានប្រឹងប្រែងរៀនសូត្រ រហូតមានលទ្ធផលដូចថ្ងៃនេះ។ ដូច្នេះសូមអំពាវនាវបងប្អូនដែលមានធនធាន មេត្តាជួយដល់នាងតាមលទ្ធភាពផង”៕
