ខេត្តរតនៈគិរី ៖ ឈើកកោះដែលមានមុខកាត់២៥ឃ្លុំប្រវែង១.២ម៉ែត្រ ជាងបីរយកំណាត់ ដែលត្រូវបានក្រុមឈ្មួញប្រមូលទិញពីក្រុមដឹកតាមម៉ូតូមកស្តុកទុកក្នុងឃ្លាំងមួយកន្លែងដោយខុសច្បាប់ដែលមានទីតាំងស្ថិតនៅក្នុងភូមិ ឡាប៉ូ សង្កាត់យក្ខឡោម ក្រុងបានលុងខេត្តរតនគិរី។ត្រូវបានកម្លាំងសមត្ថកិច្ចចម្រុះរួមមានកម្លាំងនគរបាលប្រឆាំងបទល្មើសសេដ្ឋកិច្ចខេត្ត កម្លាំង ជំនាញរដ្ឋបាលព្រៃឈើ កម្លាំងអធិការ កម្លាំងប៉ុស្តិ៍ដែលដឹកនាំដោយលោកជា ពេជ្រព្រះរាជអាជ្ញាអមសាលាដំបូងខេត្តបានធ្វើការចុះបង្ក្រាបបានកាលពីវេលាម៉ោង១២និង10នាទីថ្ងៃត្រង់នៅថ្ងៃទី០៥ខែឧសភាឆ្នាំ២០១៩។
ក្រោយហេតុការណ៍ចុះបង្ក្រាបនេះ ត្រូវបានប្រជាពលរដ្ឋរស់នៅក្រុងបានលុងបានលើកឡើងថានេះជាករណីបង្ក្រាប ជាទ្រង់ទ្រាយធំលើកទី១ហើយដែលក្រោយពីមានការស្ងប់ស្ងាត់អស់មួយរយះកន្លងមកនេះបែរជាមានមេឈ្មួញថ្លើមធំហ៊ានលួចលាក់ប្រមូលទិញឈើ ដោយខុសច្បាប់យកមកស្តុកទុកក្នុងឃ្លាំងខាងលើក្នុងគោលបំណងរងចាំឱកាសល្អដើម្បីដឹកចេញយកទៅលក់បន្តនៅប្រទេសវៀតណាម។
ប្រជាពលរដ្ឋបានលើកឡើងបន្តទៀតថាមេឈ្មួញដែលហ៊ានប្រមូលទិញឈើប្រណិតទាំងនោះ អាងមានខ្នងបង្អែក នៅពីក្រោយខ្នង បានជាហ៊ានប្រមូលទិញឈើយកមកលាក់ស្តុកទុកក្នុងឃ្លាំងនៅកណ្តាលក្រុងបានលុងបែរជាសមត្ថកិច្ចធ្វើមិនដឹងមិនលឺ ជាពិសេសនោះ គឺផ្នែករដ្ឋបាលព្រៃឈើដែលមានលោក ជា កុណារ៉ា ជានាយផ្នែក និងសង្កាត់រដ្ឋបាលព្រៃឈើបានលុង គឺលោកលីសុផាន។
ក្នុងហេតុការណ៍បង្ក្រាបឈើដោយខុសច្បាប់នេះផងដែរ ត្រូវបានម្ចាស់ផ្ទះចាក់សោរផ្ទះនិងឃ្លាំងរត់គេចខ្លួនមុនពេលសមត្ថកិច្ចចុះមកដល់ ។ បច្ចុប្បន្ន ឈើខុសច្បាប់ទាំងនោះត្រូវបានសមត្ថកិច្ចរឹបអូសដឹកជញ្ជូន យកមករក្សាទុកនៅខណ្ឌរដ្ឋបាលព្រៃឈើខេត្ត ដើម្បីស្វែងរកម្ចាស់អោយចូលខ្លួនមកដោះស្រាយទៅតាមផ្លូវច្បាប់ស្តីពីព្រៃឈើនិងកសាងសុំណំរឿងដើម្បីបញ្ជូនទៅតុលាការ៕
ដោយ ៖ ចាប សំអាន
