ក្រចេះ ៖ ប្រភពពីមន្ត្រីអាជ្ញាធរនិងសមត្ថកិច្ចមូលដ្ឋានក្នុងស្រុកស្នួល ខេត្តក្រចេះ បានឲ្យដឹងថា៖ក្រុមឈ្មួញដឹកជញ្ជូនឈើតាមម៉ូតូអាជធ្វើសកម្មភាពបាន គឺពួកគេត្រូវអារសាច់ជួនខ្លាទើបរស់បាន។
ហាងឆេងបង់ពន្ធឲ្យសមត្តកិច្ចគឺម៉តូដឹកឈើមួយគ្រឿងត្រូវបង់៥០០០០រៀល ។ បើឈ្មួញដឹកជញ្ជូនឈើតាមរថយន្តត្រូវបង់១០០០០០រៀល ។
ឈ្មួញឈើខុសច្បាប់ទាំងនោះពួកគេដឹកជញ្ជូនឈើចេញទៅស្រុកយួនតាមច្រករបៀងជាច្រើនកន្លែងដូចជានៅចំណុចកុងត្រូល១ ច្រក១១៥ និងច្រក១២៣ ក៏ដូចជាច្រក៩៩៩ និងច្រក១២៩ តាមព្រំដែនក្នុងស្រុកស្នួល ខេត្តក្រចេះ។
ប្រភពពីក្រុមឈ្មួញនៅក្នុងស្រុកស្នួល ខេត្តក្រចេះ បានឲ្យដឹងថា បច្ចុប្បន្នលោក លន់ ប៊ុនថុល មេបញ្ជាការស្នាក់ការសន្តិសុខ៧០៩ ក្នុងស្រុកស្នួល ខេត្តក្រចេះបានដាក់ពង្រាយកូនចៅក្រោមឱវាទដើម្បីប្រមូលលុយពីក្រុមឈ្មួញដឹកជញ្ជូនឈើចេញទៅស្រុកយួនខាងលើនេះ។ ប៉ុន្តែសម្រាប់កម្លាំងប្រដាប់អាវុធមិនមែនចេះតែហ៊ានធើអីស្រេចចិត្តបាននោះទេ។
មានន័យថា៖លោក លន់ ប៊ុនថុលមេប៉េអឹមស្នាក់ការ៧០៩ដែល ហ៊ានដាក់ពង្រាយកូនចៅគ្រប់ច្រកល្ហកឲ្យប្រមូលលុយពីក្រុមឈ្មួញដឹកជញ្ជូនឈើចេញទៅស្រុកយួនតាមអំពើចិត្តចឹងនោះបើមិនមានការបើកដៃពីសំណាក់លោកឧត្តមសេនីយ៍ត្រី សាន្ត ប៊ុនថាន ជាមេបញ្ជាការកងរាជអាវុធហត្ថខេត្តក្រចេះម៉េចអាចទៅរួច ។
ចំណែកលោក វ៉ា ថន អភិបាលខេត្តក្រចេះដែលនាយករដ្ឋមន្ត្រីឲ្យមើលផ្លូវវិញបែជា កំពុងសម្ងំស្ងៀមធ្វើមិនដឹងមិនឮអ្វីទាំងអស់ ក្នុងខណៈដែលលោក លន់ ប៊ុនថុល ដាក់ពង្រាយកម្លាំងឲ្យគាបយកលុយពីឈ្មួញដឹកជញ្ជូនឈើទៅស្រុកយួន និងឃុបឃិតឲ្យមានបទល្មើសព្រៃឈើកើតឡើងជាលំដាប់ ។
សកម្មភាពរបស់ឈ្មួញក្នុងការសម្រុកដឹកជញ្ជូនឈើចេញទៅស្រុកយួនត្រូវបានគេដឹងថា ជាប្រភពចំណូលដ៏សំខាន់របស់លោក លន់ ប៊ុនថុល តែលទ្ធផលគឺកំពុងធ្វើឲ្យព្រៃឈើនៅក្នុងខេត្តក្រចេះ ខេត្តស្ទឹងត្រែង និងខេត្តមណ្ឌលគិរី ត្រូវប្រឈមនឹងសេចក្ដីវិនាសទេតើ។
ប្រភពពីសមត្ថកិច្ចពាក់ព័ន្ធក្នុងខេត្តក្រចេះ បានឲ្យដឹងថា បច្ចុប្បន្នបទល្មើសដឹកជញ្ជូនឈើចេញទៅស្រុកយួនតាមច្រកព្រំដែននិងច្រករបៀងជាច្រើនកន្លែងក្នុងស្រុកស្នួល ខេត្តក្រចេះ នៅតែបន្តកើតឡើងយ៉ាងគំហុកព្រោះមន្ត្រីរដ្ឋបាលព្រៃឈើ និងសមកត្ថកិច្ចពាក់ព័ន្ធមិនចាត់វិធានការបង្ក្រាបបទល្មើសប្រកបដោយប្រសិទ្ធភាពឡើយ។
