កម្លាំងកងរាជអាវុធហត្ថក្រុងក្រចេះ ដឹកនាំដោយលោកវរសេនីយ៍ត្រី ផាន សុភក្ត្រវាសនា ដោយមានការសម្របសម្រួលពីលោក កែវ សុជាតិ ព្រះរាជអាជ្ញា អមសាលាដំបូងខេត្តក្រចេះ បើកយុទ្ធនាការចុះបង្ក្រាបគ្រឿងញៀនរយៈពេល២ថ្ងៃជាប់គ្នា ក្នុងគោលដៅពីរផ្សេងគ្នា ដោយឃាត់ខ្លួនជនសង្ស័យបានចំនួន ៦នាក់ និងដកហូតវត្ថុតាងជាច្រើន។
លោកវរសេនីយ៍ត្រី ផាន សុភក្ត្រវាសនា មេបញ្ជាការអាវុធហត្ថក្រុងក្រចេះ បានឲ្យដឹងថា ប្រតិបត្តិការចុះបង្ក្រាបករណីជួញដូរ ប្រើប្រាស់ និងរក្សាទុកនូវសារធាតុញៀនខុសច្បាប់នេះ គឺធ្វើឡើងនៅថ្ងៃទី២២ ខែមេសា ឆ្នាំ២០១៩ នៅវេលាម៉ោង ១៣:០០នាទី កម្លាំងអាវុធហត្ថក្រុងក្រចេះ ដឹកនាំដោយរូបលោកផ្ទាល់ និងដោយមានការសម្របសម្រួល ពីលោក កែវ សុជាតិ ព្រះរាជអាជ្ញា អមសាលាដំបូងខេត្តក្រចេះ បានចុះបង្ក្រាបនៅចំនុចផ្សារអូរឬស្សី ស្ថិតនៅភូមិអូរឫស្សី ១ សង្កាត់អូរឫស្សី ក្រុងក្រចេះ ឃាត់ខ្លួនជនសង្ស័យបានចំនួន០៣នាក់។
ទី១-ឈ្មោះ ស៊ុន សុធី ភេទ ប្រុស អាយុ២៩ឆ្នាំ រស់នៅភូមិស្រែស្តៅ សង្កាត់អូរឬស្សី ក្រុងក្រចេះ ខេត្តក្រចេះ។
២-ឈ្មោះ ជូ ឌីណែត ភេទ ប្រុស អាយុ ២៦ ឆ្នាំ
រស់នៅភូមិអូរឬស្សី០២ សង្កាត់អូរឬស្សី ក្រុងក្រចេះ ខេត្តក្រចេះ។
ទី៣-ឈ្មោះ គង់ វ៉ាន់ណែត ភេទស្រី អាយុ ៣៧ ឆ្នាំ
រស់នៅភូមិស្រែស្តៅ សង្កាត់អូរឬស្សី ក្រុងក្រចេះ ខេត្តក្រចេះ ។ ដោយដកហូតវត្ថុតាងរួមមាន៖ ម្សៅក្រាមពណ៌ស ប្រភេទម៉ាទឹកកក សង្ស័យជាសារធាតុញៀនចំនួន ០២ កញ្ចប់តូច និងទូរស័ព្ទម៉ាកអូបប៉ូ (OPPO) ០១គ្រឿង។
លោកវរសេនីយ៍ត្រី ផាន សុភក្ត្រវាសនា បានបន្តថា នៅថ្ងៃទី២៣ ខែមេសា ឆ្នាំ២០១៩ កម្លាំងអាវុធហត្ថក្រុងក្រចេះ សហកាជាមួយ អាវុធហត្ថស្រុកឆ្លូង ចុះបង្ក្រាប ករណីចែកចាយ និងប្រើប្រាស់ នូវសារធាតុ
ញៀន ចំនួន៣ គោលដៅក្នុងភូមិសាស្ត្រ ស្រុកឆ្លូង ដោយមានការសម្របសម្រួល ពីលោក កែវ សុជាតិ ព្រះរាជអាជ្ញា អមសាលាដំបូងខេត្តក្រចេះ។
លោកបានបញ្ជាក់ថា ក្នុងនោះ កម្លាំងអាវុធហត្ថ ឃាត់បានជនសង្ស័យបានចំនួន ៣នាក់បន្ថែម៖ ទី១
-ឈ្មោះម៉ាត់ វ៉ារ៉េ ភេទប្រុស អាយុ២៦ឆ្នាំ រស់នៅភូមិឈើទាលភ្លោះ ឃុំព្រែកសាម៉ាន់ ស្រុកឆ្លូង ខេត្តក្រចេះ ។
ទី២-ឈ្មោះ សារី ម៉ាស៊ីតោះ ភេទស្រី អាយុ ៣៦ ឆ្នាំរស់នៅភូមិឈើទាលភ្លោះ
ឃុំព្រែកសាម៉ាន់ ស្រុកឆ្លូង ខេត្តក្រចេះ។ ដកហូតវត្ថុតាងរួមមាន៖១-ម្សៅក្រាមពណ៌ស (ម៉ាទឹកកក) សង្ស័យជាសារធាតុញៀនចំនួន ០៣កញ្ចប់។
ទី៣-ឈ្មោះ វិស្យា ឆៃវី ភេទប្រុស អាយុ ២៣ឆ្នាំ រស់នៅភូមិឈើទាល ឃុំកញ្ជរ ស្រុកឆ្លូង ខេត្តក្រចេះ។ ដកហូតវត្ថុតាងរួមមាន៖១ -ម្សៅក្រាមពណ៌ស(ម៉ាទឹកកក) សង្ស័យជាសារធាតុញៀនចំនួន ០១ កញ្ចប់តូច និងម៉ូតូស៊ីប៊ីអរ (CBR) ១គ្រឿង។
បច្ចុប្បន្ន ជនសង្ស័យ និងវត្ថុតាង ឃាត់ខ្លួននិងរក្សាទុកនៅមូលដ្ឋានកងរាជអាវុធហត្ថក្រុងក្រចេះ ដើម្បីបន្តនិតិវិធីច្បាប់៕ ដោយកិះខន
