ភ្នំពេញ ៖ បុរសម្នាក់ត្រូវបាននគរបាលច្រកទ្វារអន្តរជាតិប៉ោយប៉ែតប្រកាសតាមហ្វេសប៊ុកថាគឺជាអ្នកជម្រឹត ពីបទជំរិតទារប្រាក់ពីពលករខ្មែរ មកពីប្រទេសថៃ ដើម្បីចូលរួមក្នុងពិធីបុណ្យចូលឆ្នាំថ្មីមិនមែនពួកនគរបាលទេ។
កាលពីថ្ងៃទី១១មេសា ឆ្នាំ២០១៩ប៉ុស្ដិ៍នគរបាលច្រកទ្វារអន្តរជាតិប៉ោយប៉ែត បានបង្ហាញមុខបុរសម្នាក់ និងរៀបរាប់យ៉ាងខ្លីថា «ការឃាត់ខ្លួនមេខ្យល់ជំរិតទារប្រាក់ពីបងប្អូនពលករ នៅតែបន្តដូចភ្លៀងរលឹម។ សូមបងប្អូនមកទាក់ទងមន្ត្រីដោយផ្ទាល់ ចៀសវាងការចាញ់បោក និងខាតបង់ប្រាក់កាស»។
បើតាមសមត្ថកិច្ច អន្តោរប្រវេសន៍ បានប្រាប់ឲ្យដឹងថា៖ ជនប្រព្រឹត្ត មានឈ្មោះ ខៀវ សាវុធ ភេទប្រុស អាយុ៣៦ឆ្នាំ សញ្ជាតិខ្មែរ មុខរបរអូស រទេះ បច្ចុប្បន្នស្នាក់នៅផ្ទះជួល ក្រោយនាគមាសចាស់ កាលពីព្រឹកថ្ងៃទី០៩ ខែឆ្នាំដដែល គាត់បាននាំពលករចេញពីប្រទេសថៃ មកប្រទេសកម្ពុជា ចំនួន០៣នាក់ ក្នុងតម្លៃម្នាក់៦០០ បាត។ តែពេលនាំចូលមកត្រូវមន្ត្រីប្រចាំការ នៅក្បាលស្ពាន ឃាត់ខ្លួនបានរួចបញ្ជូនមក ប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត ដើម្បីសាកសួរ។
សមត្ថកិច្ចដដែលបានបន្តថា៖ គាត់បានសារភាពទទួលកំហុស នៅចំពោះមុខសមត្ថកិច្ច និងបានធ្វើកិច្ចសន្យា បន្ទាប់ពីធ្វើកំណត់ហេតុហើយ យើងបានអនុញ្ញាតិ អោយគាត់ត្រលប់ទៅផ្ទះវិញ ។ ចំពោះទង្វើ នៃជននោះ សមត្ថកិច្ច បានពិនិត្យទៅលើធាតុផ្សំ នៃ បទល្មើស ដែលមាន ធាតុ ច្បាប់ ធាតុផ្លូវចិត្ត និង ធាតុសំភារៈ ចំពោះធាតុទាំងបីនេះ ចង់ចូលក្នុងមាត្រា ឬ ធាតុណាមួយ ជននោះមិនអាចរួចផុត ពីសំណាញ់ច្បាប់ដែរ តែដោយសារជាអំពើ របស់ជននេះ ទើបជាលើកដំបូង ហើយមិនយល់អំពីផ្លូវច្បាប់ ទើបដោះ លែងត្រឡប់ទៅវិញ ដោយគ្រាន់តែឲ្យគាត់ធ្វើកិច្ចសន្យាប៉ុណ្ណោះ ។
អ្នកសារព័ត៌មាន មិនអាចសុំការបកស្រាយពីលោក ខឹម ចិត្រា ប្រធានប៉ុស្ដិ៍នគរបាលច្រកទ្វារនេះបានឡើយ។សូមបញ្ជាក់ថាលោកហ៊ាង គឹមស្រឿន ដែលជាអ្នកវិភាគនយោបាយដ៏ល្បីឈ្មោះ និងជាអ្នកឃ្លាំមើលការអនុវត្តព្រឹត្តិការណ៍សង្គម ប្តឹងទៅលោកទេសរដ្ឋមន្ត្រី ឱម យិនទៀង ប្រធានអង្គភាពប្រឆាំងអំពើពុករលួយសុំបើកការស៊ើបអង្កេត ពាក់ព័ន្ធនៅក្នុងករណីទទួលយកលុយពីប្រជាពលរដ្ឋ ដែលជាពលករចំណាកស្រុកក្នុងម្នាក់ៗ ៣៥០បាត ដោយមិនមានចេញឯកសារច្បាស់លាស់ ដែលចាត់ទុកជាការប្រព្រឹត្តអំពើពុករលួយជាប្រព័ន្ធក្នុងការបំពេញការងារ សម្រាប់សេវាកម្មសាធារណៈរបស់រដ្ឋ។
លោក ហ៊ាង គឹមស្រឿន បានលើកឡើង ថា៖”កាលពីពេលថ្មីៗនេៈ ឃើញមានមន្ត្រីច្រកទ្វារប៉ោយប៉ែតបានធ្វើសកម្មភាពយកលុយពីពលករក្នុងម្នាក់ៗចំនួន៣៥០បាត គ្មានឯកសារច្បាស់លាស់សម្រាប់ជាថវិការដ្ឋ ដែលអំពើនេះចាត់ទុកជាការប្រព្រឹត្តអំពើពុករលួយជាលក្ខខណៈប្រព័ន្ធដែលត្រូវតែអង្គភាពប្រឆាំងអំពើពុករលួយគួរមានវិធានការផ្លូវច្បាប់ បើកការស៊ើបអង្កេតកោះហៅមន្ត្រីពាក់ព័ន្ធ និងមន្ត្រីបក្ខពួកខាងលើអោយមកចូលខ្លួនបំភ្លឺនៅចំពោះអង្គភាពតាមនីតិវិធីច្បាប់ជាធរមាន។
លោក ហ៊ាង គឹមស្រឿន បានអោយកាសែតដឹងថា លោកបានយកពាក្យបណ្តឹងទៅជូនអង្គភាពប្រឆាំងអំពើពុករលួយរួចរាល់ហើយកាលពីថ្ងៃទី១០ ខែមេសា ឆ្នាំ២០១៩ ។ លោកបន្តថា ការដាក់ពាក្យបណ្ដឹង ប្ដឹងប្រធានច្រកទ្វារប៉ោយប៉ែតទៅកាន់អង្គភាពប្រឆាំងអំពើពុករលួយ គឺបានធ្វើឡើងក្រោយពីបានសង្កេតឃើញថា មានភាពមិនប្រក្រតីមួយចំនួនដោយយកប្រាក់ពីពលករខ្មែរឆ្លងដែនចូលមកកម្ពុជាក្នុង០១នាក់ (៣៥០បាត )ដោយពុំមានឯកសារច្បាស់លាស់ សម្រាប់បញ្ជាក់ថាប្រមូលជាថវិការរដ្ឋដោយអាចចាត់ទុកជាការប្រព្រឹត្តអំពើរពុករលួយជាលក្ខណ:ប្រព័ន្ធ។
លោកបន្តថា ការដាក់ពាក្យបណ្តឹងទៅកាន់អង្គភាពប្រឆាំងអំពើរពុករលួយគឺមិនត្រឹមតែច្រកទ្វារអន្តរជាតិប៉ោយប៉ែតតែប៉ុណ្ណោះទេ គឺលោកនិងដាក់ពាក្យបណ្តឹងទៅលើច្រកទ្វារអន្តរជាតិដូង កំរៀង និងច្រកឡែម បន្ថែមទៀតក្រោយពីលោកបានប្រមូលឯកសារបានមួយចំនួនហើយករណីយកលុយពីពលករដោយពុំមានឯកសារច្បាស់លាស់ ហើយខណ:ពេលនេះលោកកំពុងសិក្សានិងស្រាវជ្រាវរកឯកសារបន្ថែមទៀតផងដែរ។លោក ហ៊ាង គឹមស្រឿន ក្រោយពីបានជួបពិភាក្សានៅអង្គភាពប្រឆាំងអំពើពុករលួយតាមការអញ្ជើញនាថ្ងៃទី១២ ខែមេសា ឆ្នាំ២០១៩បានឲ្យកាសែតដឹងថាអង្គភាពប្រឆាំងអំពើពុករលួយបានឯកភាពស្រាវជ្រាវរឿងពុករលួយតែមិនមែនត្រឹមតែច្រកប៉ោយប៉ែតទេគឺនៅច្រកដូងផងដែរ។
ជិតបុណ្យចូលឆ្នាំខ្មែរ ពលករដែលធ្វើការនៅប្រទេសថៃជាច្រើន បាននាំគ្នាសម្រុកមកស្រុកកំណើតវិញ ដែលបណ្តាលឱ្យមានភាពកកស្ទះពេញតាមច្រកព្រំដែន និងមានអ្នកខ្យល់គរផងដែរ ពេលកំពុងតម្រង់ជួរប្រថាប់ត្រា ដោយសារតែក្តៅនិងហប់ពេក។ វាក៏មានការលេចឮថា មន្ត្រីអន្តោប្រវេសន៍ច្រកទ្វារអន្តរជាតិប៉ោយប៉ែត បានទារប្រាក់ពីពលករមកពីប្រទេសថៃពី១០០ទៅ២០០បាតផងដែរ៕
