ភ្នំពេញ ៖ បុរសម្នាក់ដែលគេឃើញក្នុងឃ្លិបវិដេអូប្រើហឹង្សាទះកំផ្លៀងស្ត្រីម្នាក់ឱ្យដួលអុកគូទ កាលពីថ្ងៃទី០៩ ខែមេសា ឆ្នាំ២០១៩ នៅចំណុចផ្លូវលេខ១៣៦ កែងនឹងផ្លូវលេខ១៥ សង្កាត់ផ្សារកណ្តាលទី១ ខណ្ឌដូនពេញនោះ ត្រូវបានអាវុធហត្ថរាជធានីភ្នំពេញ រកអាស័យដ្ឋានឃើញហើយតាមរយៈលេខរថយន្តដែលថតផ្សាយតាមហ្វេសប៊ុក។
ក្រោយកើតហេតុ នារីរងគ្រោះ បានបញ្ជាក់ថាខ្លួនមិនបានស្គាល់អត្តសញ្ញាណជនបង្កហិង្សានេះឡើយ តែដឹងថា បុរសនេះជិះរថយន្ត Fortuner ពណ៌ស ពាក់ផ្លាកលេខភ្នំពេញ 2AR-3386។លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ បានអះអាងថា បន្ទាប់ពីកម្លាំងជំនាញរបស់លោក បានធ្វើការកំណត់អត្តសញ្ញាណរថយន្តរបស់ជនបង្ក ដឹងថាជារថយន្តរបស់ក្រុមហ៊ុនមួយ លោកក៏បានស្នើទៅក្រុមហ៊ុនឲ្យចេញមុខទទួលខុសត្រូវ។
ក្រុមហ៊ុនក៏បានសហការណ៍ជាមួយសមត្ថកិច្ចអាវុធហត្ថ ដោយនាំយកជនសង្ស័យ ទៅប្រគល់ដល់បញ្ជាការដ្ឋានកងរាជអាវុធហត្ថរាជធានីភ្នំពេញហើយ។
ជនសង្ស័យដៃខ្លាំងនោះមានឈ្មោះ ឡោ ប៊ុនភ័ក្ត្រ អាយុ៤៣ឆ្នាំ មុខរបរជាអ្នកបើកបររថយន្តឲ្យក្រុមហ៊ុន កំពុងត្រូវបានកម្លាំងជំនាញ របស់កងរាជអាវុធហត្ថរាជធានីភ្នំពេញ សួរនាំនិងកសាងសំណុំរឿងបញ្ជូនទៅតុលាការ ដើម្បីផ្តន្ទាទោសតាមច្បាប់។
