បន្ទាយមានជ័យ ៖ លោកខឹមចិត្រាមេនគរបាលច្រកទ្វារអន្តរជាតិនិងកូនចៅត្រូវបានលោកហ៊ាង គឹមស្រឿន ដែលជាអ្នកវិភាគនយោបាយដ៏ល្បីឈ្មោះ និងជាអ្នកឃ្លាំមើលការអនុវត្តព្រឹត្តិការណ៍សង្គម ប្តឹងទៅលោកទេសរដ្ឋមន្ត្រី ឱម យិនទៀង ប្រធានអង្គភាពប្រឆាំងអំពើពុករលួយសុំបើកការស៊ើបអង្កេត ពាក់ព័ន្ធនៅក្នុងករណីទទួលយកលុយពីប្រជាពលរដ្ឋ ដែលជាពលករចំណាកស្រុកក្នុងម្នាក់ៗ ៣៥០បាត ដោយមិនមានចេញឯកសារច្បាស់លាស់ ដែលចាត់ទុកជាការប្រព្រឹត្តអំពើពុករលួយជាប្រព័ន្ធក្នុងការបំពេញការងារ សម្រាប់សេវាកម្មសាធារណៈរបស់រដ្ឋ។
ក្នុងពាក្យបណ្តឹងលោក ហ៊ាង គឹមស្រឿន បានលើកឡើង ថា៖”កាលពីពេលថ្មីៗនេៈ ឃើញមានមន្ត្រីច្រកទ្វារប៉ោយប៉ែតបានធ្វើសកម្មភាពយកលុយពីពលករក្នុងម្នាក់ៗចំនួន៣៥០បាត គ្មានឯកសារច្បាស់លាស់សម្រាប់ជាថវិការដ្ឋ ដែលអំពើនេះចាត់ទុកជាការប្រព្រឹត្តអំពើពុករលួយជាលក្ខណៈប្រព័ន្ធដែលត្រូវតែអង្គភាពប្រឆាំងអំពើពុករលួយគួរមានវិធានការផ្លូវច្បាប់ បើកការស៊ើបអង្កេតកោះហៅមន្ត្រីពាក់ព័ន្ធ និងមន្ត្រីបក្ខពួកខាងលើអោយមកចូលខ្លួនបំភ្លឺនៅចំពោះអង្គភាពតាមនីតិវិធីច្បាប់ជាធរមាន។
លោក ហ៊ាង គឹមស្រឿន បានអោយកាសែតដឹងថា លោកបានយកពាក្យបណ្តឹងទៅជូនអង្គភាពប្រឆាំងអំពើពុករលួយរួចរាល់ហើយកាលពីថ្ងៃទី១០ ខែមេសា ឆ្នាំ២០១៩ ។ លោកបន្តថា ការដាក់ពាក្យបណ្ដឹង ប្ដឹងប្រធានច្រកទ្វារប៉ោយប៉ែតទៅកាន់អង្គភាពប្រឆាំងអំពើពុករលួយ គឺបានធ្វើឡើងក្រោយពីបានសង្កេតឃើញថា មានភាពមិនប្រក្រតីមួយចំនួនដោយយកប្រាក់ពីពលករខ្មែរឆ្លងដែនចូលមកកម្ពុជាក្នុង០១នាក់ (៣៥០បាត )ដោយពុំមានឯកសារច្បាស់លាស់ សម្រាប់បញ្ជាក់ថាប្រមូលជាថវិការរដ្ឋដោយអាចចាត់ទុកជាការប្រព្រឹត្តអំពើរពុករលួយជាលក្ខណ:ប្រព័ន្ធ។
លោកបន្តថា ការដាក់ពាក្យបណ្តឹងទៅកាន់អង្គភាពប្រឆាំងអំពើរពុករលួយគឺមិនត្រឹមតែច្រកទ្វារអន្តរជាតិប៉ោយប៉ែតតែប៉ុណ្ណោះទេ គឺលោកនិងដាក់ពាក្យបណ្តឹងទៅលើច្រកទ្វារអន្តរជាតិដូង កំរៀង និងច្រកឡែម បន្ថែមទៀតក្រោយពីលោកបានប្រមូលឯកសារបានមួយចំនួនហើយករណីយកលុយពីពលករដោយពុំមានឯកសារច្បាស់លាស់ ហើយខណ:ពេលនេះលោកកំពុងសិក្សានិងស្រាវជ្រាវរកឯកសារបន្ថែមទៀតផងដែរ។លោក ហ៊ាង គឹមស្រឿន ត្រូវចូលទៅពិភាក្សានៅអង្គភាពប្រឆាំងអំពើពុករលួយតាមការអញ្ជើញនាថ្ងៃទី១២ ខែមេសា ឆ្នាំ២០១៩។
សូមបញ្ជាក់ដែរថា៖ ប្រជាពលរដ្ឋនៅក្រុងប៉ោយប៉ែត និងពលករខ្មែរចូលទៅធ្វើការនៅប្រទេសថៃនិយាយថាគេ សង្ឃឹមថា ការផ្លាស់ប្តូរមេប៉ូលិសអន្តោប្រវេសន៍ច្រកទ្វារអន្តរជាតិប៉ោយប៉ែតអាចនឹងមានការកែទម្រង់ការងារពិសេសគឺ កាត់បន្ថយការគាបសង្កត់យកលុយរបស់មន្ត្រីនគរបាល ប្រចាំច្រកនេះ ។ប៉ុន្តែមិននឹកស្មានថាលោកប្រធានថ្មីស៊ីលុយធំជាងលោកប្រធានចាស់ចឹងឡើយ។ បើតាមការសង្កេតរបស់ប្រជាពលរដ្ឋនិយាយថា៖ចាប់តាំងពីលោក ខឹម ចិត្រា បានមកឡើងកាន់តំណែង ជាប្រធាននគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត ជំនួសលោក ស៊ឹម សំអាត ដែលល្បីខាងប្រព្រឹត្តអំពើពុករ លួយហើយថែម ទាំងសូកប៉ាន់ពន្យាកំណើត ដើម្បីបានកាន់ តំណែង ធ្វើជាអនុប្រធាននាយកដ្ឋានទទួលទិសទី១នៅអគ្គនាយកដ្ឋាន ដើម្បីឈានទៅពង្រឹងអំណាចបន្តទៀត។
ចំណែកលោក ខឹម ចិត្រា វិញក៏មិនណយដែរព្រោះចាយសេវាក៏មិនធម្មតាដែរដើម្បីបានមកកាន់ប៉ូស្តិខ្លាញ់មួយនេះនោះ។ចឹងលោក ខឹម ចិត្រា មិនត្រឹមតែបន្តដើរតាមគំរូអាក្រក់របស់លោក ស៊ឹម សំអាត ប៉ុណ្ណោះទេ គឺថែមទាំងបង្កើនអំពើពុករលួយកាន់តែខ្លាំងទ្វេរឡើងផងក៏ថាបានដែរ។
ជាក់ស្តែងបន្ទាប់ពីលោកវរ:សេនីយ៍ទោ ខឹម ចិន្ត្រា ឡើងកាន់តំណែងជាមេប៉ុស្តិ៍នគរបាលប្រចាំច្រកទ្វារអន្តរជាតិប៉ោយប៉ែត គេសង្កេតឃើញថា លោកនៅមិនទាន់មានវិធានការទៅលើលោក សេម មករា នាយផ្នែកសេនាធិការនគរបាលប៉ុស្តិ៍អន្តោរប្រវេសន៍ ច្រកទ្វារអន្តរជាតិប៉ោយប៉ែតនៅឡើយ ខណៈលោក សេម មករា កំពុងឃុបឃិតគ្នាជាមួយលោក ម៉ៅ ម៉យ និងមន្ត្រីក្រោមឱវាទមួយចំនួនទៀត ជំរិតទារប្រាក់ពីកម្មករអូសរទេះពីប្រទេសថៃមកកម្ពុជា និងពីកម្ពុជាទៅប្រទេសថៃ។
