បាត់ដំបង៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃនៅព្រឹកថ្ងៃទី០៨ ខែមេសា ឆ្នាំ២០១៩ បានប្រកាសឲ្យដឹងពីការលើកសំណើមួយជូនសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដើម្បីដាក់វិធានការ លុបបំបាត់បំបាត់មិនឱ្យមានក្លឹបកម្សាន្ដ និងកន្លែងបូជាសព នៅជិតសាលារៀន។
ក្នុងឱកាសចុះពិនិត្យ ទីតាំងសាងសង់អាងហែលទឹក សកលវិទ្យាល័យបាត់ដំបងសម្ដេចក្រឡាហោម ស ខេង បានថ្លែងថា «ខ្ញុំក៏បានលើកសំណើមួយទៅ សម្ដេចតេជោ ទាក់ទងរឿងការដាក់ក្លឹបកម្សាន្ដជិតសាលារៀន និងក៏បានបន្ថែមទៅក្នុងកម្មវិធីជាតិ ស្ដីពីសុខភាព គឺថាយើងមិនអនុញ្ញាតឲ្យ ដាក់ក្លឹបកម្សាន្ដ នៅជិតសាលារៀនទេ។ បើមិនអញ្ចឹងទេ នឹងធ្វើឲ្យក្មេងមានអារម្មណ៍មិនមូល បែកហើយ បើថាក្លឹបនឹងលួចលាក់ មានគ្រឿងញៀនទៀត អាហ្នឹងគឺជាបញ្ហា ជាពិសោធន៍កន្លងទៅ»។ សម្តេចបានបន្តទៀតថា «កន្លែងបច្ឆាដុតខ្មោច ដុតអីមិនឲ្យមានជិតសាលាទេ ក្មេងមានអារម្មណ៍ភ័យខ្លាច សម្រាប់ការរៀនសូត្ររបស់ក្មេង»។
សម្ដេចបានបញ្ជាក់ថា បញ្ហាអប់រំ ដើម្បីទប់ស្កាត់ បញ្ហាគ្រឿងញៀន និងបញ្ហាចរាចរណ៍ គ្រឿងញៀននៅក្នុងសាលានេះ ក្រសួងមហាផ្ទៃ និង ក្រសួងអប់រំ យុវជន និងកីឡា នឹងបង្កើតជាបន្ទប់ពិសេសមួយដើម្បី បញ្ចាំង វីដេអូ ស្ដីការផលប៉ះពាល់ នៃការប្រើប្រាស់គ្រឿងញៀន និងបញ្ហាចរាចរណ៍ ដើម្បីធ្វើការបញ្ជ្រាបដល់យុវជន ។ក្រៅពីនេះក្រសួងអប់រំយុវជន ក៏នឹងរៀបចំបង្កើត ឲ្យមានសិស្សយាមសាលា ដើម្បីការពារកុំឲ្យមានគ្រឿងញៀន ចូលទៅក្នុងសាលារៀនផងដែរ។
សូមបញ្ជាក់ដែរថាមណ្ឌលហែលទឹកនេះគ្រោងសាងសង់ឡើងតាមស្តង់អន្តរជាតិ ដែលមានទំហំក្រឡាផ្ទៃអាងបណ្តោយ ២៥ម៉ែត្រ ទទឹង២០ម៉ែត្រ ក្រោមគំនិតផ្តួចផ្តើមរបស់សម្តេចក្រឡាហោម ដើម្បីអាចឱ្យកីឡាករកីឡាការនី ទាំងជាតិនិងអន្តរជាតិ ក៏ដូចជាមហាជនទូទៅ ធ្វើការហ្វឹកហាត់កីឡាដើម្បីសុខភាព ឬក៏ដូចជាដើម្បីត្រៀម ចូលរួមប្រកួតព្រឹត្តការណ៍កីឡានានាផងដែរ ហើយមណ្ឌលហែល ទឹកនេះគ្រោងរៀបចំពិធីក្រុងពាលី បើកការដ្ឋានសាងសង់នៅក្រោយពិធីបុណ្យចូលឆ្នាំថ្មីប្រពៃណីជាតិខ្មែរ។
