រុស្ស៊ី៖ នៅតំបន់អាល់តៃ( Altai) ប្រទេសរុស្ស៊ី ក្រុមអ្នកជួយសង្គ្រោះបានជួយសង្គ្រោះសុនខមួយក្បាល ដែលដេកត្រាំទឹកកកដែលមានសីតុណ្ហភាពប្រមាណដក ២០អង្សា ២ថ្ងៃមកហើយ។ ប៉ុន្តែអ្វីដែលគួរឱ្យភ្ញាក់ផ្អើល សុនខនោះមិនមែននៅតែឯងទេ វាបានការពារក្មេងប្រុសអាយុ ២ឆ្នាំម្នាក់នៅជាមួយ។
សមត្ថកិច្ចបានឱ្យដឹងថា ក្មេងប្រុសអាយុ ២ឆ្នាំនេះ ត្រូវបានម្ដាយចិត្តឃោរឃៅយកទៅកប់ចោលទាំងរស់នៅតំបន់ដែលធ្លាក់ព្រិលនោះ។ ប៉ុន្តែមូលហេតុដែលស្ត្រីចិត្តអប្រិយ យកកូនទៅបោះចោល នៅមិនទាន់ដឹងនៅឡើយទេ។ ក្រោយមក អ្នកនៅក្បែរនោះ បានប្រទះឃើញសុនខមួយក្បាលនៅកកជាប់ក្រោមព្រឹល ក៏ប្រាប់ក្រុមអ្នកជួយសង្គ្រោះ។
បើតាមសភាពជាក់ស្ដែង នៅក្រោមសីតុណ្ហភាពដក ២០អង្សា ក្មេងនោះគ្មានឱកាសនឹងរស់បានដល់ ២ថ្ងៃនោះឡើយ បើគ្មានសុនខចិត្តធម៌ មកការពារដោយដេកពីលើទ្រាំក្រោមព្រឹលបញ្ចេញកំដៅពីខ្លួនជួយនោះទេ។
តាមប្រភពព័ត៌មានដដែលបានឱ្យដឹងថា ម្ដាយដែលបានយកក្មេងនេះទៅបោះបង់ចោល ត្រូវបានសមត្ថកិច្ចឃាត់ខ្លួនហើយ ដោយអាចប្រឈមមុខនឹងទោសទណ្ឌផងដែរ។ ចំណែកក្មេងប្រុស និងសុនខ កំពុងស្ថិតក្រោមការព្យាបាល។ សុនខនេះ មិនបានបាត់បង់ជីវិតឡើយ ព្រោះវាមានប្រព័ន្ធភាពសាំនឹងអាកាសធាតុ ដែលអាចទ្រាំបានក្នុងរយៈពេលយូរ មិនធ្វើឱ្យឈាមកក។
