ភ្នំពេញ ៖ ខុសពីសម័យលោកឧត្តមសេនីយ៍ហុកឡងឌីកាលពីថ្ងៃទី៤មេសាលោកនាយឧត្តមសេនីយ៍សន្តិបណ្ឌិត នេត សាវឿនអគ្គស្នងការនគរបាលជាតិ បានដឹកនាំគណៈប្រតិភូជាន់ខ្ពស់នគរបាលជាតិទៅសហរដ្ឋអាមេរិកដើម្បីជួបប្រជុំជាមួយនគរបាលសហពន្ធ័អាមេរិក( FBI )និងចុះអនុស្សារណៈយោគយល់គ្នា (MOU) ស្តីពីកិច្ចសហប្រតិបត្តិការអនុវត្តច្បាប់ រវាងកម្ពុជា និងសហរដ្ឋអាមេរិក។
នេះបើតាមលោកឧត្តមសេនីយ៍ឯក ឆាយ គឹមឃឿន អគ្គស្នងការរងនគរបាលជាតិបានឲ្យដឹង។កម្មវិធីនៅសហរដ្ឋអាមេរិករបស់អគ្គស្នងការនគរបាលជាតិកកម្ពុជា គឺមានរយៈពេល៥ថ្ងៃ( ពីថ្ងៃទី៥ដល់១០ ខែមេសា ឆ្នាំ២០១៩ )តាមការអញ្ជើញរបស់ការិយាល័យស៊ើបអង្កេតបទឧក្រិដ្ឋ របស់សហរដ្ឋអាមេរិក (FBI) ក្នុងគោលបំណង ដើម្បីផ្លាស់ប្តូរបទពិសោធន៍ និងពង្រឹងកិច្ចសហប្រតិបត្តិការប្រយុទ្ធប្រឆាំងបទឧក្រិដ្ឋ។
លោកឧត្តមសេនីយ៍ឆាយ គឹមឃឿន បញ្ជាក់ថា ការចុះអនុស្សារណៈយោគយល់គ្នារវាងអគ្គស្នងការនគរបាលជាតិ និងការិយាល័យស៊ើបអង្កេតបទឧក្រិដ្ឋរបស់សហរដ្ឋអាមេរិក (FBI) គឺជាលើកទី១ ដោយកន្លងមកប៉ូលិសកម្ពុជា សហការល្អជាមួយ FBI ក្នុងការសហការគ្នាស៊ើបអង្កេត និងបង្ក្រាបបទល្មើសឧក្រិដ្ឋ ជាពិសេសបទល្មើសបច្ចេកវិទ្យា។ ភាគីទាំងពីរ យល់ឃើញថា ការរីករាលដាល ដែលមានអង្គការចាត់តាំង ចាំបាច់កងកម្លាំងអនុវត្តច្បាប់ នៃប្រទេសទាំងអស់ គួរតែមានកិច្ចសហការគ្នាដើម្បីទប់ស្កាត់ រួមទាំងបញ្ហាអន្តោប្រវេសន៍ខ្លះដែរ៕