ភ្នំពេញ៖ លោក ឃួង ស្រេង អភិបាលរាជធានីភ្នំពេញ នៅរាត្រីថ្ងៃទី២ ខែមេសា ឆ្នាំ២០១៩នេះ បានបកស្រាយរឿងចាក់ដីលុបដៃទន្លេរបាសាក់ថា៖ ការលើកឡើង របស់មតិមហាជន ថា មានក្រុមហ៊ុនឯកជន កំពុងបំពាន ចាក់ដីលុបដៃទន្លេបាសាក យកជាកម្មសិទ្ធផ្ទាល់ខ្លួននោះ ជាការយល់ច្រឡំទេ! ព្រោះនេះជាការចាក់ដី បើកការដ្ឋានសាងសង ច្រាំងទន្លេ ដែលជាគម្រោងអភិវឌ្ឍន៍ ច្រាំងទន្លេ របស់សាលារាជធានីភ្នំពេញ ប៉ុណ្ណោះ!!។
លោក ឃួង ស្រេង បានបញ្ជាក់ថា រដ្ឋបាលរាជធានីភ្នំពេញ មិនមានបំណងលុបដៃទន្លេបាសាក់ ដូចការរិះគន់របស់អ្នកលេងបណ្តាញសង្គម Facebook និងសារព័ត៌មានមួយចំនួននោះឡើយ។«ការចាក់ដីនេះ គឺជាការសាងសង់អាងចម្រោះទឹកស្អុយ ដែលជាគម្រោងរបស់រដ្ឋបាលរាជធានីភ្នំពេញ មិនមែនជាការចាក់លុបដីរបស់ឈ្មួញនោះទេ សូមប្រជាពលរដ្ឋកុំយល់ច្រឡំ»។
លោកអភិបាលរាជធានីបន្តថា ចំពោះការចាក់ដីលុបនេះ នៅពេលដែលការដ្ឋានសាងសង់ ស្ថាបនាអាងចម្រោះទឹកសម្អុយរួចរាល់នោះ នឹងកាយដីដែលបានចាក់ចេញវិញ ហើយគម្រោងនេះក៏មានសង់ច្រាំងទន្លេទប់ដី និងសង់ផ្លូវថ្មីជើងចាប់ពីកោះពេជ្ររហូតដល់ស្ពានអាកាសក្បាលថ្នាល់ ដើម្បីលើកកម្ពស់សោភណ្ឌភាពទីក្រុងភ្នំពេញ ដែលមានអាគារសំណង់ខុនដូខ្ពស់ៗ នៅអមសងខាងដៃទន្លេ៕