អាមេរិកចិន៖គេហទំព័រ វ៉ាស៊ីនតោនហ្វ្រីប៊ីខុន (Washington Free Beacon) បានផ្សាយរូបភាពផ្កាយរណបមួយដែលបានបង្ហាញថា ក្រុមជំនាញនៃប្រទេសចិនបានតម្លើងប្រព័ន្ធឡាស៊ែរប្រឆាំងផ្កាយរណប ស្ថិតនៅខេត្តស៊ីនជាំង (Xinjiang) នៅឯភាគខាងលិចប្រទេស។
នេះបើតាម សារព័ត៌មាន Sputnik នៅរសៀលថ្ងៃអង្គារ ទី០២ ខែមេសា ឆ្នាំ២០១៩។ផ្អែកលើរូបភាពផ្កាយរណប ដែលទទួលបានពីមន្ត្រីយោធាចូលនិវត្តន៍របស់ឥណ្ឌា គឺលោក វីណាយ៉ាក់ បាត (Vinayak Bhat)ត្រូវបាន គេហទំព័រ Washington Free Beacon ដកស្រង់សម្តីមកផ្សាយថា ប្រព័ន្ធឡាស៊ែរខាងលើស្ថិតនៅចំងាយ ១៤៥ miles ឬ ២៣៣គីឡូម៉ែត្រពីភាគខាងត្បូងទីក្រុង យូរុមគី (Urumqi) ដែលជារដ្ឋធានីនៃខេត្ត Xinjiang និងស្ថិតនៅក្បែរបឹងមួយ។ លើសពីនេះទៅទៀតបើតាមលោក Bhat ប្រព័ន្ធឡាស៊ែរនេះ ក៏មានសមត្ថភាពខ្ពស់ក្នុងការបាញ់កម្ទេច និងបំផ្លាញផ្កាយរណបផងដែរ។
គួរបញ្ជាក់ថា ចិនធ្លាប់ត្រូវបានក្រុមអ្នកជំនាញអន្តរជាតិ ជាពិសេសសហរដ្ឋអាមេរិកវាយតម្លៃថា អាចនឹងដំឡើងអាវុធកាំរស្មីឡាស៊ែរ ដែលអាចកម្ទេចគោលដៅនៅគន្លងគោចរកម្រិតទាបនៃភពផែនដី (ចាប់ពី ២,០០០គីឡូម៉ែត្រចុះក្រោម) នៅត្រឹមឆ្នាំ២០២០ ហើយនៅពាក់កណ្ដាលឆ្នាំ២០២០ ទីក្រុងប៉េកាំងអាចនឹងដាក់ពង្រាយអាវុធ ដែលមានសមត្ថភាពគំរាមកំហែងដល់ហេដ្ឋរចនាសម្ព័ន្ធ នៃប្រព័ន្ធផ្កាយរណបមិនមែនអុបទិច (non-optical satellites) ផងដែរ។
នាពេលថ្មីៗនេះផងដែរ ក្រុមហ៊ុនផលិតអាវុធចិនបានបង្កើតប្រព័ន្ធរ៉ាដាវិទ្យុសកម្មចម្រុះជាមួយបច្ចេកវិជ្ជា ដែលពួកអ្នកជំនាញមើលឃើញថាជាឧបករណ៍ឈ្លបយកការណ៍ពីលើអាកាសទៅដីដ៏មានប្រសិទ្ធិភាពនិងប្រហែលជាឧបករណ៍សម្រាប់ចាប់ដានយន្តហោះចម្បាំងបំបាំងកាយ។
យោងតាមសេចក្តីរាយការណ៍របស់ទូរទស្សន៍ CCTV ដកស្រង់សេចក្តីថ្លែងការណ៍បញ្ចេញដោយក្រុមហ៊ុន CETC បានឱ្យដឹងថា រ៉ាដាវិទ្យុសកម្មTerahertz ត្រូវបានបង្កើតឡើងដោយក្រុមអ្នកជំនាញរបស់ក្រុមហ៊ុន China Electronics Technology Group Corporation (CETC) ដែលដឹកនាំដោយអ្នកវិទ្យាសាស្ត្រ Li Yuanji និងគំរូរ៉ាដាជំនាន់ទី២កំពុងស្ថិតក្នុងដំណាក់កាលអភិវឌ្ឍហើយ។
របាយការណ៍របស់ទូរទស្សន៍ CCTV បាននិយាយថា រ៉ាដាវិទ្យុសកម្ម Terahertz មានរលកចម្ងាយនៅចន្លោះកាំរស្មីអ៊ីនហ្វ្រារ៉េនិងមីក្រូវ៉េ ដែលជាបាតុភូតដ៏ទូលំទូលាយមួយអាចធ្វើខូចបច្ចេកវិជ្ជាបំបាំងកាយបច្ចុប្បន្ន ដោយធ្វើឱ្យរ៉ាដានេះអាចចាប់យន្តហោះបំបាំងកាយបាន។
សូមបញ្ជាក់ដែរថាកាលពីប៉ុន្មានថ្ងៃមុននេះវិញ ប្រទេសឥណ្ឌាក៏ត្រូវបានសហរដ្ឋអាមេរិកធ្វើការរិះគន់ខ្លាំងៗផងដែរ ចំពោះការប្រើប្រាស់មីស៊ីលបាញ់កម្ទេចផ្កាយរណប ចេញពីយន្តហោះ។សហរដ្ឋអាមេរិកថែមទាំងបានព្រមានមិនឲ្យប្រទេសដទៃៗទៀត យកគំរូតាមឥណ្ឌានោះថែមទៀតផង ព្រោះវាត្រូវបានចាត់ទុកជារឿងគ្រោះថ្នាក់ ចំពោះសន្តិសុខនៅទីអវកាស ខណៈដែលសហរដ្ឋអាមេរិកទើបសម្រេចឲ្យមានការបង្កើតកងទ័ពអវកាស ដើម្បីការពារសន្តិសុខ៕
