ភ្នំពេញ ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនកាលពីថ្ងៃទី៣១ ខែមីនា ឆ្នាំ២០១៩ បានថ្លែងបង្ហើបឲ្យដឹងថា រាជធានីភ្នំពេញនឹងមានស្ពានមិត្តភាពកម្ពុជា-កូរ៉េ តែមិនទាន់ប្រាប់ទីតាំងនិងពេលវេលាសាងសង់ឡើយ។
ពេលចុះត្រួតពិនិត្យស្ពានជ្រោយចង្វារទី១ (ស្ពានមិត្តភាពកម្ពុជា-ជប៉ុន) ដើម្បីត្រៀមដាក់ឱ្យដំណើរការនៅថ្ងៃទី៣មេសាខាងមុខនេះ លោក ស៊ុន ចាន់ថុល ថ្លែងទៅកាន់អ្នកសារព័ត៌មានយ៉ាងដូច្នេះថា៖ «សម្តេចបានស្នើសុំឱ្យមិត្តកូរ៉េជួយសាងសង់ស្ពានមួយដែរនៅភ្នំពេញ ដោយសារមានស្ពានចិន ស្ពានជប៉ុន ប៉ុន្តែមិនទាន់ឃើញមានស្ពានមិត្តភាពកម្ពុជា-កូរ៉េ នៅភ្នំពេញ។
អ៊ីចឹង! យើងត្រៀម បន្តិចទៀត ក្រែងលោមានស្ពានមិត្តភាពកម្ពុជា-កូរ៉េ»។ទាក់ទងរឿងជំនួយសង់ស្ពាន់ផ្លូវនេះលោកទេសរដ្ឋមន្ត្រីស៊ុនចាន់ថុលបន្ថែមថា បើមានប្រទេសណាផ្សេងទៀត ចង់ជួយសាងសង់ស្ពាននៅកម្ពុជាដែរនោះ គឺរាជរដ្ឋាភិបាលស្វាគមន៍ទាំងអស់ ដោយពុំមានការរើសអើងឡើយ ឱ្យតែគោរពអធិបតេយ្យភាពកម្ពុជា។
សូមរំលឹកថាកាលពីពីថ្ងៃទី១៤ ដល់ថ្ងៃទី១៦ ខែមីនា ឆ្នាំ២០១៩កន្លងទៅនេះលោក ប្រធានាធិបតីនៃសាធារណរដ្ឋកូរ៉េ លោក មួន ចេអ៊ីន បានមកបំពេញទស្សនកិច្ចជាផ្លូវរដ្ឋ នៅកម្ពុជាដែលក្នុងនោះបានផ្តល់ថវិការ៧០០លានដុល្លារសម្រាប់ជួយកិច្ចអភិវឌ្ឍន៍រយះពេល៣ឆ្នាំ ។ នៅមុនដំណើរទស្សនកិច្ចនេះ មានការរំពឹងថា ភាគីទាំង២កម្ពុជាកូរ៉ែ នឹងចុះកិច្ចព្រមព្រៀងលើគម្រោងសាងសង់ស្ពានឆ្លងកាត់ទន្លេមេគង្គភ្ជាប់ពី ពីតំបន់ជ្រោយចង្វារ ទៅកាន់តំបន់ស្វាយជ្រំអរីយ៍ក្សត្រ។ ប៉ុន្តែភាគីទាំង២ មិនបានចុះកិច្ចព្រមព្រៀងណាមួយដែលពាក់ព័ន្ធនឹងការសាងសង់ស្ពាននេះឡើយ។
គម្រោងសាងសង់ស្ពានជ្រោយចង្វា-ស្វាយជ្រុំនេះ កន្លងមកត្រូវបានភាគីចិន សិក្សាចប់ម្តងរួចហើយ ប៉ុន្តែបច្ចុប្បន្នគម្រោងនេះ គឺស្ថិតក្រោមការសិក្សាគម្រោងរបស់ភាគីកូរ៉េវិញម្តង៕
