រាជធានីភ្នំពេញ៖ លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ (អ.ប.ព) នៅថ្ងៃព្រហស្បតិ៍ទី២៨មិនានេះបានឲ្យដឺងថា ករណីលោក គឹម រស្មី អ.ប.ព បានស៊ើបអង្កេតជិតចប់រួចរាល់ហើយនៅសល់តែចំនួន២ក្រុមទៀតប៉ុណ្ណោះ ខណៈដែលបីក្រុមបានបញ្ចប់ការស៊ើបអង្កេតហើយបញ្ជូន លទ្ធផលមក អ.ប.ព ដែលគ្រោងនឹងបញ្ចប់នៅបំណាច់ខែមេសាខាងមុខនេះ។ ចំណែកករណីលោកស្នងការរង ស្រេង សុខា ក្រុមការងារស៊ើបអង្កេតអាចនឹងធ្វើការសន្និដ្ឋានដំណាច់ខែមេសានេះដូចគ្នា ។
ការប្រកាសរបស់លោកទេសរដ្ឋមន្ត្រីឱម យ៉ិនទៀង ធ្វើនៅក្នុងកិច្ចប្រជុំក្រុមប្រឹក្សាជាតិប្រឆាំងអំពើពុករលួយលើកទី៤៤ អាណត្តិទី២ នៅក្រុមប្រឹក្សាជាតិប្រឆាំងអំពើពុករលួយ ដែលប្រព្រឹត្តទៅ កាលពីថ្ងៃទី២៧ ខែមីនា ឆ្នាំ២០១៩ នៅទីស្តីការ អ.ប.ព ក្រោមអធិបតីភាពលោក តុប សំ ប្រធានក្រុមប្រឹក្សាជាតិប្រឆាំងអំពើពុករលួយ ។
សេចក្តីប្រកាសពតិមានក៏នាឲ្យដឹងថាពាក្យប្ដឹងក្នុងខែមីនា ២៦ពាក្យ អានាមិក ៩ពាក្យស្មើ ១០% នៃពាក្យប្ដឹងជាពាក្យប្ដឹង ឬយកប្រាក់បញ្ចូលក្របខណ្ឌពីជាង ១ពាន់ដុល្លារអាមេរិក ដល់ជិត ១ម៉ឺនដុល្លារអាមេរិក ។
អ.ប.ព បានឆ្លើយតបទៅម្ចាស់បណ្ដឹង ២១ករណីថា មិនមានតម្រុយនៃអំពើពុករលួយ ឬអាចជាបទល្មើសផ្សេងដែលមិនស្ថិតនៅក្នុងសមត្ថកិច្ចរបស់ អ.ប.ព ទេ។ មានបុត្រ ៧ករណីដែល អ.ប.ព បានស្នើសុំឲ្យសាមីស្ថាប័នអង្គភាពនិងបុគ្គលធ្វើការបំភ្លឺបានបើកបន្ទប់ស្តាប់ចម្លើយ ២៣លើក។
ករណីលោក គឹម រស្មី លោកប្រធានមជ្ឈមណ្ឌលពុករលួយ និងលោកស្រី
ប្រធាននាយកដ្ឋានស៊ើបអង្កេតនិងចារកម្មបានជម្រាបជូនអង្គប្រជុំនូវលទ្ធផលដែលក្រុមស៊ើបអង្កេត ចំនួន ៣ក្រុម បានបំពេញហើយ នៅតែក្រុមទី៤ និងក្រុមទី៦ ដែលអាចបញ្ចប់នៅបំណាច់ខែមេសា ឆ្នាំ២០១៩។ ករណីលោកស្នងការរងឧត្តមសេនីយ៍ត្រី ស្រេង សុខា ក្រុមការងារស៊ើបអង្កេតអាចនឹងធ្វើការសន្និដ្ឋាននៅដំណាច់ខែមេសា ឆ្នាំ២០១៩។
នាយកដ្ឋានអប់រំបង្ការនិងទប់ស្កាត់បានរៀបចំគម្រោងរបស់ អ.ប.ព សម្រាប់ប្រជុំសិក្ខាសាលាជាមួយក្រសួងអប់រំយុវជននិងកីឡា ឆ្នាំ២០១៩ ដោះស្រាយបាតុភាពពាក្យប្ដឹងនៅតាមគ្រឹះស្ថានសិក្សានិងការផ្សព្វផ្សាយជាទូទៅការកែទម្រង់ថ្មីរបស់ក្រសួងអប់រំយុវជននិងកីឡា ។
លោក តុប សំ បានថ្លែងថា ក្រុមប្រឹក្សាជាតិប្រឆាំងអំពើពុករលួយគាំទ្ររាល់ចំណាត់ការរបស់ អ.ប.ព ក្នុងការពង្រឹងការអនុវត្តច្បាប់ការបង្ការទប់ស្កាត់ និងបង្ក្រាបអំពើពុករលួយ ដើម្បីពង្រឹងអភិបាលកិច្ចល្អ។ ក្រុមប្រឹក្សាជាតិប្រឆាំងអំពើពុករលួយ គាំទ្រពេញទំហឹងនូវការជំរុញការងារ អ.ប.ព នៅតាមចំណុចដែលត្រូវខិតខំប្រឹងប្រែងថែមទៀតនៃការអនុវត្តផែនការសកម្មភាព របស់ជាតិក្នុងយុទ្ធសាស្ត្រប្រឆាំងការសំអាតប្រាក់ និងហិរញ្ញប្បទានភេរវកម្ម ឆ្នាំ២០១៩ -២០២៣ ដែលបានដាក់សម្ភោធ កាលពីថ្ងៃទី១៤ ខែមីនា ឆ្នាំ២០១៩ ។
