ក្រចេះ ៖ នៅរសៀលថ្ងៃទី ២៧ ខែមីនា ឆ្នាំ២០១៩ ឯកឧត្តម វ៉ា ថន អភិបាលនៃគណៈអភិបាលខេត្តក្រចេះ អញ្ជើញក្នុងពិធីបូកសរុបលទ្ធផលការងារត្រួតពិនិត្យគ្រឿងញៀនឆ្នាំ២០១៨ និងផ្សព្វផ្សាយផែនការយុទ្ធនាការប្រយុទ្ធប្រឆាំងគ្រឿងញៀខុសច្បាប់លើកទី៤ ឆ្នាំ២០១៩ ។ ដោយមានការអញ្ជើញចូលរួមពីឯកឧត្តម ហឿ ស៊ីយ៉ែម អភិបាលរងខេត្ត ឯកឧត្តមឧត្តមសេនីយ៍ទោ លន់ សុផាត ស្នងការនគរបាលខេត្ត និងជាប្រធានធចិន្ត្រៃយ៍លេខាធិការដ្ឋានប្រយុទ្ធប្រឆាំងគ្រឿងញៀនខុសច្បាប់ និងលោកជំទាវ តំណាងស្ថាប័ន អង្គភាព ខេត្ត ស្រុក ឃុំ សង្កាត់ ប្រមាណជាង៤០០នាក់ ។
ក្នុងពិធីឯកឧត្តមឧត្តមសេនីយ៍ទោ លន់ សុផាត បានបញ្ជាក់ពីការងារស្តានីតិសម្បទា ដោយខេត្តក្រចេះមានមណ្ឌលសម្រាប់ផ្តាច់សារធាតុញៀនចំនួន០១កន្លែង ដែលមានឈ្មោះ “ មជ្ឈបណ្ឌលអប់រំ ព្យាបាល បន្សាប និងស្តានីតិសម្បាទាអ្នកញៀនគ្រឿងញៀន ក្រចេះឱកាសថ្មី ” ដែលមានទីតាំងស្ថិតនៅក្នុងបរិវេណ ការិយាល័យការពារ និងអន្តរាគមន៍ នៃស្នងការដ្ឋាននគរបាលខេត្តក្រចេះ ។ ក្នុងនោះស្ថិតិជនញៀនគ្រឿងញៀនប្រចាំឆ្នាំ ២០១៨ ដែលបានមកទទួលសេវាអប់រំ ព្យាបាល បន្សាប និងស្តារនីតិសម្បទា នៅក្នុងមជ្ឈមណ្ឌល រួមមាន ៖ អ្នកជាប់សារធាតុញៀន ៨៣នាក់ ស្រី០១ នាក់ សមាហរណកម្មចេញពីមណ្ឌល ៧៥ នាក់ ស្រី ០១ នាក់ និងជនកំពុងសម្រាកព្យាបាលក្នុងមណ្ឌល ៣៤នាកប្រុស ។ ដោយឡែកចាប់តាំងពីមណ្ឌលបើកទទួលយកអ្នកញៀនគ្រឿងញៀនមកធ្វើការព្យាបាល បន្សាប រហូតមកដល់ថ្ងៃនេះ ទទួលបានអ្នកញៀនគ្រឿងញៀន ១៦២ នាក់ និងការធ្វើសមាហរណកម្មចំនួន ១២៨នាក់ ។ ហើយការងារសហប្រតិបត្តិការអន្តរជាតិ ក្នុងឆ្នាំ២០១៨នេះ ក៏ដូចជាបណ្តាឆ្នាំកន្លងមក តើងបានលើកកម្ពសើស្មារតីសហប្រតិបត្តិការក្នុងការបង្ការទប់ស្កាត់ និងបង្ក្រាបសកម្មភាពជួញដូរគ្រឿងញៀនឆ្លងដែនខុសច្បាប់ ធ្វើឲ្យនៅតាមប្រំដែនរបស់ខេត្តទាំង២ គឺខេត្តក្រចេះ និងខេត្តប៊ិញ ភឿក ប្រទេសវៀណាម ពុំមានសកម្មភាពបទល្មើសគ្រឿងញៀនកើតឡើងទេ ។
មានប្រសាសន៍កោតសរសើរ និងវាយតម្លៃខ្ពស់ ពីឯកឧត្តម វ៉ា ថន អភិបាលខេត្ត ចំពោះឯកឧត្ដម លោកជំទាវ លោក លោកស្រី ដែលជាប្រធានស្ថាប័ន ពាក់ព័ន្ធកងកំលាំងអនុវត្តច្បាប់ គ្រប់ប្រភេទ មន្ត្រីរាជការគ្រប់លំដាប់ថ្នាក់ និងអង្គការសង្គមស៊ីវិលដៃគូរអភិវឌ្ឍន៏ និងប្រទេសជាមិត្ត ព្រមទាំងអ្នកពាក់ព័ន្ធ ទាំងអស់ ដែលបានចូលរួមចំណែកយ៉ាងសកម្ម និងផុលផុស ក្នុងការរួម ចំណែកប្រយុទ្ធប្រឆាំង បង្កាទប់ស្កាត់បញ្ហាគ្រឿងញៀននៅកម្ពុជា ។ និងត្រូវបន្តរួមគ្នាឲ្យបានសកម្មក្នុងការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៤ របស់រាជរដ្ឋាភិបាលកម្ពុជាសម្រាប់ឆ្នាំ២០១៩ ដើម្បីរួមចំណែកក្នុងលើកកម្ពស់សុខុមាលភាពប្រជាពលរដ្ឋ ថែរក្សា និងការពារសន្តិសុខ សណ្តាប់ធ្នាប់សាធារណៈបង្កបរិយាកាសល្អសម្រាប់ការអនុវត្តយុទ្ធសាស្ត្រ ចតុកោណដំណាក់កាលទី៤ នៃរាជរដ្ឋាភិបាលថ្មី ឱ្យបានជោគជ័យ ៕ ជាពិសេស អាជ្ញាធរ ភូមិ-ឃុំ-សង្កាត់ ត្រូវពង្រឹងពិនិត្យតាមដានពីសកម្មភាពប្រជាពលរដ្ឋរបស់ខ្លួន និងរាយការណ៍ពីអំពីអ្នកញៀនគ្រឿងញៀន ដល់ថ្នាក់លើដើម្បីបញ្ជូនយកទៅធ្វើការផ្តាច់ និងបន្សាបនៅមជ្ឈមណ្ឌល ហើយអាណាព្យាបាលត្រូវចូលរួមសហការក្នុងការបញ្ជូនសមាជិករបស់ខ្លួនឲ្យមកព្យាបាល និងបន្សាបផ្តាច់សារធាតុញៀនចេញពីខ្លួន ៕
ដោយ កិះខន
