ខេត្តព្រៃវែង៖ លោក អូន ស៊ីណាត ប្រធានរដ្ឋបាលជលផលខេត្តព្រៃវែង បានចេញគោលការណ៍ណែនាំ នាយសង្កាត់រដ្ឋបាលជលផល និងមន្ត្រី ក្រោមឳវាតទូទាំងខេត្តបានចាត់វិធានការណ៍យ៉ាងម៉ឺងម៉ាត់ លើការងារបង្ក្រាប និងទប់ស្កាត់បទល្មើសជលផលនារដូវបិទនេសាទឲ្យមានប្រសិទ្ធិភាពបំផុត ។
អនុវត្តទៅតមគោលការណ៍ណែនាំប្រធានរដ្ឋបាលជលផលខេត្ត លោកហ៊ុន សាវី នាយសង្កាត់រដ្ឋបាលជលផលស្រុកពាមរក៏ បានស្នើសុំពីអភិបាលនៃគណៈអភិបាលពាមរក៏ ដើម្បីចុះប្រតិបត្តិការណ៍បង្ក្រាបបទល្មើស ដោយមានការសហការជាមួយលោក ខុន ភី ប្រធានការិយាល័យបរិស្ថានស្រុក និងលោក សែន មុនី និងលោក ជា សំណាង អនុប្រធានគណកម្មការផ្សារ អ្នកលឿង ដែលចាំបាច់ត្រូវចេញសេចក្ដីណែនាំហាមប្រាមមិនឲ្យអាជីវករក្នុងផ្សារធ្វើការលក់ដូរនូវឧបករណ៍នេសាទនារដូវបិទនេសាទនេះមួយរយៈសិន គឺជាវិធានការចាំបាច់បំផុត។
នេះជាលើកទី១ ហើយដែលអង្គភាពជលផលខេត្តព្រៃវែងមានវិធានការក្ដៅបែបនេះ ហើយរហូតមកដល់ពេលនេះនៅមិនទាន់ដឹងទេថា “ក្រុមអាជីវករលក់ដូរក្នុងផ្សារបានអនុវត្តគោលការនេះបានកម្រិតណានៅឡើយទេ”។
លោកប្រធានរដ្ឋបាលជលផលខេត្ត បានសង្កត់ធ្ងន់ថាជាការចាំបាច់ ត្រូវតែមានការចូលរួមសហការគ្នាពីសំណាក់អាជីវករលក់ដូរនៅផ្សារ គឺត្រូវតែបញ្ឈប់ជាបន្ទាន់នូវរាល់ការលក់ឧបករណ៍នេសាទ នារដូវបិទនេសាទនេះ បើពុំដូច្នេះទេ ទាំងអ្នកលក់ និងអ្នកប្រព្រឹត្តបទល្មើស នឹងត្រូវផ្ដន្ទាទោសដូចគ្នាផងដែរ។
គួរបញ្ជាក់ផងដែរថា វិធានការហាមឃាត់ចំពោះមុខនេះគឺ មានលូស្បៃមុង សម្រាប់ចាប់កូនត្រី អាជីវករត្រូវតែបញ្ឈប់លក់ជាបន្ទាន់ បើពុំដូច្នោះទេ នឹងត្រូវប្រឈមចំពោះការផ្តន្ទាទោស ដូចទៅនឹងអ្នកប្រព្រឹត្តបទល្មើសនេសាទផ្ទាល់ផងដែរ៕
