ភ្នំពេញ ៖ នៅរសៀលថ្ងៃទី២៦ ខែមីនា ឆ្នាំ២០១៩លោក ថោង សារ៉ាត់ សេដ្ឋីកូនកាត់ខ្មែរវៀតណាមនិងអង្គរក្ស៤នាក់ ត្រូវបានសាលាដំបូងរាជធានីភ្នំពេញ នេះ ប្រកាសសាលក្រមផ្តន្ទាទោសដាក់ពន្ធនាគារអស់មួយជីវិតក្នុងរឿងបាញ់សម្លាប់ឧកញ៉ាអ៊ឹង ម៉េងជឺ ថៅកែស៊ីម៉ង់សញ្ញាត្បូងកាលវេលាម៉ោង៧៖១៨នាទីយប់ ថ្ងៃទី២២ ខែវិច្ឆិកា ឆ្នាំ២០១៤ ។
ទណ្ឌឹតទាំងនោះរួមមានឈ្មោះ ទី១៖ លោក ថោង សារ៉ាត់ ជាមេក្លោង, ទី២៖ឈ្មោះ ស៊ាង វាសនា, ទី៣៖ឈ្មោះ មាស សម្បត្តិ, ទី៤៖ឈ្មោះ កុយ ចាន់ថុល និងទី៥៖ឈ្មោះ ឈុំ ចិត្រា។
ហេតុការណ៍បាញ់សម្លាប់លោកឧកញ៉ា អ៉ឹង ម៉េង ជឺ ដ៏កក្រើករាជធានីភ្នំពេញកាលនោះគឺ បានកើតឡើង ខណៈ លោកឧកញ៉ាចុះពីរថយន្ត ឡិចស៊ីស៥៧០ ដើម្បីដើរទៅទិញផ្លែឈើនៅមុខហាងលក់ផ្លែឈើ ឡោ តិចសេង ស្ថិតនៅផ្លូវលេខ២៧៤ សង្កាត់ទួលស្វាយព្រៃទី២ ខណ្ឌចំការមន រាជធានីភ្នំពេញ។គេមិនដឹងថាតើឧកញ៉ាថោងសារ៉ាប្តឹងឧទ្ធរណ៍ដែរឬអត់នោះទេ?។
ក្រោយពីប្រកាសសាលក្រមលោកស្រី ទាវ ធីតា Teav Thida ភរិយាលោកថោង សារ៉ាត់ និងក្រុមគ្រួសារអង្គរក្សរបស់លោកថោងសារ៉ាតបានស្រែកទ្រហោយំរាប់ពីអង្គហេតុថាពេលកើតហេតុប្តីគាត់នៅមូលដ្ឋាននិងថាប្តីគាត់និងឧកញ៉ាអ៊ឹងម៉េងជឺមិនដែលស្គាល់គ្នាទេហើយបានចាត់ទុកថាតុលាការមិនយុត្តិធមិនិងបានសុំសម្ដេចតេជោ ជួយរកយុត្តិធម៌ជូនពួកគាត់ដែលជាកូនចៅផង។
សូមបញ្ជាក់ដែរថា មរណៈភាពរបស់លោកឧកញ៉ាអ៊ឹង ម៉េងជឺកាលនោះ បានធ្វើឱ្យលោកខកខានក្នុងការចូលឆ្លើយបំភ្លឺនៅចំពោះមុខលោកចៅក្រមស៊ើបសួរ ពាក់ព័ន្ធសំណុំរឿងទំនាស់ដីធ្លីប្រមាណ១០ហិតានៅម្តុំបឹងប៉ាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ជាមួយឧកញ៉ាម្នាក់ទៀត ។
លោកឧកញ៉ាអ៊ឹង ម៉េងជឺ ត្រូវបានលោកកែវ មុនី ចៅក្រមស៊ើបសួរសាលាដំបូងរាជធានីភ្នំពេញកោះហៅឲ្យចូលខ្លួននៅថ្ងៃទី៨ ធ្នូ ២០១៤ ដើម្បីសាកសួរលើសំណុំរឿងព្រហ្មទណ្ឌ បន្ទាប់ពីតំណាងអយ្យការអមសាលាដំបូងរាជធានីភ្នំពេញ បានធ្វើការចោទប្រកាន់លោកឧកញ៉ា អ៊ឹង ម៉េងជឺ រួចហើយ ដែលការចោទប្រកាន់មានពីរបទល្មើស ។ ទី១-តាមបទប្បញ្ញត្តិ មាត្រា ៥២៣ ពីបទធ្វើឲ្យអស់ជំនឿលើសេចក្តីទុកចិត្តតុលាការ និង ទី២-តាមបទប្បញ្ញត្តិ មាត្រា ៥២៤ ពីបទប្តឹងភូតកុហកទៅអាជ្ញាធរតុលាការ ។
ប្រភពបន្តថា បណ្តឹងព្រហ្មទណ្ឌនោះ គឺលោកឧកញ៉ាអ៊ឹង ម៉េងជឺ ជាចុងបណ្តឹងពាក់ព័ន្ធទំនាស់រឿងដីទំហំប្រមាណ១០ហិកតា នៅបឹងប៉ាយ៉ាប សង្កាត់ភ្នំពេញថ្មី ដែលដីនោះមានទឹកប្រាក់រាប់លានដុល្លារអាមេរិក និងមានដើមបណ្តឹងជាឧកញ៉ាម្នាក់ទៀត ។ ប៉ុន្តែរឿងនោះបានស្ងាត់ទៅវិញមិនដឹងថាជាយ៉ាងណានោះទេ?៕