ភ្នំពេញ ៖ ក្នុងពេលដែលប្រជាពលរដ្ឋ កម្ពុជាបាននិងកំពុងខ្វះខាតអគ្គិសនី និងទឹកប្រើប្រាស់ នៅរសៀលថ្ងៃទី២២មិនា២០១៩លោក ទី នរិន្ទរដ្ឋលេខាធិការក្រសួងរ៉ែ និងថាមពល បានប្រកាសថា ចាប់ពីឆ្នាំ២០២០តទៅ ក្រសួងរ៉ែ ព្រមទាំងភាគីពាក់ព័ន្ធមួយចំនួនទៀត នឹងមានវិធានការណ៍ដោះស្រាយ មិនធ្វើឲ្យខ្វះអគ្គិសនីប្រើប្រាស់ទៀតឡើយ។
ក្នុងសន្និសីទសារព័ត៌មាន ស្ដីពី បច្ចុប្បន្នភាព ផែនការថាមពលសាធារណៈ (អគ្គិសនី)នៅទីស្តីការគណៈរដ្ឋមន្ត្រី លោក ទី នរិន្ទ មានប្រសាសន៍ថា “ក្នុងនាមខ្ញុំក្រសួងរ៉ែ និងថាមពល ខ្ញុំសន្យានៅទីនេះហើយថា នៅឆ្នាំនេះ ឆ្នាំ២០២០ ហើយបន្ដទៀត មិនកើតទៀតទេ ព្រោះយើងរៀនសូត្រនៅថ្ងៃនេះ ពីគ្រោះរាំងស្ងួត” ។
លោក ទី នរិន្ទ បានបញ្ជាក់ថា ក្រុមការងារបច្ចេកទេស ផ្គត់ផ្គង់អគ្គិសនី របស់ប្រទេសតួកគី នឹងមកដល់កម្ពុជា នៅថ្ងៃទី២៣ មីនា ស្អែកនេះ ដើម្បីសិក្សាផ្លូវទឹក និងការប្រើប្រាស់អគ្គិសនី របស់ប្រជាជនខ្មែរ ដើម្បីនាំយកនាវាផលិតអគ្គិសនី ពីប្រទេសតួកគី ដែលអាចផលិតថាមពល២០០មេកាវ៉ាត់ មកផ្គត់ផ្គត់នៅទីក្រុងភ្នំពេញ ។
ឆ្លៀតឱកាសនោះ លោករដ្ឋលេខាធិការ បានលើកឡើងថា វារីអគ្គិសនី នៅខេត្តពោធិ៍សាត់ មានកម្លាំងថាមពល៨០មេកាវ៉ាត់ ដែលកំពុងស្ថិតក្នុងការចរចារ ក៏ប៉ុន្ដែការចរចារនេះសម្រេចបាន៩៥% ក្នុងការសាងសង់វារីអគ្គិសនី ដូច្នេះការសាងសង់ នឹងធ្វើឲ្យទាន់ពេលវេលា នៅឆ្នាំ២០២២ ខាងមុខ ។
កាលពីឆ្នាំ២០១៨ កម្ពុជាបានប្រើប្រាស់អគ្គិសនី សរុប៩៣០០លានគីឡូវ៉ាត់ម៉ោង ពោលគឺ២៥,៥លានគីឡូវ៉ាត់ម៉ោងក្នុង១ថ្ងៃ។ កំណើននៃការប្រើប្រាស់ កើនឡើងយ៉ាងគំហុក ចាប់ពីខែមករា និងខែកុម្ភៈកន្លងមក ដោយឈានដល់ ៣១លានគីឡូវ៉ាត់ម៉ោងក្នុង១ថ្ងៃ។
សូមរំលឹកថា តាមការព្យាករណ៍របស់ក្រសួងធនធានទឹក និងឧតុនិយម នៅអំឡុងខែ មីនា-មេសា-ឧសភា ឆ្នាំ២០១៩នេះ កម្ពុជាមានភាពក្តៅហួតហែងជាខ្លាំង ខុសប្លែកពីបណ្តាឆ្នាំមុនៗ ដែលនាំឲ្យមានគ្រោះរាំងស្ងួត ។ ក្នុងនោះសីតុណ្ហភាពឡើង ទៅដល់ក្នុងរង្វង់ ៤០អង្សាសេ៕
