ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានដាក់ចេញនូវវិធានការចំនួន៧ចំណុចសំខាន់ៗ សម្រាប់អនុវត្តក្នុងយុទ្ធនាការ ប្រយុទ្ធប្រឆាំងគ្រឿងញៀនខុសច្បាប់ លើកទី៤ រយៈពេល១ឆ្នាំ ចាប់ពីថ្ងៃទី០១ ខែមករា ដល់ថ្ងៃទី៣១ ខែធ្នូ ឆ្នាំ២០១៩។
បើតាមសារលិខិតកំណត់ផែនការរបស់សម្ដេចតេជោ ហ៊ុន សែន បានបែងចែកចាត់ការងារអនុវត្តផងដែរ រួមមាន៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ជាប្រធានយុទ្ធនាការ និងនាយឧត្តមសេនីយ៍ កែ គឹមយ៉ាន ឧបនាយករដ្ឋមន្ដ្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ជាអនុប្រធានយុទ្ធនាការ។
មានការកត់សម្គាល់ថាយន្តការបង្ក្រាបគ្រឿងញៀនដែលដាក់ចេញសម្រាប់ឆ្នាំ២០១៩នេះបានកើតឡើងក្រោយពីសម្ដេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ក្នុងឱកាសដែលសម្តេចអញ្ជើញជាអធិបតីភាពក្នុងពិធីបិទសន្និបាតបូកសរុបលទ្ឋផលការងារប្រចាំឆ្នាំ២០១៨ និងលើកទិសដៅការងារសម្រាប់អនុវត្ត ឆ្នាំ២០១៩នៅសាលារាជធានីភ្នំពេញ កាលពីរសៀលទី១៩ ខែមីនា ឆ្នាំ២០១៩បានបង្ហើបឲ្យដឹងថា៖ការបង្ក្រាបគ្រឿងញៀនមួយសំបុកធំនៅក្លឹបកំសាន្តរ៉ុក មានប៉ូលិសមួយចំនួនចូលទៅពាក់ព័ន្ធនៅក្នុងរឿងនេះដែរ ប៉ុន្តែទោះបីជាយ៉ាងណាក្តីសមត្ថកិច្ចបាននិងកំពុងស្រាវជ្រាវតាមចាប់ខ្លួនហើយ ។
សម្ដេចក្រឡាហោម ស ខេង បានមានប្រសាសន៍ថាការប្រយុទ្ធប្រឆាំងគ្រឿងញៀនគឺជាយុទ្ធសាស្ត្ររបស់កងកម្លាំងប្រដាប់អាវុធរបស់យើង ដែលយើងត្រូវប្រឹងប្រែងកាត់បន្ថយឲ្យបាននៅក្នុងឆ្នាំ២០១៩និងឆ្នាំ២០២០ និងនៅឆ្នាំបន្តទៀត ដោយហេតុថា មកដល់ពេលនេះមិនត្រឹមតែនៅរាជធានីភ្នំពេញទេ សូម្បីតែនៅតាមបណ្តាខេត្ត ការប្រើប្រាស់ ការជួញដូរគ្រឿងញៀនបាននិងកំពុងធ្វើសកម្មភាពយ៉ាងសកម្ម។
ជាក់ស្តែងយើងបានឃើញស្រាប់ហើយដូចជានៅក្លឹបកម្សាន្ត រ៉ុក ក្លឹបកម្សាន្តមួយទៀតនៅខេត្តសៀមរាបគឺសុទ្ធតែពាក់ព័ន្ធទៅនឹងគ្រឿងញៀន ហើយអ្នកដែលប្រើប្រាស់ទាំងនោះ ភាគច្រើនគឺជាស្រទាប់យុវជនដែលនេះជាការបំផ្លាញដល់ធនធានមនុស្សរបស់យើង ប៉ះពាល់ទៅដល់សង្គមជាតិយ៉ាងធ្ងន់ធ្ងរ ដោយពួកគេអាចក្លាយទៅជាចោរលួចចោរប្លន់ កំពុលទៅដល់សន្តិសុខសង្គមនិងខាតបង់ទ្រព្យសម្បត្តិ ក្នុង ការស្ដារនីតិសម្បទាយុវជនទាំងនេះមកវិញ។
សម្តេចបន្តថា ជាយុទ្ធសាស្ត្រនិងជាភារកិច្ចរបស់យើង យើងមិនទុកអោយគ្រឿងញៀន ត្រួតត្រាយើងទេ យើងត្រូវតែជាអ្នកត្រួតត្រាគ្រឿងញៀន កាត់បន្ថយនិងលប់បំបាត់ឲ្យបានលើបញ្ហាគ្រឿងញៀននេះ ។ដូច្នេះទេពាក់ព័ន្ធនឹងបញ្ហានេះសមត្ថកិច្ចរបស់យើងទាំងអស់ត្រូវតែខិតខំប្រឹងប្រែងធ្វើការងារនេះ ហើយសមត្ថកិច្ចរបស់យើង មិនត្រូវពាក់ព័ន្ធនៅក្នុងរឿងនេះជាដាច់ខាត។
គួររំលឹកផងដែរថា កាលពីវេលាម៉ោង១រំលងអធ្រាត្រ ឈានចូលថ្ងៃទី២៣ ខែកុម្ភៈ ឆ្នាំ២០១៩កន្លងមកនេះកម្លាំងប៉ូលីសជាច្រើននាក់ បានឆ្មក់ចូលឆែកឆេរទីតាំងក្នុងក្លឹបកម្សាន្តRock ក្នុងសង្កាត់ទន្លេបាសាក់ ខណ្ឌចំការមន ដោយបានឃាត់មនុស្សរាប់រយនាក់ និងដកហូតថ្នាំញៀនជាច្រើនប្រភេទ ជិត៥០គីឡូក្រាម ហើយក្រោយមកទៀត ពោលគឺកាលពីវេលាម៉ោងប្រមាណជា៦ល្ងាច ថ្ងៃទី១១ ខែមីនា លោកឧកញ៉ា គិត ធាង ម្ចាស់ក្លឹបកម្សាន្តរ៉ុករូបនេះ ត្រូវប៉ូលិសនាំខ្លួនពីគេហដ្ឋាន ដែលមានទីតាំងតាមបណ្ដោយផ្លូវ២៨៩ ស្ថិតក្នុងសង្កាត់បឹងកក់២ ខណ្ឌទួលគោក ទល់មុខទីបញ្ជាការដ្ឋានប៉េអឹមផ្ទៃប្រទេសបញ្ជូនទៅក្រសួងមហាផ្ទៃពាក់ព័ន្ធបទល្មើសជួញដូរគ្រឿងញៀនដ៏ពេញនិយមកណ្ដាលទីក្រុងភ្នំពេញ ។
ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ក្នុងឱកាសអញ្ជើញបើកសន្និបាត ស្តីពីលទ្ធផលការងារត្រួតពិនិត្យគ្រឿងញៀន ឆ្នាំ២០១៨ និងលើកទិសដៅអនុវត្តបន្ត ឆ្នាំ២០១៩ របស់អាជ្ញាធរជាតិប្រយុទ្ធប្រឆាំងគ្រឿងញៀន នាទីស្តីការក្រសួងមហាផ្ទៃ។នៅព្រឹកថ្ងៃទី២០ ខែមីនា ឆ្នាំ២០១៩ បានថ្លែងដោយការងឿងឆ្ងល់ថា ករណីបង្រាបគ្រឿងញៀនមួយចំនួន សមត្ថកិច្ចចាប់បានតែគ្រឿងញៀនទេ ឯមនុស្សវិញមិនដែលចាប់បានសោះឡើយ៖ «ករណីខ្លះចាប់បានតែគ្រឿងញៀន តែមនុស្សមិនដឹងនៅឯណា? ករណីខ្លះគ្រឿងញៀន ១០គីឡូក្រាម អត់ដឹងថារបស់អ្នកណា។ អញ្ចឹងបានថាក្នុងករណីស្រាវជ្រាវ វាមានបទល្មើសមានផលិត ចរាចរណ៍ ស្តុកទុក ចែកចាយ និងប្រើប្រាស់»។
ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានថ្លែងថា បទល្មើសដែលពាក់ព័ន្ធនឹងគ្រឿងញៀន កើតឡើងតាមរបៀប៥យ៉ាងគឺ ការផលិត ការចរាចរ ការស្តុកទុក ការចែកចាយ និងការប្រើប្រាស់។ លោកបានជំរុញឲ្យសមត្ថកិច្ចពាក់ព័ន្ធ ប្រើវិធីកំណត់បទល្មើសទាំង៥យ៉ាងនេះ ដើម្បីរកឲ្យឃើញច្បាស់ថា តើនរណាជាមេខ្លោងនៃការបង្កើតបទល្មើសគ្រឿងនោះ។ឧបនាយករដ្ឋមន្ត្រី កែ គឹមយ៉ាន បានបញ្ជាក់បន្ថែមថា «អញ្ចឹងករណីគ្រឿងញៀន ១០គីឡូក្រាម ផលិតនៅឯណា នៅក្នុងស្រុក ឬនាំចូលពីប្រទេសក្រៅ ចរាចរណ៍តាមផ្លូវណា មកដល់កន្លែងណា អ្នកណាអ្នកចាប់ ស្តុកទុកនៅកន្លែងណា ចែកចាយនៅកន្លែងណា ប្រើប្រាស់នៅកន្លែងណា ទៅរកអាប្រើប្រាស់ហ្នឹង….។ កាលណាមានករណីគ្រឿងញៀន ត្រូវប្រើប្រាស់៥ចំណុចហ្នឹង ដើម្បីស្រាវជ្រាវ បើមិនអញ្ចឹងវាបាត់ដាន»។លោក កែ គឹមយ៉ាន បានផ្តាំថា អ្នកដែលរកស៉ីទាក់ទងនឹងករណីគ្រឿងញៀន សូមប្រុងប្រៀបឲ្យហើយទៅ តែលោកមិនបង្ហើបថា នឹងធ្វើចំណាត់ការបែបណានោះទេ។
សូមបញ្ជាក់ដែរថា យោងតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀន បានឲ្យដឹងថា ក្នុងឆ្នាំ២០១៨កន្លងទៅ បទល្មើសគ្រឿងញៀនសរុប ដែលសមត្ថកិច្ចបង្ក្រាបបានមានចំនួន ៨.០០២ករណី ដោយឃាត់ខ្លួនជនជាប់ពាក់ព័ន្ធ ចំនួន១៦,២១៦នាក់ និងគ្រឿងញៀនជាងកន្លះតោន (គឺប្រមាណ ៥៣៦គីឡូក្រាម)៕