ខេត្តព្រះសីហនុ ៖ កាលពីថ្ងៃទី២០ ខែមីនា ឆ្នាំ២០១៩នេះ អាជ្ញាធររដ្ឋបាលព្រះសីហនុបាននិងកំពុងចាត់វិធានការក្តៅទៅលើម្ចាស់បើកធ្វើអាជីវកម្មម៉ូតូទឹក នៅតាមឆ្នេរអូរឈើទាល ។
អភិបាលក្រុងព្រះសីហនុ លោក អ៊ី សុខឡេង បានឲ្យដឹងថា រដ្ឋបាលក្រុង បានសហការជាមួយមន្ទីរទេសចរណ៍ មន្ទីរបរិស្ថាន និងមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តព្រះសីហនុ បានចុះចាប់ម៉ូតូទឹកចំនួន ៤គ្រឿង ដែលចរាចរណ៍នៅលើផ្ទៃសមុទ្រ បៃអូរឈើទាល ដែលជាតំបន់ហាមឃាត់ ដោយនាំយកមករក្សាទុកនៅសាលាក្រុង។
លោក អ៊ី សុខឡេង បញ្ជាក់ថា កន្លងមកម្ចាស់ម៉ូតូទឹក ដែលបានផ្តល់សេវាម៉ូតូទឹក សម្រសប់ឲ្យភ្ញៀវទេសចរជួលជិះកម្សាន្តក្បែរៗឆ្នេរសមុទ្រ ដែលជាទីតាំងមានភ្ញៀវទេសចរចុះងូតទឹកលេង គឺធ្លាប់បានបង្កគ្រោះថ្នាក់ជាញឹកញប់ដល់អ្នកចុះងូតទឹក និងធ្វើឲ្យបាត់បង់សណ្តាប់ធ្នាប់ នៅតាមឆ្នេរអូរឈើទាល។
ផ្តើមពីបញ្ហានេះ លោក អ៊ី សុខឡេង បញ្ជាក់ថាសាលាក្រុង មន្ទីរទេសចរណ៍ មន្ទីរបរិស្ថាន និងមន្ទីររៀបចំដែនដី នគរូបនីយកម្ម និងសំណង់ បានកំណត់ទីតាំងច្បាស់លាស់ថ្មី ដើម្បីឲ្យអាជីវករ ដែលជាម្ចាស់ម៉ូតូទឹក ឬប្រកបអាជីវកម្មផ្តល់សេវាជិះម៉ូតូទឹកដល់ភ្ញៀវជិះកម្សាន្ត ឲ្យទៅចតម៉ូតូទឹក ដើម្បីធ្វើអាជីវកម្ម នៅទីរាំងថ្មី ទល់មុខឆ្នេរអារីស្តុនជំនួសវិញ។
