ខេត្តសៀមរាប ៖ នៅក្នុងអាណាចក្រខេត្តសៀមរាបមានក្លឹបខារ៉ាអូខេមួយឈ្មោះអេសស៊ី «SC» ដែលជាប់សង្ស័យថាជាកន្លែងប្រើប្រាស់និងចែកចាយគ្រឿងញៀនពង្វក់យុវជនខ្មែរ។
ទោះបីយ៉ាងណាការបង្ក្រាបក្លឹបមួយនេះគឺទុករហូតដល់យប់ថ្ងៃទី ១៦ ខែមីនា ឆ្នាំ២០១៩ទើបមានការបើកប្រតិបត្តិការចុះបង្ក្រាបគ្រឿងញៀន ក្នុងទីតាំងក្លឹប ខារ៉ាអូខេមួយកន្លែង យីហោអេសស៊ី «SC»ដែលមានទីតាំង ស្ថិតនៅសង្កាត់ស្លក្រាម ក្រុងសៀមរាប ខេត្តសៀមរាប ដោយឃាត់បានមនុស្ស ៣០នាក់ ។
មូលហេតុត្រុវបាន លោកឧត្តមសេនីយ៍ត្រី អ៊ុំ អមរ៉ា ស្នងការរងទទួលផែនប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តសៀមរាប បានប្រាប់កាសែតឲ្យដឹងថា ប្រតិបត្តិការនេះធ្វើឡើងដោយអនុវត្តតាមបទបញ្ជារបស់ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួង មហាផ្ទៃ និងនាយឧត្តម សេនីយ៍ នេត សាវឿន អគ្គស្នងការនគរបាលជាតិ នាយឧត្តមសេ នីយ៍ ម៉ក់ ជីតូ អគ្គស្នងការរងនគរបាលជាតិ ។
បន្ថែមលើនេះទៀតក្នុងការអនុវត្តជាក់ស្តែងជាក់ត្រូវមានការបញ្ជាពីលោក ទៀ សីហា អភិបាលខេត្តសៀមរាប និងជាប្រធានគណៈបញ្ជាការឯកភាពខេត្ត, លោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាប និងស្ថិតក្រោមការសម្របសម្រួលពី លោក ថេង សំណាង ព្រះរាជអាជ្ញារង អមសាលាដំបូងខេត្តថែមទៀត ។
មាន ន័យថាការបង្ក្រាបបទល្មើសមួយគឺត្រូវមានភ្លើងខឿវពីមេជាន់ខ្ពស់ទើបហ៊ានបង្ក្រាបបោះទោះបីច្បាប់បើកច្រកឲ្យធ្វើក៏ដោយព្រោះវាខ្លាចដូចសម្តេចក្រឡាហោមសខេងថាមានសមត្តកិច្ចចូលដៃជាមួយក្លឹបរ៉ុក។
ការបង្ក្រាបទីតាំងខារ៉ាអូខេ SC ដែលសង្ស័យថាប្រើប្រាសគ្រឿងញៀននេះកម្លាំងជំនាញ ឃាត់ខ្លួនបានមនុស្ស៣០នាក់ (ស្រី០៧នាក់) ដកហូតវត្ថុតាង ថ្នាំញៀនប្រភេទម៉េតំហ្វេតាមីន ២១កញ្ចប់, ថ្នាំញៀន អិចស្តាស៊ី៩គ្រាប់ និងសម្ភារសម្រាប់ប្រើប្រាស់គ្រឿងញៀនមួយចំនួន។ បច្ចុប្បន្នកម្លាំងជំនាញកំពុងកសាងសំណុំរឿង ដើម្បីបញ្ជូនទៅកាន់សាលាដំបូងខេត្តសៀមរាប ចាត់ការបន្ដតាមនីតិវិធី៕
