សៀមរាប ៖ ប្រទេសនិងប្រជាជនជប៉ុននាពេលកន្លងមកធ្លាប់តែបន្សល់នូកេរ្តិ៍ឈ្មោះល្អសម្រាប់ប្រជាជននិងប្រទេសកម្ពុជាដូចជាកសាងសាលរៀននិងហេដ្ឋារចនាសម្ព័នផ្សេងៗពិសេសគឺវត្តមានលោកស៊ូស្ហីអាកាស៊ីប្រមុខអ៊ុនតាក់ដឹកនាំការរៀបចំបោះឆ្នោតសកលលើកទី១ឆ្នាំ១៩៩៣នៅស្រុកខ្មែរ។
តែថ្មីៗនេះតាមរយៈការប្រព្រឹត្តឧក្រឹដ្ឋកម្មបង្កឡើងដោយជនជាតិជប៉ុន៣នាក់ចាប់បាន២នាក់ដោយចាក់និងអារករសម្លាប់អ្នកបើកឡានតាក់ស៊ីដើម្បីបន្លន់ឡាននៅលើកំណាត់ផ្លូវជាតិលេខ៦ ត្រង់ចំណុចជញ្ជីងថ្លឹងរថយន្ត ស្ថិតក្នុងទឹកដីភូមិគោកដូង ឃុំពួក ស្រុកពួក ខេត្តសៀមរាប បានបង្កក្តីអាម៉ាសបង្កភាពតក់ស្លុតដល់ជនជាតិខ្មែរក៏ដូចជប៉ុនផ្សេងទៀតដែលស្រលាញ់តែអំពើល្អនៅស្រុកខ្មែរ។
ដើម្បីជួយលុបលាងក្តីអាមាស ចំពោះកំហុសឆ្គងធ្ងន់ធ្ងររបស់បុគ្គលពីរនាក់ជាជនរួមជាតិជប៉ុននៅស្រុកខ្មែរនេះថ្មីៗនេះគឺបានឃើញ ជនជាតិជប៉ុនផ្សេងទៀតបានចេញសុំទោស និងខ្លះទៀតបានរៃអង្គាសប្រាក់បរិច្ចាក..!ដល់ការស្លាប់របស់បុរសអ្នករត់តាក់ស៊ីដែល បានបន្សល់ទុកនូវភរិយា និង កូនៗចំនួន ៤ នាក់ឲ្យកំព្រាឪពុក។
ដើម្បីជួយដល់គ្រួសារបុរសអ្នករត់តាក់ស៊ីនេះដែរ ការរៃអង្គាសមួយបានធ្វើឡើងតាមរយៈវិបសាយមួយឈ្មោះហ្គោហ្វាន់មី( GoFundMe )ដែលផ្ដួចផ្ដើមដោយគណនីមួយឈ្មោះថា Michael Hartzsch។
គោលដៅនៃការរៃអង្គាសគឺគេបានកំណត់ត្រឹម ២ ពាន់ដុល្លារ ដែលបច្ចុប្បន្ននេះគឺមានអ្នកបរិច្ចាគបានចំនួន ១ ៥៤០ ដុល្លារហើយ ដោយទទួលបានពីអ្នកបរិច្ចាគចំនួន ៤២ នាក់។ ក្នុងចំណោមអ្នកដែលបានបរិច្ចាគ គេសង្កេតឃើញថាមានភាពច្រើនគឺជាជនជាតិជប៉ុនផ្ទាល់តែម្ដង រួមនឹងពលរដ្ឋខ្មែរមួយចំនួនផងដែរ។
ដោយឡែកជនជាតិជប៉ុននៅស្រុកខ្មែរលោក កុអ៊ិជិ តាគូម៉ា បានឲ្យកាសែតដឹងថា ក្នុងនាមជនជាតិជប៉ុន លោកសូមចូលរួមរំលែកទុក្ខនៃក្រុមគ្រួសារជនរងគ្រោះ ។លោក កុអ៊ិជិ តាគូម៉ា បន្ដថា «ខ្ញុំមានសេចក្ដីរន្ធត់ និងឈឺចាប់បំផុតចំពោះហេតុការណ៍នេះ។ ខ្ញុំមានសេចក្ដីព្រួយបារម្ភជាខ្លាំងចំពោះទង្វើរបស់ក្រុមមួយក្ដាប់តូច ដែលជាជនជាតិជប៉ុន ដូចពួកយើងដឹងនេះ ដែលបានធ្វើឲ្យប៉ះពាល់ដល់ជំនឿចិត្ត និងមិត្តភាពដ៏រឹងមាំអស្ចារ្យរបស់ប្រទេសជប៉ុន និងកម្ពុជា។ អ្វីៗដែលយើងខ្ញុំទាំងអស់គ្នាអាចធ្វើបាននាពេលនេះ គឺការឧបត្ថម្ភជាថវិកាមួយចំនួនដល់ការសិក្សារបស់កូនៗនៃជនរងគ្រោះ ដើម្បីឲ្យពួកគេបានបន្តការសិក្សា និងកសាងអនាគតដ៏ភ្លឺស្វាងរបស់ពួកគេ»។
ដោយហេតុនេះ ប្រជាជនជប៉ុន កំពុងរស់នៅកម្ពុជា ក៏បានផ្ដួចផ្ដើមបង្កើតមូលនិធិសម្រាប់ជួយឧបត្ថម្ភដល់គ្រួសារជនរងគ្រោះ ដោយចាប់ផ្ដើមប្រមូលថវិកាចាប់ពីថ្ងៃទី១៩ រហូតដល់ថ្ងៃទី៣១ ខែមីនា ឆ្នាំ២០១៩។ តែគិតត្រឹមព្រឹកថ្ងៃទី២០ ខែមីនានេះ មានប្រជាជនជប៉ុនប្រមាណជាង ១៥០នាក់ហើយ បានចូលរួមបរិច្ចាកថវិកាផ្ទាល់ខ្លួន ហើយគេរំពឹងថា នឹងមានប្រជាជនជប៉ុនជាច្រើនទៀត នឹងចូលរួមមូលនិធិនេះ មុនថ្ងៃយកទៅប្រគល់ជូនគ្រួសារជនរងគ្រោះ នាខែមេសាខាងមុខ។
