រតនគិរី៖ នៅរសៀលថ្ងៃទី១៩ ខែមីនាឆ្នាំ២០១៩នេះ នាយឧត្តមសេនីយ៍ ដាំ វុទ្ធី អគ្គស្នងការរងតំណាងនាយឧត្តមសេនីយ៍ស នេត សាវឿនអគ្គស្នងការនគរបាលជាតិបានអញ្ជើញប្រគល់ភារកិច្ចដល់នាយនគរបាលថ្នាក់ឧត្តមសេនីយ៍ នៃគណៈបញ្ជាការនគរបាលជាតិប្រចាំភូមិភាគទី១។
ចូលរួមក្នុងអង្គពិធីខាងលើនេះដែរ មានលោកតំណាងប្រធានសាលាដំបូងតំណាងព្រះរាជអាជ្ញាតំណាងមេបញ្ជាការ អ.ហ ខេត្ត, លោក លោកស្រីស្នងការរង, នាយការិយាល័យមេបញ្ជាការវរសេនាតូចការពារព្រំដែនលេខ២០៣,៦២៣,អធិការនគរបាលស្រុកក្រុងចំណុះឲ្យស្នងការនគរបាលខេត្តរតនគិរី។
យោងតាមសេចក្តីសម្រេចរបស់អគ្គស្នងការនគរបាលជាតិត្រូវបានប្រគល់ភារកិច្ចជូននាយនគរបាលជាតិជាមេបញ្ជាការរងទទួលដឹកនាំការងារនៃគណៈបញ្ជាការនគរបាលជាតិប្រចាំទិសភូមិភាគទី១ចំនួន០២រូបរួមាន៖
-ទី១៖ លោកឧត្តមសេនីយ៍ទោ ហេង រតនា អត្តលេខ៥៥២១៨ អនុប្រធាននាយកដ្ឋាននគរបាលព្រំដែន ជាមេបញ្ជាការរងទទួលអចិន្ត្រៃយ៍ឲ្យប្រចាំការនៅខេត្តរតនគិរី
-ទី២៖ លោកឧត្តមសេនីយ៍ទោ នៃតារាញ៉ិលអត្តលេខ១២៩៥៣អនុប្រធាននាយកដ្ឋាននគរបាលការពារព្រំដែនគោកជាមេបញ្ជាការរងឲ្យប្រចាំការនៅខេត្តមណ្ឌលគិរី។
ដោយឡែក មន្ត្រីនគរបាលថ្នាក់ឧត្តមសេនីយ៍ទោម្នាក់, ថ្នាក់ឧត្តមសេនីយ៍ត្រីម្នាក់ ទទួលទិសភូមិភាគ១ និងភូមិភាគ២, តំឡើងឋានន្តរស័ក្តិមន្ត្រីនគរបាលវរសេនាតូច ការពារព្រំដែន៦២៣,២០៣ចំនួន០៣នាក់។
ថ្លែងក្នុងអង្គពិធីខាងលើនេះ នាយឧត្តមសេនីយ៍ ដាំ វុទ្ធី បានថ្លែងថា ការវិវត្តន៍រីកចំរើនរបស់កម្លាំងនគរបាលជាតិ, នាយនគរបាលដែលមានវ័យកាន់តែចាស់ ត្រូវដាក់កម្លាំងថ្មីចូលជំនួស (ធនធានមនុស្ស) ការកែសម្រួលបំពេញបន្ថែម។
នាយឧត្តមសេនីយ៍ ដាំ វុទ្ធី បន្តថាជាក់ស្តែងភូមិភាគ១ លោកឧត្តមសេនីយ៍ទោ ហេងរតនាជំនួសឧត្តមសេនីយ៍ទោ នៃ តារាញ៉ិល ឲ្យទៅប្រចាំការនៅខេត្តមណ្ឌលគិរី។ ដូច្នេះការប្រគល់ភារកិច្ច តែងតាំងតំឡើងឋានន្តរស័ក្តិនាពេលនេះ សូមឲ្យយកចិត្តទុកដាក់រក្សាសាមគ្គីភាពផ្ទៃក្នុង សហការជិតស្និទ្ធជាមួយស្ថាប័នពាក់ព័ន្ធចៀសវាងឲ្យបានបង្ហោះព័ត៌មានវ៉ៃប្រហារគ្នា។
បន្ថែមលើនេះទៀត នាយឧត្តមសេនីយ៍ ដាំ វុទ្ធី បានជំរុញឲ្យកម្លាំងនគរបាលការពារព្រំដែន ត្រូវរក្សាកម្លាំងស្នូលប្រមូលផ្តុំដើរល្បាត បើមានបាតុភាពកើតឡើងត្រូវពិនិត្យដោះស្រាយនៅកន្លែងទប់ស្កាត់បទល្មើសឆ្លងដែន (បទល្មើសគ្រឿងញៀន, បទល្មើសព្រៃឈើ) ដោយស្មារតីទទួលខុសត្រូវខ្ពស់និងយកអស់លទ្ធភាពដើម្បីបុព្វហេតុប្រទេសជាតិ៕
ដោយ ៖ ចាប សំអាន