ដោយមានការយកចិត្តទុកដាក់ចំពោះសុវត្ថិភាពចំណីម្ហូបអាហារ និងសុខភាព ប្រជាពលរដ្ឋ ដោយផ្តោតសំខាន់ទៅលើការបរិភោគម្ហូបអាហារ ជាពិសេស ការផលិតស្រាស ។
នៅថ្ងៃទី១៩ ខែមិនា ឆ្នាំ២០១៩ អគ្គនាយកដ្ឋានកាំកុងត្រូល ដឹកនាំដោយឯកឧត្តម ម៉ក់ ពេជ្ជរិទ្ធ ប្រធានអគ្គនាយកដ្ឋាន និងឯកឧត្តម ស្រេង សុភាព អភិបាលរងខេត្ក្រចេះ សហការជាអាជ្ញាធរមូលដ្ឋាន បានចុះផ្សព្វផ្សាយអំពី សុវត្ថិភាពម្ហូបអាហារ និងត្រួតពិនិត្យទំនិញនានាៗជាច្រើនប្រភេទ ពិសេស ការផលិតស្រាស នៅតាមមូលដ្ឋាន និងនៅក្នុងផ្សារ ស្ថិតក្នុងទីរួមស្រុកសំបូរ ខេត្តក្រចេះ។
ឯកឧត្តម ម៉ក់ ពេជ្ជរិទ្ធ មានប្រសាសន៍ថា ដោយសង្កត់ធ្ងន់លើបញ្ហាការផលិតស្រាសរបស់ សិប្បករក្នុងស្រុកសំបូរ ដោយកន្លងមកស្រុកសំបូរឧស្សាហ៍កើតបញ្ហាពុលស្រាស ស្លាប់មនុស្សបន្ត បន្ទាប់កាលកន្លងមក។ ឯកឧត្តម បន្តទៀតថា ដោយកោតសសើរ ដល់សិប្បករផលិតស្រាស ក្នុងស្រុកសំបូរបន្ទាប់ពី ក្រុមការងារអគ្គនាយ កដ្ឋានកាំកុងត្រូល ចុះប្រមូលជាក់ស្តែង សំណាកស្រាសតាមទីតាំងផលិត មកពិនិត្យជាក់ស្តែងជាមួយនឹងសម្ភារៈ បច្ចេកវិទ្យាចុងក្រោយ ដោយមន្ត្រីជំនាញ ឃើញថាមិនមានផ្ទុកសារធាតុជាតិ មេតាណុល ក្នុងស្រាសទៀតឡើយ។
ឯកឧត្តម បានបញ្ជាក់ថា គោលបំណង់នៃការចុះផ្សព្វផ្សាយ និងត្រួតពិនិត្យមុខទំនិញនេះ គឺដើម្បីការពារសុខភាព និងផលប្រយោជន៍របស់បងប្អូនប្រជាពលរដ្ឋ។
នេះជាសមិទ្ធផលដែលថ្មីនៃការប្រឹងប្រែងរបស់អាជ្ញាធរ សហការជាមួយមន្ត្រីជំនាញអប់រំផ្សព្វ ផ្សាយ ដល់ពលរដ្ឋ សិប្បករ យល់ច្បាស់ពីផលប៉ះពាល់នៃការផលិត និងពិសារស្រាសរមាន ដែលមានជាតិពុលអេតាណុលខ្ពស់។
ទោះជាបែបនេះក្តីមន្ត្រីជំនាញនៅតែបន្តសហការជានិច្ចជាមួយអាជ្ញាធរមូលដ្ឋាន ចុះជួប និងជួយការពារបង្កលក្ខណៈងាយស្រួលជូនប្រជាពលរដ្ឋ តាមប្រសាសន៍ដ៏ខ្ពង់ខ្ពស់ របស់សម្តេចតេជោ “មន្ត្រី គឺជាអ្នកបំរើរាស្ត្រ” ហេតុនេះពួកយើង និងប្រឹងប្រែងឲ្យអស់ លទ្ធភាពសមត្ថភាព ការពារពលរដ្ឋ អ្នកប្រើប្រាស់គ្រប់ពេលវេលា គ្រប់កាលៈទេសៈ។
បន្ទាប់ពីក្រុមមន្ត្រីជំនាញបានចុះត្រួតពិនិត្យពេញមួយថ្ងៃ ជាលទ្ធផល ទំនិញ បន្លែ ផ្លែឈើ និងសំណាកស្រាសចំនួន ៤ម្ចាស់ គឺពុំមានរកឃើញនូវសារធាតុគីមី ឬសារធាតុបង្ក ឲ្យប៉ះពាល់ដល់សុខភាពរបស់បងប្អូនប្រជាពលរដ្ឋឡើយ។
ជាមួយគ្នានោះ ឯកឧត្តម ស្រេង សុភាព អភិបាលរងខេត្ត បានថ្លែងអំគុណយ៉ាង ជ្រាលជ្រៅចំពោះ អគ្គនាយកដ្ឋានកាំកុងត្រូល ហើយក្នុងនាមអាជ្ញាធរខេត្តរីករាយ សហកាជារនិច្ច ដើម្បីសុខភាព និងដើម្បីសេដ្ឋកិច្ចរបស់បងប្អូនប្រជាពលរដ្ឋក្នុងខេត្តក្រចេះ ទាំងមូលផងដែរ ។
ឯកឧត្តម ក៏បានអំពាវនាវដល់បងប្អូនប្រជាពលរដ្ឋ មុនជ្រើសរើសយកផលិតផល ទំនិញអ្វីមួយ ត្រូវពិនិត្យនូវលក្ខណៈវេចខ្ចប់ កាលបរិច្ឆេត ឲ្យបានត្រឹមត្រូវមុន យកទៅប្រើប្រាស់ ដើម្បីធានាគុណភាព និងមិនជៀសវាងប៉ះពាល់ដល់សុខភាព និងចូលរួមចំណែកកាត់បន្ថយភាពក្រីក្ររបស់បងប្អូន៕
ដោយ កិះខន
