ខេត្តរតនគិរី: មន្ត្រីអង្គការក្រៅរដ្ឋាភិបាលនិងសកម្មជនព្រៃឈើក្នុងខេត្តរតនគិរី បានឲ្យដឹងថា ទោះបីមានការផ្លាស់ប្ដូរតំណែងស្នងការនគរបាលខេត្តរតនគិរី និងមេបញ្ជាការកងរាជអាវុធហត្ថខេត្តរតនគិរី ក៏ដោយ ក៏ក្រុមឈ្មួញនៅតែអាចបន្តសកម្មភាពដឹកជញ្ជូនឈើប្រណិតចេញទៅស្រុកយួនយ៉ាងគឃ្លើនដដែល។
ប្រភពពីមន្ត្រីសមត្ថកិច្ចមូលដ្ឋានក្នុងស្រុកអូរយ៉ាដាវ ខេត្តរតនគិរី បានឲ្យដឹងថា រហូតមកដល់ពេលនេះក្រុមឈ្មួញខ្មែរនិងឈ្មួញយួននៅតែបន្តសហការគ្នាធ្វើសកម្មភាពដឹកជញ្ជូនឈើពីខេត្តរតនគិរី ចេញទៅស្រុកយួនតាមច្រកទ្វារអន្តរជាតិអូរយ៉ាដាវ យ៉ាងពេញបន្ទុកដដែល ។ ក្នុងនោះប្រការដែលគួឲ្យចាប់អារម្មណ៍គឺថាឋានៈត្រឹមមេនគបាលអន្តោប្រវេសន៍ច្រកទ្វារអន្តរជាតិអូរយ៉ាដាវ លោក អ៊ី ចំរើនពាក់រហូតផ្កាយមួយ គឺជាអ្នកមានអំណាចធំជាងគេក្នុងការបើកបារ៉ាស់ឲ្យឈ្មួញដឹកជញ្ជូនឈើចេញទៅស្រុកយួនយ៉ាងពេញបន្ទុក។
ដោយសារបទល្មើឈើប្រណិតនៅតែមានគេសម្គាល់ថា ករណីសមត្ថកិច្ចបង្ក្រាបបទល្មើសព្រៃឈើមួយករណីក្នុងស្រុកវ៉ើនសៃ កាលពីពេលថ្មីៗកន្លងទៅនេះ គឺបានត្រឹមតែធ្វើឲ្យល្អមើលប៉ុណ្ណោះព្រោះគ្មានឈ្មួញម្ចាស់ឈើនៅណាម្នាក់ត្រុវបានចាប់យកមកផ្តន្ទាទោសនោះឡើយ។ចឹងហើយបានជាលោកឧត្តមសេនីយ៍ត្រី អ៊ី ចំរើន មេនគរបាលអន្តោប្រវេសន៍ច្រកទ្វារអន្តរជាតិអូរយ៉ាដាវ ដែលគេជឿថាអាចមានខ្នងបង្អែករឹងមាំនៅក្នុងអគ្គនាយកដ្ឋានអន្តោប្រវេសន៍ មិនញញើតក្នុងការបន្តបើកបារ៉ាស់ឲ្យឈ្មួញខ្មែរនិងឈ្មួញយួនដឹកជញ្ជូនឈើទៅស្រុកយួននោះទេ។
ដល់ចឹងប្រជាពលរដ្ឋមើលឃើញថាគណៈកម្មការបង្ក្រាបនិងទប់ស្កាត់បទល្មើសព្រៃឈើដែលកំពុងបំពេញបេសកកម្មនៅខេត្តរតនគិរី អតរ់ប្រយោជន៍ទៅស៊ីបាយអស់អង្ករតែប៉ុណ្ណោះ។ ប្រភពពីប្រជាពលរដ្ឋក្នុងស្រុកអូរយ៉ាដាវ ក៏បានឲ្យដឹងដែរថា បច្ចុប្បន្នព្រៃឈើនៅក្នុងតំបន់ឧទ្យានជាតិអូរយ៉ាដាវ កំពុងត្រូវក្រុមឈ្មួញកាប់រំលំអារច្រៀកដឹកជញ្ជូនចេញទៅស្រុកយួនតាមច្រករបៀងភូមិភិ ច្រករបៀងភ្នំក្រហម និងច្រករបៀងភូមិឡុំ យ៉ាងរាលដាលព្រោះគ្មានមន្ត្រីជំនាញនិងសមត្ថកិច្ចពាក់ព័ន្ធមិនចាត់វិធានការបង្ក្រាបទាល់តែ សោះ។
លោក ថង សាវុន អភិបាលខេត្តរតនគិរី ក៏ដូចជាលោក សយ សូណា ប្រធានមន្ទីរកសិកម្មខេត្តរតនគិរី ព្រមទាំងលោក កែប កត់ នាយខណ្ឌរដ្ឋបាលព្រៃឈើខេត្តរតនគិរី កំពុងរក្សាភាពស្ងៀមស្ងាត់ក្នុងខណៈដែលក្រុមឈ្មួញនៅតែបន្តសកម្មភាពបំផ្លាញព្រៃឈើនិងដឹកជញ្ជូនឈើចេញទៅស្រុកយួនយ៉ាងពេញបន្ទុក។ ឯលោក អ៊ី ចំរើន មេនគរបាលអន្តោប្រវេសន៍ច្រកទ្វារអន្តរជាតិអូរយ៉ាដាវ កំពុងបង្ហាញពីឥទ្ធិពលខ្លាំងក្លារបស់ខ្លួនក្នុងការឃុបឃិតឲ្យឈ្មួញធំៗបន្តដឹកជញ្ជូនឈើចេញទៅស្រុកយួនយ៉ាងរលូន គ្មានញញើតអ្វីឡើយ៕
