ស្វាយរៀង ៖ ក្រុមចល័តការិយាល័យផលិតកម្ម និងបសុព្យាបាលនៃមន្ទីរកសិកម្ម រុក្ខាប្រមាញ់ និងនេសាទ ខេត្តស្វាយរៀងនៅព្រឹកថ្ងៃទី១៣ ខែមីនា ឆ្នាំ២០១៩ ឃាត់បានរថយន្តកូរ៉េមួយគ្រឿងលួចដឹកជ្រូក១៨ក្បាលឆ្លងដែនពីប្រទេសវៀតណាមចូលស្រុកខ្មែរកតាមច្រកទ្វារតំបន់ព្រំដែន ខ្សែដែក ស្ថិតក្នុងឃុំត្រស់ ស្រុករមាសហែក ខេត្តស្វាយរៀង គោលដៅចូលទៅទឹកដីខេត្ត ព្រៃវែង។
បើតាមអ្នកបើករថយន្តបានឲ្យដឹងថា គាត់មិនមែនជាម្ចាស់ជ្រូកទេគ្រាន់តែរកស៊ីដឹកជ្រូកឲ្យគេប៉ុណ្ណោះដោយក្នុងមួយក្បាលឈ្នួលដឹក៣ម៉ឺនរៀល ហើយម្ចាស់នៅស្រុកមេសាង ខេត្តព្រៃវែងដែលមានឈ្មោះ រ៉ា និង ឈ្មោះ សៅ គេឲ្យដឹកទៅមេសាង ។
មានរថយន្តជាច្រើនគ្រឿងក្នុង មួយថ្ងៃៗចូលដឹកជ្រូករស់តាម ច្រកទ្វារតំបន់ព្រំដែនខ្សែដែកនេះ ដោយបង់លុយឲ្យខាងនគរបាលឈរជើងច្រកទ្វារតំបន់ព្រំដែន ខ្សែដែកនេះ ក្នុងមួយរថយន្ត៣ម៉ឺនរៀល និងទាហាន២ម៉ឺនរៀល ក្រៅពីនេះគ្មានបង់ទៀតទេ ។
លោក ថាច់ រតនា ប្រធានមន្ទីរកសិកម្មរុក្ខាប្រមាញ់និងនេសាទខេត្តស្វាយរៀងបានឲ្យអ្នកសារព័ត៍មានដឹងថាមន្ត្រីលោកបានធ្វើការឃាត់រថយន្តដឹកសត្វជ្រូករស់ចំនួន១៨ក្បាលយកមករក្សាទុកនៅមន្ទីរកសិកម្មខេត្តស្វាយរៀងដើម្បីអនុវត្តបច្ចេកទេស បូមឈាមជ្រូកទាំងអស់នោះ យកទៅពិសោធន៍នៅរាជធានីភ្នំពេញ ។
លោកប្រធានមន្ទីរបានបន្ត ទៀតថា បើបូមឈាមសត្វជ្រូកទាំងនោះ យកទៅពិសោធន៍ហើយរកឃើញថាមានជំងឺនោះ ត្រូវតែកម្ទេចចោលតែម្តង តែបើគ្មានជំងឺគឺផាកពិន័យ តាមផ្លូវច្បាប់ ។ បើតាមគោលការណ៍របស់ក្រសួង កសិកម្មរុក្ខាប្រមាញ់ និងនេសាទ គឺបិទទាំងស្រុងមិនអនុញ្ញាត ឲ្យនាំសត្វជ្រូកចូលមកប្រទេសកម្ពុជាទៀតទេ ដោយសារប្រទេសវៀតណាម កំពុងតែផ្ទុះជំងឺដ៏កាចសាហាវ នៅលើសត្វជ្រូក និងអាចឆ្លងមកមនុស្ស ។បើចឹងអ្នកលួចនាំចូលនិងអ្នកឃុបឃឹតត្រូវតែមានទោសមិនមែនចាប់លេងៗគោះយកលុយនោះទេ?។”
