កំពត ៖ សមយុទ្ធយោធានាគមាសឆ្នាំ២០១៩ដែលជាល្បែងធ្វើសង្គ្រាមរវាងកងទ័ពកម្ពុជា និងកងទ័ពចិន បានចាប់ផ្តើមជាផ្លូវការហើយ ចាប់ពីថ្ងៃ ទី១៣ដល់ថ្ងៃទី២៧ខែមីនា ឆ្នាំ២០១៩ ។
លំហាត់យោធានាគមាសឆ្នាំ២០១៩ ធ្វើនៅទីលានបាញ់គ្រាប់ពិត សាលាហ្វឹកហ្វឺនតេជោសែនជុំគីរីរបស់កងពលតូចលេខ៧០ ដែលស្ថិតនៅភូមិត្រពាំងវែង ឃុំត្រពាំងរាំង ស្រុកជុំគីរី ខេត្តកំពត។នេះ គឺជាលំហាត់នាគមាសលើកទី៣ ហើយរវាងកងទ័ពប្រទេសទាំងពីរដែលសមយុទ្ធនេះបានធ្វើឡើងចាប់តាំងពីឆ្នាំ២០១៦មក។
លើកនេះ មានភាគីកងទ័ពរំដោះប្រជាជនចិនចូលរួមចំនួន២៥២នាក់ និងភាគីកម្ពុជាចំនួន២.៥៤២នាក់ក្នុងនោះមាន៖ កម្លាំងធ្វើលំហាត់ចំនួន៣៨២នាក់, កម្លាំងបម្រើការក្នុងលំហាត់ចំនួន៤៤៨នាក់, កម្លាំងចូលរួមក្នុងពិធីបើក-បិទ ចំនួន១.៦៨៥នាក់។
ឧត្ដមសេនីយ៍ទោ ហ្វេង ហ្ស៊ាង (Feng Xia ng) នាយរងសេនាធិការកងទ័ពជើងគោកតំបន់យោធភូមិភាគខាងត្បូង នៃកងទ័ពរំដោះប្រជាជនចិន បានឲ្យដឹងថា កងទ័ពរំដោះប្រជាជនចិនស្ម័គ្រចិត្តដើររួមគ្នាជាមួយកង យោធពលខេមរភូមិន្ទ ដើម្បីលើកកម្ពស់កិច្ចសហប្រតិបត្តិការ និងទំនាក់ ទំនង រវាងកងទ័ពទាំងពីរ ឲ្យកាន់តែរីកចម្រើនបន្ថែមទៀតក្នុងគោលបំណង ។ រួមចំណែកថែរក្សាការពារសន្តិភាព និងស្ថេរភាពក្នុងតំបន់។
ឧត្ដមសេនីយ៍ទោ ហ្វេង ហ្ស៊ាងបានអះអាងថា ទំនាក់ទំនងជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា-ចិន កំពុងតែឈាន ចូលដំណាក់កាលថ្មីហើយ នឹងរួមគ្នាចាប់យក កាលានុវត្តភាព នេះពង្រីកនិងពង្រឹងកិច្ចសហប្រតិបត្តិការដោយភាពស្មោះត្រង់ រួមចំណែកគ្នាដើម្បីអភិវឌ្ឍន៍ ប្រទេសជាតិទាំងពីរកាន់តែប្រសើរក្លាំងក្លាបន្ថែមទៀត។«យើងខ្ញុំស្ម័គ្រចិត្តរួមគ្នាដើរជាមួយភាគីកម្ពុជាជំរុញលំហាត់សម យុទ្ធនាគមាសនេះឲ្យដើរតួនាទីកាន់តែសំខាន់ក្នុងការពង្រីក និងពង្រឹងកិច្ចសហប្រតិបត្តិការលើគ្រប់វិស័យធ្វើឲ្យកាន់តែស៊ីជម្រៅលើគ្រប់ស្រទាប់ក្នុងការលើកកម្ពស់កិច្ចសហប្រតិបត្តិការឲ្យកាន់តែខ្ពស់ជំរុញទំនាក់ទំនងកងទ័ពទាំងពីរឲ្យកាន់តែរីកចម្រើន ដើម្បីរួមចំណែកថែរក្សាការពារសន្តិភាពស្ថេរភាពក្នុងតំបន់»។
នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ បានលើកឡើងផងដែរថា សមយុទ្ធនាគមាសលើកទី៣ ដែលកម្ពុជាបានធ្វើឡើជាលក្ខណៈទ្វេភាគី ក្រោមការជួយ ឧបត្ថម្ភ គាំទ្រពីសាធារណរដ្ឋប្រជាមានិតចិនសុទ្ធតែបានឆ្លុះបញ្ចាំង និងផ្សារភ្ជាប់យ៉ាងជ្រាលជ្រៅទៅ និងកិច្ចសហប្រតិបត្តិការលើកស្ទួយទំនាក់ទំនងល្អ បង្កើតចំណងសាមគ្គី សម្ព័ន្ធ មេត្រី បណ្ដុះបណ្ដាលចំណេះដឹង ផ្លាស់ប្ដូរបទពិសោធន៍ អភិវឌ្ឍន៍ធនធានកងទ័ព ធ្វើឲ្យប្រសើរឡើងនូវសមត្ថភាពកិច្ចសហប្រតិបត្តិការជាលក្ខណៈពហុភាគី ឲ្យយោធិនគ្រប់រូបចេះសម្របសម្រួលចេះរស់នៅ និងចេះធ្វើការងាររួមជាមួយជាតិសាសន៍ជាច្រើនក្នុងពេលធ្វើប្រតិបត្តិការរួមគ្នាក៏ដូចជាឆ្លើយតបទៅ នឹងបញ្ហាប្រឈមនានា ដែលមិនមែនជាប្រពៃណី។
