កោះកុង ៖ សម្តេចតេជោ ហ៊ុន សែន អមដំណើរដោយលោក ហង់ ជួនណារ៉ុង កុង្សីយ៍ក្រសួងអប់រំ និងកីឡាបានអញ្ជើញទៅកាត់ខ្សែបូរសម្ពោធដាក់អោយប្រើប្រាស់វិទ្យាល័យកោះកុង ជាផ្លូវការព្រឹកថ្ងៃទី ១៣ ខែ មីនា ឆ្នាំ ២០១៩ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដឹកនាំ ប្រតិភូអមដំណើរអញ្ជើញទៅសម្ពោធដាក់អោយប្រើប្រាស់ ជា ផ្លូវការនៅសាលាវិទ្យាល័យកោះកុង ។
តែអ្វីដែលជាប្រការគួរអោយចាប់អារម្មណ៍បំផុតពីមហាជននោះគឺក្រៅពីការទទួល ស្វាគមន៍ពីប្រជាពលរដ្ខ និងមន្ត្រីរាជការ សិស្សានុសិស្សយ៉ាង ច្រើនកុះករ ស្រាប់តែមានការបែកធ្លាយនូវរឿងអាស្រូវគាប សង្កត់ជំរិតទារលុយពីសិស្សានុសិស្ស នៅក្នុងវុទ្យាល័យកោះកុង ដែលប្រព្រឹត្តឡើងពីអ្នកគ្រូឈ្មោះ លឹម សុវណ្ណនី យ៉ាងល្បី រញ្ជួយពេញបណ្តាញសង្គុម facebook ។
តាមប្រភពព័ត៌មានបានបង្ហោះបានបញ្ជាក់ថា សិស្សថ្នាក់ទី៧ មួយចំនួន នៃវិទ្យាល័យកោះកុង បានថ្លែងចោទប្រកាន់ចំពោះ អ្នកគ្រូ លឹម សុវណ្ណនី ដែលជាគ្រូបង្រៀនមុខវិជ្ជា ពលរដ្ឋ និង សីលធម៌ ថ្នាក់ទី៧ A-E នៃសាលាវិទ្យាល័យកោះកុង និង ត្រូវជាក្មួយស្រី របស់លោកប្រធានមន្ទីរអប់រំ យុវជននិងកីឡាខេត្តកោះកុង ថាបានលក់វិញ្ញាសារថ្លៃកប់ពពក ដោយក្នុង១សន្លឹក មានតម្លៃចាប់ពី៥ពាន់រៀល ទៅ១ម៉ឺនរៀល ដែលជាហេតុធ្វើអោយសិស្សក្រីក្រជាច្រើនពុំមានលទ្ធភាពក្នុងការទិញវិញ្ញាសាររបស់អ្នកគ្រូ ការលើកឡើងខាងលើបានធ្វើឡើងបន្ទាប់ពីក្រុមអ្នកសារព័ត៌មានយើងបានចុះទៅយកព័ត៌មានដល់សាលាវិទ្យាល័យកោះកុង។
បើទោះបីជាមានសិស្សជាច្រើនបានថ្លែងទទួលស្គាល់ថាពួកគេពិតជាបានទិញវិញ្ញសារក្នុងតម្លៃចាប់ពី៥ពាន់ទៅ១ម៉ឺនយ៉ាងណាក្តី ក៏អ្នកគ្រូ លឹម សុវណ្ណនី បានថ្លែងបដិសេធថា អ្នកគ្រូមិនបានលក់វិញ្ញាសារអោយទៅសិស្សដូចការចោទប្រកាន់នោះទេ ការដែលអុ្នកគ្រូយកលុយពីសិស្សក្នុងម្នាក់៥ពាន់រៀលនោះ គឺជាកម្រៃពលកម្មរបស់អ្នកគ្រូក្នុងការបង្រៀនគួរសិស្សទាំងនោះទៅវិញទេ។
លោក ម៉ែន ស៊ីថាត នាយកសាលាវិទ្យាល័យកោះកុងបានថ្លែងថា ចំពោះបាតុភាពមិនប្រក្រតី នៃការលក់វិញ្ញសារបស់អ្នកគ្រូ លឹម សុវណ្ណនី ត្រូវបានខាងសាលា ធ្វើរបាយការណ៏បញ្ជូនទៅមន្ទីរអប់រំ យុវជន និង កីឡាខេត្តកោះកុងរួចហើយ ហើយចំពោះចំណាត់ការបែបណាចំពោះរឿងរ៉ាវខាងលើនោះ គឺស្រេចតែខាងលោកប្រធានមន្ទីរនោះទេ។
ជុំវិញបាតុភាពមិនប្រក្រតីខាងលើ ភ្នាក់ងារយើងនៅពុំទាន់អាចសុំការបំភ្លឺពីលោក ង៉ែត ឡឹង បាននៅឡើយទេ ដោយលោកគ្រាន់តែបានឆ្លើយទទួលស្គាល់តាមទូរស័ព្ទថា អ្នកគ្រូ លឹម សុវណ្ណនី ពិតជាក្មួយរបស់លោកមែន តែចំពោះចំណាត់ការយ៉ាងណានោះលោកនៅពុំទាន់បានបកស្រាយនៅឡើយទេ ដោយបានប្រាប់ថាពេលនេះលោកកំពុងជាប់រវល់។
មតិមហាជនជាច្រើនបានលើកឡើងថាចាំមើល ចំពោះការធ្វើខុសបទបញ្ជាផ្ទៃក្នុង របស់សាលាពីសំណាក់អ្នកគ្រូ លឹម សុវណ្ណនី ដែលត្រូវជាក្មួយស្រីរបស់លោក ង៉ែត ឡឹង ប្រធានមន្ទីរអប់រំ យុវជននិងកីឡាខេត្តកោះកុង អាចនិងមានចំណាត់ការពីសំណាក់មន្ទីរដែររឬទេ បើស្តោះលើទ្រូងឯងបែបនេះ៕
