ភ្នំពេញ ៖ ទោះរដ្ឋមន្ត្រីក្រសួងអប់រំមិនចេញមុខសុំលុយឲ្យកីឡាករសំបូរ សុភ័ណ្ឌតាមអនុក្រិត្យកំណត់ប្រាក់១២០លានរៀលជូនកីឡាករដែលទទួលបានមេដាយមាសក្រោមលេសមិនសមហេតុផលក៏ថ្មីៗនេះកីឡាករកាយវប្បកម្មលោកសំបូរ សុភ័ណ្ឌទទួលបានការស្រលាញ់រាប់អានពីប្រីយ៍មិត្តនិងទទួលបានការឧបត្ថម្ភពីអ្នកគាំទ្រស្រលាញ់កីឡាខ្មែរដែរ។
ជាក់ស្តែងនៅ ថ្ងៃទី០៩ ខែមីនា ឆ្នាំ២០១៩ គេឃើញ ឧកញ៉ា ស្រី ចាន់ថន បានបង្ហោះសារ លើកទឹកចិត្តមួយ ជូនដល់ កីឡាករកាយវប្បកម្មកម្ពុជា ដោយលោកបានឧបត្ថម្ភនូវ ទឹកប្រាក់ផ្ទាល់ខ្លួនរបស់លោកសំបូរ សុភ័ណ្ឌ ដល់ទៅ ៨លានរៀល។ លោកឧកញ៉ា ស្រី ចាន់ថន ក៏ចង់ជួបពួកគាត់ ដោយលោកបានបញ្ជាក់ថា តើលោកអាចជួយអ្វីបានខ្លះបន្ថែមទៀត ដើម្បីជាការលើកទឹកចិត្ត និងចង់ឲ្យកីឡាករទាំងនេះ បន្តចូលរួមលើវិស័យកីឡាមួយនេះ។
លោកក៏បានប្រាប់បថ្ថែមទៀតថា៖“ខ្ញុំចង់ជួបបង តើខ្ញុំអាចជួយ អ្វីបានខ្លះបន្ថែម? ដើម្បីលើកទឹកចិត្ត នឹងដើម្បីបន្តការចូលរួម លើកវិស័យកីឡានេះល្អ។ ដោយក្តីអាណិតអាសូរ ខ្ញុំចូលរួមថវិការចំនួន ៨លានរៀល សំរាប់ការចំណាយផ្សេងៗ និងការលើកទឹកចិត្ត អោយបន្តទៅមុខទៀត ព្រោះបងបានព្យាយាមវឹកហាត់យកជ័យលាភីលេខ1 លើពិភពលោក ជូនដល់ជាតិមាតុភូមិយើង ខ្ញុំពេញចិត្ត និងការលើកទឹកចិត្តមួយទំហឹង”។
ដោយឡែកកាលពីថ្ងៃទី០៧ ខែមីនា ឆ្នាំ២០១៩ លោក សុវណ្ណ រិទ្ធី អគ្គនាយកសារព័ត៌មាន TVFB បានបង្ហោះសារ ដ៏រំភើបមួយ គឺលោក ខេមរៈ សិរីមន្តតារាចម្រៀង បានឧបត្ថម្ភ ថវិកា ជូន កីឡាករ សំបូរ សុភ័ណ្ឌ ដល់ទៅ១០០០ ដុល្លារ។ លោក ខេមរៈ សិរីមន្ត ប្រាប់លោក សុវណ្ណរិទ្ធី ថា ពេលដែលលោក បានឃើញវីដេអូឡាយ រួចហើយ លោកពិតជាមានអារម្មណ៍ក្តុលក្តួល និងមានការអាណិតអាសូរ ជាពន់ពេក ចំពោះការលំបាករបស់ កីឡាករ កាយវប្បកម្មកម្ពុជា សំបូរ សុភ័ណ្ឌ រូបនេះ ហើយលោកផ្តល់ថវិកា ចំនួន១០០០ដុល្លារ នេះ ជូនដល់កីឡាករ សំបូរ សុភ័ណ្ឌ ទុកជាការលើកទឹកចិត្តផងដែរ ។លោក ខេមរៈ សេរីមន្ត បានបន្តថា សូមឲ្យខាងក្រសួងពាក់ព័ន្ធ មេត្តាជួយពិចារណាឡើងវិញ ចំពោះបញ្ហាប្រាក់រង្វាន់នេះ ដើម្បីជូនភាពយុត្តិធម៌ដល់កីឡាករជាតិរបស់យើង”។
សូមបញ្ជាក់ថា កីឡាករកាយវប្បកម្មកម្ពុជា បានចូលរួមប្រកួត ក្នុងព្រឹត្តិការណ៍មួយ ដែលមានឈ្មោះថា 10th WBPF World Competition 11-17December 2018 Chiangmai city Thailand ដោយកីឡាករកម្ពុជា មួយរូប ឈ្មោះ សំបូរ សុភណ្ឌ ដណ្ដើមបានមេដាយមាស លើវិញ្ញាសា Men Sports Physique Up to 175 Cm ។ ជាមួយនឹងជ័យជំនះនេះ កីឡាកររូបនេះ និងគ្រូបង្វឹក គឺលោក ស៊ឹម សុភមង្គលរស្មី ដែលជាប្រធានសហព័ន្ធផងនោះ បានទទួលរង្វាន់លើកទឹកចិត្ត ពីរាជរដ្ឋាភិបាល ចំនួន ២០.០០០.០០០ រៀល ។ ឯគ្រូបង្វឹក ក៏បានការលើកទឹកចិត្ត ២០.០០០.០០០ រៀលដែរ ។
ទាំងគ្រូបង្វឹក ដែលជាប្រធានសហព័ន្ធផងនោះ និងកីឡាករ សំបូរ សុភណ្ឌ បានប្រតិកម្មថា ក្រសួងអប់រំ កឹបកេងលុយរង្វាន់ របស់ពួកគេ អស់ ១០០.០០០.០០០ រៀល ព្រោះរង្វាន់របស់ពួកគេ ដែលត្រូវបាននោះ មានចំនួន ១២០.០០០.០០០ រៀលឯណោះ ព្រោះកាលមុនពួកគេក៏ធ្លាប់ទទួលបានរង្វាន់១២០លានរៀលដែរ។លោក អ៊ុក សិទ្ធិជាតិ អគ្គនាយកកីឡា បានពន្យល់ពីមូលហេតុថា នៅក្នុងអនុក្រឹត្យរបស់ រដ្ឋាភិបាល ស្ដីពីការផ្ដល់ប្រាក់រង្វាន់ ចំពោះជ័យលាភី និង ប្រាក់ឧបត្ថម្ភ ចំពោះគ្របង្វឹក ក្នុងការប្រកួតកីឡា ជាលក្ខណៈអន្តរជាតិ លេខ ៥៣២ អន ក្រ-បក ចុះថ្ងៃទី២៥ ខែវិច្ឆិកា ឆ្នាំ២០១៣ ដែលចុះហត្ថលេខា ដោយសម្ដេចអគ្គមហាសេនាបតីតេជោ ហ៊ុន សែន ពុំមានចែង ស្ដីពីការផ្ដល់រង្វាន់ ចំពោះការប្រកួត ក្នុងព្រឹត្តិការណ៍បែបនេះទេ គឺមានចែងតែការប្រកួតកីឡា អាស៊ីអាគ្នេយ៍ (SEA Games) ការប្រកួតកីឡាអាស៊ីរដូវក្ដៅ និងរដូវរងា (ASIAN Games) និងកីឡាអូឡាំពិក ទាំងរដូវក្ដៅ និងរងា (Olympic Games) តែប៉ុណ្ណោះ ។
តែនៅក្នុងមាត្រាទី៧ នៃអនុក្រឹត្យនោះ បានចែងថា ” ជ័យលាភីឯកត្តជន ឬ ក្រុម ក្នុងការប្រកួតជាលក្ខណៈអន្តរជាតិ ក្រៅពីការប្រកួត ដូចមានចែង ក្នុងមាត្រា ៣ ដែលមាន ស៊ីហ្គេម កីឡាអាស៊ី និង កីឡាអូឡាំពិក ត្រូវបានផ្ដល់ប្រាក់រង្វាន់ តាមប្រកាសអន្តរក្រសួង ស្ដីពីគោលការណ៍ សម្រាប់ហ្វឹកហាត់ និងការប្រកួតកីឡា ជាផ្លូវការ គ្រប់ប្រភេទប្រចាំឆ្នាំ ” ។នៅក្នុងសេចក្ដីប្រកាសអន្តរក្រសួង លេខ ៧១៦ សហវ-ប្រក ស្ដីពីគោលការណ៍ សម្រាប់ប្រមូលផ្ដុំហ្វឹកហាត់ ក្រុមជម្រើសជាតិ និងការប្រកួតលក្ខណៈអន្តរជាតិ ផ្លូវការ ប្រចាំឆ្នាំ ចុះថ្ងៃទី៧ ខែកក្កដា ឆ្នាំ២០១៥ ចុះហត្ថលេខា ដោយរដ្ឋមន្ត្រីក្រសួងអប់រំ យុវជន និងកីឡា លោកហង់ជួន ណារ៉ុន និងរដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ លោក អូន ព័ន្ធមុនីរ័ត្ន ត្រង់ចំណុច (ខ) ស្ដីពីប្រាក់រង្វាន់លើកទឹកចិត្ត កីឡាករ-កីឡាការិនីជើងឯក តាមប្រភេទកីឡា (Championship) ត្រង់ចំណុច (ខ១) ស្ដីពីការប្រកួតជើងឯកពិភពលោក បានបញ្ជាក់ថា រង្វាន់មេដាយមាសបាន ២០.០០០.០០០ រៀល មេដាយប្រាក់ បាន ១៦.០០០.០០០ រៀល និង មេដាយសំរិទ្ធ បាន ១៣.០០០.០០០ រៀល ។
លោក អ៊ុក សិទ្ធិជាតិ បានអះអាងថា ដូច្នេះរង្វាន់ ២០.០០០.០០០ រៀល គឺជារង្វាន់ដែលកីឡាករ សំបូរ សុភណ្ឌ បានទទួល ដោយត្រឹមត្រូវ ពីរដ្ឋាភិបាល តាមរយៈសេចក្ដីប្រកាសអន្តរក្រសួងនេះ។ ទោះជាយ៉ាងឆ្លើយសំនួរកាសែតដែលកន្លងមកម៉េចក៏មានរង្វាន់១២០លានរៀល?លោក អ៊ុក សិទ្ធិជាតិថាវាជាករណីពីសេសមានការស្នើសុំពីរដ្ឋមន្ត្រីទើបបាន។តែលោកអគ្គនាយកកីឡា មិនបានពន្យល់ថាតើមេដាយមាសធុនណានិងមនុស្សធុនណាទើបទទួលបានការស្នើសុំជាពិសេសពីលោករដ្ឋមន្ត្រីក្រសួងអប់រុំនោះទេ?៕
