ក្រចេះ ៖ ថ្ងៃអាទិត្យ ៥កើត ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ១០ មីនា ២០១៩ នៅវត្តសម្តេចព្រះនាគវ័នវរៈពោធិ ហៅវត្តសំបុក ស្ថិតក្នុងឃុំសំបុក ស្រុកចិត្របុរី ខេត្តក្រចេះ មានពិធីស្រោចស្រង់ព្រះសុគន្ធវារីប្រគេនព្រះគ្រូធម្មវិចិត្រ ង៉ែត សារីន ព្រះអនុគណស្រុក និងប្រកាស់តែងតាំងព្រះសង្ឃ ២៥ អង្គជាព្រះចៅអធិការវត្តចំនួន ២៥ វត្ត ក្នុងស្រុកចិត្របុរី ។ ដោយពិធីអញ្ជើញចូលរួមពីឯកឧត្តម ហឿ ស៊ីយ៉ែម អភិបាលរងខេត្ត និងលោកជំទាវ លោកជំទាវ វ៉ាន់នី នូ ភឿង ប្រធានក្រុមប្រឹក្សាខេត្ត និង ការចូលរួមពីព្រះសង្ឃចំនួន ១៩០អង្គ ពុទ្ធបរិស័ទ្ធ និងសិស្សានុសិស្សយ៉ាងច្រើនកុះករផងដែរ ។
ពិធីធ្វើឡើងនេះជាការបង្ហាញអំពីការរីកចម្រើនលើគ្រប់វិស័យ ទាំងផ្នែកពុទ្ធចក្រ និងអាណាចក្រនៅទូទាំងប្រទេស ក្រោមការដឹកនាំប្រកបដោយគតិបណ្ឌិត របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក៏ដូចជាដើម្បីសម្តែងនូវកតញ្ញូតាធម៌ ដល់ចាស់ព្រឹទ្ធាចារ្យ និងបំពេញបុណ្យកុសល ដូចជាពិធីបុណ្យចូលឆ្នាំថ្មី ប្រជាពលរដ្ឋខ្មែរ តែងធ្វើពិធីស្រង់ព្រះ ព្រះសង្ឃ ឪពុក ម្តាយ ជីដូន ជីតា ចាស់ព្រឹទ្ធាចារ្យ និងអ្នកមានគុណទាំងអស់ ដើម្បីជម្រះមន្ទិលសៅហ្មង ទាំងផ្លូវកាយ វាចា ចិត្ត និងសុំពរជ័យពីអ្នកមានគុណទាំងនោះ ដើម្បីប្រោះព្រំកូនចៅ ក្នុងឱកាសឆ្នាំថ្មី ឲ្យជួបតែសុភមង្គល សិរីសួស្តីជាដើម។
ក្នុងឱកាសនោះដែរព្រះគ្រូធម្មវិចិត្រ ង៉ែត សារីន ព្រះអនុគណស្រុក បានមានព្រះសង្ឃដិកាផ្តាំផ្ញើដល់ព្រះសង្ឃ និងព្រះគ្រូចៅអធិការ ដែលទើបប្រកាស់តែងតាំងពេញសិទ្ធិទាំង២៥អង្គ សូមឲ្យគោរពប្រតិបត្តិសិល៍សិក្ខាវិន័យឲ្យបានខ្ជាប់ខ្ជួនដឹកនាំព្រះសង្ឃក្រោមឱវាទឲ្យបានល្អ បង្រៀនធម៌វិន័យដល់សង្ឃឲ្យមានពុទ្ធិ និងដឹកនាំកសាងទីវត្តអារាម ជាមួយនិងញាតិ្តញោមពុទ្ធបរិស័ទ ដើម្បីថែរក្សាសានាព្រះពុទ្ធបរមគ្រូជាទីគោរព ជាស្រែបុណ្យរបស់ប្រជាពុទ្ធបរិសទ័ និងជាថ្នាល បណ្តុះគុណធម៌ដល់កុលបុត្រខ្មែរយើង ឈានទៅរកឋានបរមសុខ ពោលគឺព្រះនិពាន្វ ។
បញ្ជាក់ដែរថា ៖ បន្ទាប់ពីពិធីប្រគេនប្រកាស់នីយបត្រ័ដល់ព្រះសង្ឃ២៥អង្គ និងពិធីស្រោចសុគន្ធវារីព្រះគ្រូធម្មវិចិត្រ ង៉ែត សារីន ព្រះអនុគណស្រុក រួចមក ក៏មានពិធីរាប់បាត្រព្រះសង្ឃទាំង ១៩០ អង្គផងដែរ ៕
ដោយ កិះ ខន
