រតនគិរី ៖ កម្លាំងអាវុធហត្ថខេត្តកាលពីវេលាម៉ោង២និង៣០នាទីអធ្រាត្រឈានចូលថ្ងៃទី៣ខែមិនាឆ្នាំ២០១៩នេះបានចុះបង្ក្រាបនិងដកហូតឈើកកោះ,ឈើគគីរប្រភេទដុំនិងសន្លឹកចំនួន២រថយន្តឡង់គ្រីស័រត្រង់ចំណុចភូមិហាត់ប៉ក់ឃុំហាត់ប៉ក់ស្រុកវ៉ើនសៃខេត្តរតនគិរី។
លោកវរសេនីយ៍ទោ ឃី សុខា ប្រធានមន្ទីរបច្ចេកទេសនិងសន្តិសុខនៃទីបញ្ជាការអ-ហខេត្តបានប្រាប់សារព័ត៌មានថា កម្លាំងចុះប្រតិបត្តិការបង្ក្រាបនិងរឹបអូសឈើខាងលើនេះគឺមានបទបញ្ជាផ្ទាល់ពីលោកឧត្តមសេនីយ៍ត្រី ថាវ យ៉េនមេបញ្ជាការអ-ហខេត្តនិងដឹកនាំកម្លាំងចំនួន១២នាក់ដោយលោកវរសេនីយ៍ឯកផាន់ សុផាតមេបញ្ជាការរងទទួលបន្ទុកក្រុមការងារបង្ក្រាបធនធានធម្មជាតិ។
លោកវរសេនីយ៍ទោឃី សុខាប្រាប់បន្តថាមុននឹងឈានដល់ការបង្ក្រាបករណីខាងលើនេះគឺយើងបានប្រើប្រាស់បណ្តាញសំងាត់តាមដានជាប្រចាំរួចសុំយោបល់លោកមេបញ្ជាការបង្កាបជាក់ស្តែងតែម្តង ។ លោកវរសេនីយ៍ទោឃី សុខាបន្ថែមឲ្យដឹងទៀតថា ឈើខាងលើនេះ មានប្រភេទដុំនិសន្លឹកប្រភេទកកោះនិងគគីរលាយគ្នាដែលឈ្មួញប្រុងដឹកចូលក្រុងបានលុង។បច្ចុប្បន្នរថយន្តឡង់គ្រីស័រ២គ្រឿងផ្ទុកឈើគគីរ,ឈើកកោះច្រើនដុំនិងសន្លឹកត្រូវបានប្រគល់ឲ្យមន្ត្រីខណ្ឌរដ្ឋបាលព្រៃឈើចាត់ចែងបន្តនៅព្រឹកថ្ងៃទី៣ខែមិនាឆ្នាំ២០១៩ ។ យ៉ាងណាក៏ដោយចំនួនឈើពិតប្រាកដមិនទាន់ដឹងនៅឡើយទេ រង់ចាំធ្វើការវាស់វែង។
ប្រភពព័ត៌មានដោយឡែកទៀតបង្ហើបឲ្យដឹងថា សព្វថ្ងៃនេះការលួចដឹកជញ្ជូនឈើមានជើងខ្លាំង២នាក់ត្រូវជាកូនប្រុសមន្ត្រីជាន់ខ្ពស់នៅខេត្តរតនគិរី ដែលសមត្ថកិច្ចជំនាញនិងស្ថាប័នពាក់ព័ន្ធកន្លងមកមិនហ៊ានប៉ះ ៕
ដោយ ៖ ចាប សំអាន
