ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅរសៀលថ្ងៃទី២៨ ខែកុម្ភៈ ឆ្នាំ២០១៩នេះ បានបញ្ជាឲ្យសិក្សាពីមេបញ្ជាការយោធាខេត្តព្រះសីហនុ និងអភិបាលរងខេត្ត២រូបទៀតដើម្បីដក ចេញពីតំណែង ពាក់ព័ន្ធករណីប្រើអំពើហឹង្សាបង្ក្រាបពលរដ្ឋតវ៉ារឿងដីធ្លី នៅខេត្តព្រះសីហនុ កាលពីពេលកន្លងទៅ។
មន្ត្រីដែលបានចូលរួម ក្នុងកិច្ចប្រជុំឧត្តមក្រុមប្រឹក្សាពិគ្រោះ និងផ្តល់យោបល់នៅវិមានសន្តិភាព បានបង្ហើបប្រាប់បណ្តាញព័ត៌មាន ថា «ក្នុងកិច្ចប្រជុំ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាឲ្យធ្វើការសិក្សា ដើម្បីឈានដល់ការដកមេយោធាខេត្តព្រះសីហនុ លោក សាវិន វិបុល និងអភិបាលរងខេត្ត២នាក់ទៀត ដែលពាក់ព័ន្ធនឹងការបង្ក្រាបករណីពលរដ្ឋតវ៉ារឿងដីធ្លី កាលពីពេលថ្មីៗកន្លងទៅនេះ»។
សម្តេចតេជោនាយករដ្ឋមន្ត្រី ក៏បានបញ្ជាយ៉ាងដាច់ណាត់ថា មិនអនុញ្ញាតឲ្យយកកងទ័ព ដែលមិនមែនជាមន្ត្រីអនុវត្តច្បាប់ ទៅអនុវត្តសាលដីការឡើយ បើមាន គឺដកមេចោលតែម្តង។សូមបញ្ជាក់ដែរថាសម្តេចក្រឡាហោមសខេងឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃក៏បានណែនាំចឹងដែរចំពោះអាជ្ញាធរក្រោមឱវាទក្រសួងមហាផ្ទៃ។
ក្រៅពីការណែនាំខាងលើសម្តេចតេជោ ហ៊ុន សែន ក៏បានបញ្ជាដាច់ណាត់ឲ្យ លោក ស្វាយ សំអៀងអភិបាលខេត្តមណ្ឌលគិរីដកហូត យកភ្នំដោះក្រមុំមកគ្រប់គ្រងវិញ ដោយមិនត្រូវឲ្យមាននរណាបំពាន ឬរំលោភយកធ្វើកម្មសិទ្ធិនោះឡើយ។
ប្រធានគណបក្សទាំង១៦ បានធ្វើសេចក្តីរាយការណ៍យ៉ាងច្បាស់លាស់នូវបញ្ហានីមួយៗ និងភាគីពាក់ព័ន្ធ (ឈ្មោះមន្ត្រី) និងសំណូមពរក្នុងលក្ខណៈសហការ និងរួមដោះស្រាយបញ្ហាទាំងនោះ។ នៅក្នុងកិច្ចប្រជុំនេះ បញ្ហាដែលឧត្តមក្រុមប្រឹក្សាពិគ្រោះ និងផ្តល់យោបល់ដាក់ជូនមកសម្តេចតេជោនាយករដ្ឋមន្ត្រីមានដូចជា បញ្ហាទំនាស់ដីធ្លី ដែលក្នុងនោះប្រភេទទំនាស់ដីធ្លីនោះគឺទំនាស់ដីធ្លីរវាងពលរដ្ឋ និងពលរដ្ឋ ទំនាស់ដីធ្លីរវាងពលរដ្ឋ និងសមាគម ពលរដ្ឋជាមួយក្រុមហ៊ុន ការទន្ទ្រានយកដីរដ្ឋដែលជាដីកម្មសិទ្ធិជាដើម។ រឿងរ៉ាវទាំងអស់នោះភាគច្រើនកើតនៅតំបន់ដែលមានការអភិវឌ្ឍខ្លាំងដូចជា នៅខេត្តព្រះសីហនុ ខេត្តសៀមរាប និងខេត្តបន្ទាយមានជ័យជាដើម។
ក្រៅពីទំនាស់ដីធ្លីព័ត៌មានពាក់ព័ន្ធបទល្មើសជលផល និងបទល្មើសព្រៃឈើ ផងដែរ ដែលទាំងអស់នេះក៏មានការពាក់ព័ន្ធទៅនឹងការលើកឡើងពីភាពមិនប្រក្រតីអំពើពុករលួយជាប្រព័ន្ធដែលបង្កឡើងជាបុគ្គលក៏ដូចជារឿងមិនរគោរពអនុវត្តលិខិតបទដ្ឋានគតិយុត្តិរបស់ថ្នាក់ជាតិដើម្បីឲ្យថ្នាក់ក្រោមជាតិអនុវត្តផ្ដល់សេវាដល់ប្រជាពលរដ្ឋ និងបញ្ហាអសកម្មផ្សេងៗមួយចំនួនទៀតដែលកើតចេញពីបុគ្គលដែលជាអាជ្ញាធរ។
សម្ដេចតេជោនាយករដ្ឋមន្ត្រីរីករាយដែលបានជួបជាមួយឧត្តមក្រុមប្រឹក្សាពិគ្រោះ និងផ្តល់យោបល់ ដែលទទួលបាននូវព័ត៌មានទាំងអស់នោះ ។ សម្តេចបានចាត់ទុកអង្គប្រជុំនេះមានតម្លៃស្មើនឹងការសម្រេចរបស់សម្ដេចក្នុងអង្គប្រជុំគណៈរដ្ឋមន្ត្រីផងដែរ។ការលើកឡើងរបស់ប្រតិភូគណបក្សទាំង១៦នោះ សម្ដេចតេជោនឹងផ្ដល់នូវការណែនាំ និងបញ្ជាឲ្យអាជ្ញាធរជំនាញដែលសំដៅទៅលើក្រសួងជំនាញនិងអាជ្ញាធរថ្នាក់ក្រោមជាតិដើម្បីចូលរួមដោះស្រាយជាបន្ទាន់ដូចជាករណីបញ្ហាទំនាស់ដីធ្លី រឿងពាក់ព័ន្ធនឹងគំរបព្រៃឈើជាដើម ដោយសម្តេចបានប្រកាន់ខ្ជាប់នូវគោលការណ៍ទប់ស្កាត់កុំឲ្យមានទំនាស់ដីធ្លីថ្មីកើតមាន ហើយនឹងព្យាយាមរួមគ្នាដោះស្រាយទំនាស់ដីធ្លីដែលនៅសេសសល់ដែលក្នុងនោះមានវិធានជាច្រើនដែលសម្ដេចតេជោបញ្ជា និងណែនាំទៅក្រសួងពាក់ព័ន្ធជាពិសេសក្រសួងរៀបចំដែនដីនិងរដ្ឋបាលថ្នាក់ខេត្ត ស្រុក ខណ្ឌ។
សម្ដេចតេជោ ក៏បានប្រាប់ប្រតិភូគណបក្សនយោបាយទាំង១៦ដែល ជាសមាជិកឧត្តមក្រុមប្រឹក្សាពិគ្រោះនិងផ្ដល់យោបល់ថា រាជរដ្ឋាភិបាលមានថវិកាគ្រប់គ្រាន់ ក្នុងការឆ្លើយតបនឹងប្រាក់បៀរវត្សមន្ដ្រីរាជការ ក៏ដូចជាកិច្ចថែរក្សាកំណើនសេដ្ឋកិច្ចប្រកបដោយចីរភាព ដែលកម្ពុជាជាម្ចាស់កម្មសិទ្ធិ។
សម្ដេចតេជោក៏បានបង្ហាញនូវគោលជំហរម៉ឺងម៉ាត់ ក្នុងកិច្ចថែរក្សាសន្ដិភាព “មិនអនុញ្ញាតឱ្យជនណាមួយ មានឱកាសបំផ្លាញសន្ដិភាព និងស្ថិរភាពកម្ពុជាបានឡើយ ហើយក៏មិនឱ្យឱកាសដល់ជនណា អង្គការណា ឬបរទេសណា ជ្រៀតជ្រែកក្នុងភាពកំរោលណាមួយបានឡើយ។
