ភ្នំពេញ ៖ សាលារាជធានីភ្នំពេញប្រាប់ម្ចាស់រោងចក្រ សហគ្រាស ឃ្លាំងស្តុកទំនិញ និងយានដ្ឋានជួសជុលរថយន្តខ្នាតធំ ដែលស្ថិតក្នុងតំបន់ប្រជុំជននៃរាជធានីភ្នំពេញ ឱ្យរៀបចំផ្លាស់ប្ដូរទីតាំងអាជីវកម្មរបស់ខ្លួនទៅតំបន់ជាយក្រុងវិញ។
នៅក្នុងសេចក្ដីជូនដំណឹងរបស់សាលាក្រុងភ្នំពេញនៅថ្ងៃទី២៦ កុម្ភៈ អភិបាលក្រុងភ្នំពេញលោក ឃួង ស្រេងបាន បញ្ជាក់ពីមូលហេតុថា៖ការអនុវត្តបែបនេះ គឺដើម្បីរក្សាសុវត្ថិភាព សណ្ដាប់ធ្នាប់ និងរបៀបរៀបរយសាធារណៈ ព្រមទាំងបញ្ចៀសបាននូវការកកស្ទះចរាចរណ៍ និងកាត់បន្ថយគ្រោះថ្នាក់ចរាចរណ៍ ដែលនៅតែមានចំនួនកើនឡើងគួរឱ្យកត់សម្គាល់ នៅក្នុងរាជធានីភ្នំពេញ។
សូមបញ្ជាក់ថាទីតាំងជាយក្រុងដែលអាជ្ញាធរស្នើឡើងនោះ គឺស្ថិតនៅតាមបណ្ដោយផ្លូវក្រវាត់ក្រុងទី៣ កាត់រាជធានីភ្នំពេញ និងខេត្តកណ្ដាល ចាប់ពីចំណុចស្ពានព្រែកព្នៅ ផ្លូវទំនប់កប់ស្រូវ ផ្លូវជាតិលេខ៤ ត្រង់ចំណុចគីឡូម៉ែត្រលេខ១៤ ដល់ ១០៥ ទៅភ្ជាប់ផ្លូវជាតិលេខ១ ត្រង់គីឡូម៉ែត្រលេខ ២៤ ដល់ ៨៤០ ដោយកាត់ផ្លូវជាតិលេខ៣ ផ្លូវជាតិលេខ២ និងផ្លូវជាតិលេខ២១។
សាលាក្រុងភ្នំពេញអះអាងថា ក្រោយពេលផ្លូវក្រវាត់ក្រុងទី៣ នេះសាងសង់រួចរាល់នៅឆ្នាំ ២០២១ ខាងមុខ អាជ្ញាធរនឹងហាមឃាត់រថយន្តធុនធំគ្រប់ប្រភេទទាំងអស់ ឱ្យចរាចរចូលក្នុងរាជធានីភ្នំពេញទៀតឡើយ។
