ប្រទេសអាល្លឺម៉ង់៖ នៅក្នុងសំណេរជាងពីរបន្ទាត់នៅលើទំព័រហ្វេសប៊ុក ស្ថានទូតអាល្លឺម៉ង់ប្រចាំកម្ពុជា សសេរថា៖ កម្ពុជានៅតែមានឱកាសទទួលបានការអនុគ្រោះពន្ធហៅកាត់ថាEBAដើម្បីនាំទំនិញទៅកាន់ទីផ្សារអឺរ៉ុបដដែល។ នោះប្រសិនបើកម្ពុជាបើកចំហបរិយាកាសនយោបាយ និងសិទ្ធិសង្គមស៊ីវិលឡើងវិញ។
បើតាមស្ថានទូតនេះជាការលើកឡើងដោយ លោកណូបែរបាថឹល( Nobert BARTHLE )សមាជិកសហព័ន្ធអាល្លឺម៉ង់ និងជារដ្ឋលេខាធិការក្រសួងសហប្រតិបត្តិការ នៃប្រទេសអាល្លឺម៉ង់ ក្នុងជំនួបជាមួយជាមួយសម្តេចនាយករដ្ឋមន្ត្រី ហ៊ុន សែន កាលពីថ្ងៃចន្ទទី២៥កុម្ភៈឆនាំ២០១៩។ បើតាមស្ថានទូតអាល្លឺម៉ង់បន្ថែមថា៖ «យើងត្រូវកសាងទំនុកចិត្តឡើងវិញនិងស្វែងរកដំណោះស្រាយ»។
ផ្ទុយពីទូតអាល្លឺម៉ង់ នៅលើទំព័រហ្វេសប៊ុករបស់សម្តេចហ៊ុន សែន វិញ ពុំមានឃើញលើកឡើងពីបញ្ហាEBAនេះទេនៅក្នុងជំនួបជាមួយលោក លោកណូបែរបាថឹល( Nobert BARTHLE )សមាជិកសហព័ន្ធអាល្លឺម៉ង់ និងជារដ្ឋលេខាធិការក្រសួងសហប្រតិបត្តិការ នៃប្រទេសអាល្លឺម៉ង់នោះ។ ប៉ុន្តែបានបញ្ជាក់សារជាថ្មីថា អាល្លឺម៉ង់នៅគាំទ្រ និងបន្តសហការជាមួយកម្ពុជា ក្នុងការជួយដល់វិស័យកសិកម្ម អគ្គិសនីការប្រើប្រាស់ផ្ទាំងសូឡា ប្រព័ន្ធស្រោចស្រពទឹក និងជំរុញការវិនិយោគនៅប្រទេសកម្ពុជា ព្រមទាំងជួយដោះស្រាយបញ្ហាការកកស្ទះចរាចរណ៍ផងដែរ។
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជាបានអះអាងជាមួយកាសែតថាលោកមិនបានដឹងអ្វីដែលអាល្លឺម៉ង់លើកឡើងនោះទេ ប៉ុន្តែលោកបញ្ជាក់ថា កម្ពុជានៅតែរក្សាដូចមុនដដែល។
សូមបញ្ជាក់ថា អាល្លឺម៉ង់ គឺជាសមាជិកសំខាន់មួយរបស់សហភាពអឺរ៉ុប។ សហភាពអឺរ៉ុប កាលពីថ្ងៃទី១១ ខែកុម្ភៈឆ្នាំ២០១៩ បានប្រកាសអំពីការចាប់ផ្ដើមនីតិវិធីរបស់ខ្លួនឈានទៅព្យួរជាបណ្ដោះអាសន្ននូវប្រព័ន្ធអនុគ្រោះពន្ធលើទំនិញទាំងអស់លើកលែងតែអាវុធពីកម្ពុជាឬហៅកាត់ថាEBA។
ដោយឡែក សមាជិកសភាអាមេរិកពីររូប គឺ លោក Alan Lowenthal និង លោក Steve Chabot កាលពីថ្ងៃអង្គារ ក៏បានដាក់សេចក្តីស្នើច្បាប់របស់ខ្លួនដោយជំរុញឲ្យ លោក ដូណាល់ ត្រាំ ពិនិត្យលើប្រព័ន្ធអនុគ្រោះពន្ធដល់កម្ពុជា ដោយអះអាងថា កម្ពុជាមានការរំលោភសិទ្ធិមនុស្ស និងសិទ្ធិការងារ៕
