ក្រចេះ ៖ ឯកឧត្តម វ៉ា ថន អភិបាលខេត្តនៃគណៈអភិបាលខេត្តក្រចេះ បានមានប្រសាសន៍ លើកឡើងថា ទីក្រុងបៃតង គឺជាទីក្រុងដែលគ្មានសំរាម ដោយរក្សាបានកំណើនទេសចរណ៍ ជារៀងរាល់ឆ្នាំ ហើយវិស័យទេសចរណ៍កម្ពុជា បាននឹងកំពុងបោះជំហានរីកចម្រើនយ៉ាង ខ្លាំងជាលំដាប់ ។ ព្រមជាមួយគ្នានេះ វិស័យទេសចរណ៍ ក៏ត្រូវបានកំណត់ជាវិស័យអាទិភាព និងជាមាសបៃតង ដោយសារវិស័យនេះមិនត្រឹមតែបង្កើតការងារ លើកកកម្ពស់ជីវភាពរស់នៅ របស់ប្រជាពលរដ្ឋ និងបង្កើនប្រាក់ចំណូលជាតិប៉ុណ្ណោះទេ ថែមទាំងទាក់ទាញការវិនិយោគ ផ្ទាល់ទាំងក្នុងនឹងក្រៅស្រុក ព្រមទាំងលំហូរចូលនូវរូបិយប័ណ្ណអន្តរជាតិ ដែលជាកត្តារួម ចំណែកដល់ការអភិវឌ្ឍសេដ្ឋកិច្ច និងសង្គមកម្ពុជា ។
ដូច្នេះទាមទារឲ្យយើងមានការយកចិត្តទុកដាក់ខ្ពស់ក្នុងការគិតគូរឱ្យបានដិតដល់អំពីបញ្ហាសណ្ដាប់ធ្នាប់សំណល់រឹង រាវ បរិស្ថានអនាម័យសន្តិសុខ និងសុវត្ថិភាព សាធារណៈ ការអភិវឌ្ឍហេដ្ឋារចនាសម្ព័ន្ធ សំខាន់ការបង្កើតតំបន់កម្សាន្តបៃតង និងបង្កើតសកម្មភាព កម្សាន្តឲ្យបានសម្បូរបែបដើម្បីផ្ដល់ភាពទាក់ទាញផាសុកភាព និងភាពរីករាយដល់ ប្រជាពលរដ្ឋភ្ញៀវទេសចរដែលចូលមកកំសាន្តនិងសំរាកលំហែនៅខេត្ត ។ នៅរដូវធ្លាក់ភ្លៀង សូមចូលរួមដាំដើមឈើទាំងអស់គ្នា នៅតាមមន្ទីរ សាលារៀន និងតាមដងផ្លូវផងដែរ ។
ឯកឧត្តម វ៉ា ថន អភិបាលខេត្តក្រចេះ មានប្រសាសន៍បែបនេះ នៅព្រឹកថ្ងៃទី២៦ ខែកុម្ភៈ ឆ្នាំ២០១៩ ក្នុងឱកាសដែល អាជ្ញាធរខេត្តក្រចេះ រួមនឹងមន្ត្រីរាជការគ្រប់លំដាប់ថ្នាក់ មន្ទីរអង្គភាពពាក់ព័ន្ធ និងយុវជនប្រមាណជាង ៥០០នាក់ រួមគ្នាបោសសំអាតនៅតាមដង ផ្លូវទីសាធារណៈ ដើម្បីអបអរសាទរទិវាតិទីក្រុងស្អាតលើកទី៧ ក្រោមប្រធានបទ “ទីក្រុងស្អាត៖ ទីក្រុងផ្តល់ភាពកក់ក្តៅ” ឆ្នាំ២០១៩ ។
ឯកឧត្តម បានបញ្ជាក់ថា ដើម្បីសម្រេចបានគោលបំណងនៃការប្រកួតប្រជែងចលនា ទីក្រុងស្អាត ទទួលបានរំដួល៣ទង គឺតម្រូវឲ្យយើងទាំងអស់រួមគ្នាចូលរួម យកចិត្តទុកដាក់ ខ្ពស់ក្នុងការរៀបចំផែនការអភិវឌ្ឍន៍ និងគ្រប់គ្រងទីក្រុងឱ្យបានត្រឹមត្រូវហ្មត់ចត់ និងមានកិច្ចសហការល្អពីគ្រប់ស្ថាប័នពាក់ព័ន្ធគ្រប់លំដាប់ថ្នាក់ ព្រមទាំងម្ចាស់អាជីវកម្ម សេវាកម្មទេសចរណ៍ ផ្តល់សេវាសាធារណៈ ប្រកបដោយបដិសណ្ឋារកិច្ចល្អ ។ ឯកឧត្តម ក៏បានអំពាវនាវដល់បងប្អូនប្រជាពលរដ្ឋ ត្រូវចូលរួមផ្សព្វផ្សាយ និងអនុវត្តន៍ឲ្យបានផុលផុស ក្នុងការថែរក្សាបរិស្ថាន អនាម័យ និងសោភ័ណ្ឌភាព ធ្វើអោយទីក្រុងរបស់យើងកាន់តែស្អាត ឡើង៕
ដោយ កិះ ខន