ក្រចេះ៖ ឯកឧត្តមរដ្ឋលេខាធិការ លឹម ស៊ីដេនីន រួមទាំងក្រុមហ៊ុនចិនសៀងហៃ (SCG) បានចូលរួមអមដំណើរពី ទីភ្នាក់ងារសហប្រតិបត្តិការអភិវឌ្ឍអន្តរជាតិចិន (China International Development Cooperation Agency-CIDCA) បានចុះត្រួតពិនិត្យស្ថានភាព គម្រោងស្តារកំណាត់ផ្លូវជាតិលេខ៧ ពីខ្លាស្ទុះ ដល់រមៀត ឃុំអូរគ្រៀង ប្រវែង ៩៣.៥៦៥គម ដើម្បីវាយតម្លៃ និងឈានដល់ការសម្រេចផ្តល់ឥណទានជំនួយឥតសំណងបន្តស្តារកំណាត់ផ្លូវ ដែលនៅសល់ប្រវែង ប្រមាណ៩៦ គីឡូម៉ែត្រទៀត ពីរមៀត ដល់ព្រំប្រទល់ឡាវ កាលពីរសៀលថ្ងៃទី២៥ ខែកុម្ភៈ ឆ្នាំ២០១៩នេះ ។
ខណៈដែលព្រះរាជាណាចក្រកម្ពុជា មានសុខសន្តិភាព ស្ថេរភាពនយោបាយសង្គម និងឯករាជ្យពេញលិញ កត្តាសន្តិភាព បានជម្រុញឲ្យប្រទេសជាតិ មានការអភិវឌ្ឍន៍រីក ចម្រើនលើគ្រប់វិស័យ ជាពិសេសវិស័យប្រព័ន្ធគមនាគមន៍ ដែលជាចរន្តសរសៃឈាម សេដ្ឋកិច្ចដ៏សំខាន់របស់ប្រទេសជាតិ បាននិងកំពុងអភិវឌ្ឍន៍រីកចម្រើនគ្រប់ទីកន្លែង ដែលបានតភ្ជាប់ពី រាជធានីទៅតាមបណ្តាខេត្ត ក្រុង ស្រុក ខ័ណ្ឌ រហូតដល់ជនបទ ។
ជាក់ស្ដែង កំណាត់ផ្លូវជាតិលេខ៧ ពីចំនុចគីឡូម៉ែត្រលេខ៣៣១ (រង្វង់មូលខ្លាស្ទុះ) ស្ថិតក្នុងភូមិកាប៉ូ សង្កាត់អូរឬស្សី ក្រុងក្រចេះ រហូតដល់ចំនុចគីឡូម៉ែត្រលេខ៤២៤ ចំនុចឃុំអូរគ្រៀង ស្រុកសំបូរ ប្រវែង ៩៣.៥៦៥គម ត្រូវបានស្ដារឡើងវិញចាប់តាំពីខែមេសា ឆ្នាំ២០១៦ និងស្ថាបនាជួសជុលរួចរាល់ជាស្ថាពរ នៅក្នុងខែធ្នូ ឆ្នាំ២០១៨កន្លងទៅ ។
ក្នុងដំណើរចុះទស្សនៈកិច្ចត្រួតពិនិត្យស្ថានភាព គម្រោងស្តារកំណាត់ផ្លូវជាតិលេខ៧ នារសៀលនោះដែរ ឯកឧត្តមរដ្ឋលេខាធិការ លឹម ស៊ីដេនីន បានស្នើដល់ភាគីចិន ឲ្យសម្រេចផ្តល់ឥណទានជំនួយឥតសំណងបន្តជំហ៊ាន២ ដើម្បីស្តារកំណាត់ផ្លូវដែលនៅសល់ ប្រវែង ប្រមាណ៩៦ គីឡូម៉ែត្របន្ត ពីរមៀត ដល់ព្រំប្រទល់ឡាវ ។
ឯកឧត្តម បានមានប្រសាសន៍កោតសរសើរ និងថ្លែងអំណរគុណយ៉ាងជ្រាលជ្រៅចំពោះ ភាគីចិនដែលបានផ្តល់ឥណទានជំនួយឥតសំណងស្ដារផ្លូវជាតិលេខ៧ នេះ ល្អឥតខ្ចោះ ទាំងគុណភាព បរិស្ថាន និងបរិក្ខាផ្លូវមានគ្រប់គ្រាន់ ។
ជាមួយគ្នានោះ ឯកឧត្តម លឹម ស៊ីដេនីន ក៏បានអំពាវនាវ ដល់ម្ចាស់អាជីវកម្ម ម្ចាស់យានយន្ត ធុនធំគ្រប់ប្រភេទ ដែលកំពុងចរាចណ៍ ប្រើប្រាស់លើដងផ្លូវជាតិទាំងអស់ សូមកុំឲ្យដឹកជញ្ជូន ផ្ទុកលើសចំនួនច្បាប់កំណត់ និងចូលរួមថែរក្សា ការពារនូវសមិទ្ធផលនានា ជាពិសេស សមិទ្ធផលផ្លូវជាតិលេខ៧នេះតែម្ដង ដែលជាជំនួយឥតសំណងលើកទីមួយរបស់ចិន មកកម្ពុជា និងជាប្រយោជន៍សាធារណៈសម្រាប់បងប្អូនប្រជាពលរដ្ឋយើងប្រើប្រាស់ នៅគង់វង្ស បានយូរអង្វែង និងងបញ្ចៀសនូវគ្រោះ ថ្នាក់ចរាចរណ៍តាមដងផ្លូវជាតិ ដែលកើតឡើងជាយថាហេតុ៕
ដោយ កិះ ខន