ភ្នំពេញ ៖ លោកជំទាវកិត្តិសង្គហបណ្ឌិត ម៉ែន សំអន សមាជិកាគណៈកម្មាធិការកណ្តាលគណបក្សប្រជាជនកម្ពុជា និងប្រធានគណៈចលនាមហាជនផ្តាំឲ្យយុវជនគណបក្សប្រជាជនក្តាប់ជាប់ប្រសាសន៍តេជោ!។
ក្នុងកម្មវិធីជួបជុំជាមួយថ្នាក់ដឹកនាំយុវជនគណបក្សទូទាំងប្រទេស ព្រឹកថ្ងៃអាទិត្យ ៥រោច ខែមាឃ ឆ្នាំច សំរិទ្ធិស័ក ព.ស.២៥៦២ ត្រូវនឹងថ្ងៃទី២៤ ខែកុម្ភៈ ឆ្នាំ២០១៩ នៅសាលមហោស្រពកោះពេជ្រ លោកជំទាវមែនសមអនបានមានប្រសាសន៍ថា ប្រទេសជាតិមានសុខសន្តិភាព និងមានការអភិវឌ្ឍន៍គ្រប់ទីកន្លែងដូចបានឃើញស្រាប់នាពេលបច្ចុប្បនេះបានផ្ដល់អត្ថប្រយោជន៍ដ៏សំខាន់សម្រាប់ប្រជាពលរដ្ឋទូទាំងប្រទេស ពិសេស យុវជនយើងនេះទទួលបាននូវចំណេះដឹងនិងជំនាញដើម្បីបំពេការងារគ្រប់វិស័យ។
លោកជំទាវក៏បានលើកឡើងអំពីស្ថានភាពនយោបាយនៅពេលបច្ចុប្បន្ននេះមានការវិវត្តន៍គួរឱ្យកត់សម្គាល់ ពិសេស ការសម្រេចរបស់គណៈកម្មការអឺរ៉ុបលើការចាប់ផ្តើមនីតិវិធីនៃការព្យួរ EBA (គ្រប់មុខទំនិញលើកលែងតែអាវុធ) ការបំភ្លៃព័ត៌មានអំពីការបោះទីតាំងទ័ពបរទេសក្នុងទឹកដីកម្ពុជា បញ្ហានិន្នាការនយោបាយសកល និងការបំផុសបញ្ហាមួយចំនួនក្នុងប្រទេស ក្នុងបំណងធ្វើឱ្យប៉ះពាល់សតិអារម្មណ៍មហាជន ពិសេស យុវជននៅប្រទេសកម្ពុជាតែម្តង។
លោកជំទាវក៏បានលើកពីប្រសាសន៍ដឹក នាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងជាប្រ ធា នគណបក្ស ដែលបញ្ជាក់ថា៖
«មិនត្រូវយកអធិបតេយ្យភាពរបស់យើង ទៅដោះដូរជាមួយជំនួយណាមួយនោះឡើយ»
«ត្រូវរស់ដោយអុកស៊ីសែនខ្លួនឯង ដោយមិនត្រូវពឹងនូវខ្យល់ដែលគេបញ្ចូលឱ្យយើងនោះទេ»
«ទោះមាន ឬគ្មាន EBA វាក៏មិនធ្វើឱ្យយើងស្លាប់ តែវាក៏មិនធ្វើឱ្យយើងក្លាយជាអ្នកមានបានដែរ»។
ក្នុងនាមគណៈចលនាមហាជនគណៈកម្មាធិការកណ្តាលគណបក្ស លោកជំទាវកិត្តិសង្គហបណ្ឌិត ក៏បានសំណូមពរឲ្យឯកឧត្តម លោកជំទាវ លោក លោកស្រី ដែលបានអញ្ជើញចូលរួមថ្ងៃនេះ ត្រូវត្រង់ត្រាប់ស្តាប់នូវបទឧទ្ទេសនាមរបស់វាគ្មិន ដើម្បីធ្វើជាមូលដ្ឋានក្នុងការយកទៅផ្សព្វផ្សាយបន្តទៀត ៕