ខេត្តមណ្ឌលគិរី ៖ សត្វដំរីព្រៃដ៏ធំមួយក្បាលត្រូវបានគេឃើញដេកងាប់នៅជិតចំការស្វាយចន្ទី របស់អ្នកភូមិក្នុងដែនម្រកការពារសត្វព្រៃកែវសីមា ។នៅវេលាម៉ោង១១ និង១៥នាទីព្រឹកថ្ងៃទី២៤ ខែកុម្ភ: ឆ្នាំ២០១៩ កម្លាំងជំនាញនៃអធិការដ្ឋាន សហការជាមួយកម្លាំងប៉ុស្តិ៍នគរបាលរដ្ឋបាលស្រែខ្ទុម និងកម្លាំងអនុរក្សសត្វដំរី បានចុះទៅដល់កន្លែងសត្វដំរីងាប់ នៅចំណុចក្នុងចំការស្វាយចន្ទីរប្រជាពលរដ្ឋ ស្ថិតក្នុងភូមិស្រែល្វី ឃុំស្រែខ្ទុម ស្រុកកែវសីមា ខេត្តមណ្ឌលគិរី។
បើតាមការសន្និដ្ឋាន គឺដំរីមួយក្បាលនេះបានស្លាប់អស់រយៈពេលជិត១០ថ្ងៃមកហើយ វា មានកម្ពស់២,៧០ម៉ែត្រ ប្រវែង៤,៥០ម៉ែត្រ និងទទឹង១,៥០ម៉ែត្រ។ម្ចាស់ចំការស្វាយចន្ទីវិញអះអាងថា ចំការរបស់គាត់បានម៉ៅឲ្យទៅគេអស់ហើយ ក្នុងរដូវកាលប្រមូលផលស្វាយចន្ទី តែជាទូទៅសត្វដំរីព្រៃតែងតែចូលទៅចំការស្វាយចន្ទី ហើយស៊ីផ្លែនៅរដូវប្រមូលផលនេះ។
ទោះជាយ៉ាងណានៅរសៀលថ្ងៃទី ២៤ ខែកុម្ភៈ នេះលោកនេត្រ ភក្ត្រា អ្នកនាំពាក្យក្រសួងបរិស្ថានបានប្រាប់ ថា ក្រោយពីការក្រឡាប់និងពិនិត្យ ទៅលើដងខ្លួនសត្វដំរីដែលបានងាប់នោះ គឺមានស្លាកស្នាមប្រវែងមួយចំអាមនៅក្រោមភ្នែក ពោលគឺមានធ្លុះចូលទៅក្នុង ដែលជំនាញសន្និដ្ឋានថា នេះគឺជាការបាញ់សម្លាប់សត្វដំរីដើម្បីយកភ្លុក ហើយដំរីដែលត្រូវបាញ់សម្លាប់ គឺជាដំរីឈ្មោល ហើយសត្វដំរីនេះមានវ័យចំណាស់។ ហើយកំពុងតែធ្វើការពិនិត្យជុំវិញកន្លែងដែលដំរីងាប់ដើម្បីរកដានអ្នកដែលបាញ់សត្វដំរីអោយងាប់កាត់យកភ្លុក។
ចំពោះសត្វដំរីដែលងាប់ នឹងយកទៅកប់នៅកន្លែងសុវត្ថិភាពមួយ ដើម្បីរក្សាគ្រោងឆ្អឹង ដើម្បីយកទៅរក្សាទុក ធ្វើការស្រាវជ្រាវជាបន្តទៀត ។ ក្រសួងបរិស្ថានក៏បានធ្វើការថ្កោលទោស ជនដែលបានបាញ់សម្លាប់សត្វដំរីយកភ្លុក ហើយខាងសមត្ថកិច្ចជំនាញកំពុងធ្វើការបន្តនីតិវិធី ដើម្បីស្រាវជ្រាវរកអ្នកដែលបាញ់សត្វដំរីយកមកផ្តន្ទាទោស និងសូមអំពាវនាវឲ្យប្រជាពលរដ្ឋទាំងអស់ ចូលរួមនិងការពារអភិរក្សធនធានធម្មជាតិ ការពារសត្វព្រៃ ។
សូមបញ្ជាក់ថានៅខេត្តមណ្ឌលគិរីដែលមានសត្វដំរីព្រៃរស់នៅច្រើនមានសត្វដំរីងាប់ជាបន្តបន្ទាប់។កាលពីឆ្នាំ២០១៧មានដំរី៤ក្បាលបានងាប់។យោងតាមរបាយការណ៍របស់មន្ទីរបរិស្ថានខេត្តមណ្ឌលគិរី ក្នុងដែនជម្រកសត្វព្រៃទូទាំងខេត្តមានសត្វដំរីប្រមាណជាង២០០ក្បាល ដែលចំនួននេះមន្ត្រីជំនាញនៅបន្តតាមដាន ដើម្បីដឹងថា កើនឡើង ឬថយចុះពីវត្តមានរបស់ពួកវានៅក្នុងព្រៃ។
កាលពីថ្ងៃទី២៥ ខែមីនា ឆ្នាំ២០១៧ មានសត្វដំរីព្រៃចំនួន ១១ក្បាលបានធ្លាក់ទៅក្នុងរណ្តៅស្រះមួយដែលបន្សល់ទុកពីសម័យសង្គ្រាមទម្លាក់គ្រាប់បែក ស្ថិតក្នុងព្រៃភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី ខណៈសត្វដំរីទាំងនោះអាចប្រឈមនឹងគ្រោះថ្នាក់ដល់ជីវិត ប្រសិនបើកិច្ចអន្តរាគមន៍សង្គ្រោះមិនទាន់ពេលវេលា។
ដំរីចិញ្ចឹមមួយក្បាលឈ្មោះជីលុត អាយុ៨៥ឆ្នាំបានស្លាប់នៅឆ្នាំ២០១៧។. នៅមណ្ឌលគិរីនៅសល់ដំរី៤១ក្បាលទៀត ជាកម្មសិទ្ធិរបស់បងប្អូនជនជាតិដើមភាគតិច ដែលភាគច្រើននៃដំរីទាំងនោះត្រូវបានដាក់អោយបំរើក្នុងអាជីវកម្មទេសចរណ៍។ … បន្ទាប់មកនៅឆ្នាំ២០១៨ដំរីមួយក្បាលដែលចុះព្រេងសម្លាប់ម្ចាស់ត្រូវបានអាជ្ញាធរបាញ់សម្លាប់។
គួរបញ្ជាក់ថានៅក្នុងប្រទេសកម្ពុជាគឺតាមការសន្និដ្ឋានរបស់មន្ត្រីជំនាញមានសត្វដំរីប្រមាណជាជាង៥០០ ក្បាលប៉ុណ្ណោះ កំពុងរស់នៅ៕
