មណ្ឌលគិរី៖ ទីតាំងលេងល្បែងជល់មាន់មួយស្ថិតក្រោមឈ្មោះកាស៊ីណូនៅក្នុងព្រៃចម្ការស្រល់មួយកន្លែង ដែលមានទីតាំងនៅភូមិពូត្រែង ឃុំដាក់ដាំ ស្រុកអូររាំង ខេត្តមណ្ឌលគិរីបានកំពុងបើកឲ្យជនជាតិខ្មែរចូលលេងសេរីជារៀងរាល់ថ្ងៃ ផ្ទុយពីបំរាមនាយករដ្ឋមន្ត្រីដែលហាមមិនឲ្យខ្មែរលេង។
ជាក់ស្តែងតាមចំណារឯកភាពរបស់ទីស្តីការគណៈរដ្ធមន្ត្រី លេខ១៧៧៤ សជណ ចុះថ្ងៃទី៣១ ខែធ្នូ ឆ្នាំ២០១៤ ដែលមានចុះហត្ថលេខាដោយលោក ហ៊ីង ថូរ៉ាក់ស៊ី រដ្ធលេខាធិការ ទីស្តីការគណៈរដ្ឋមន្ត្រី គោរពជូន ឯកឧត្តម ឧបនាយករដ្ឋមន្ត្រី រដ្ធមន្ត្រីក្រសួងមហាផ្ទៃ – ឯកឧត្តមរដ្ធមន្ត្រី ក្រសួងសេដ្ឋកិច្ច និងហិរញ្ញវត្ថុ – ឯកឧត្តមអភិបាល នៃគណៈអភិបាលខេត្តមណ្ឌលគិរី និងយោង÷
-លិខិតចុះថ្ងៃទី២៦ ខែធ្នូ ឆ្នាំ២០១៤ របស់លោក តែ សេងអូន ប្រធានក្រុមប្រឹក្សាភិបាលក្រុមហ៊ុន រីសត អហ្វ មណ្ឌលគីរី អេនធើធេនមុិន ខូអិលធីឌី (Risort of modolkiri Entertainment co.ltd)
-លិខិតចុះថ្ងៃទី៣០ ខែធ្នូ ឆ្នាំ២០១៤ របស់ឯកឧត្តមរដ្ធលេខាធិការ ទីស្តីការគណៈរដ្ឋមន្ត្រី
-ចំណាររបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ចុះថ្ងៃទី៣០ ខែធ្នូ ឆ្នាំ២០១៤ បានជម្រាបជូនថា ចំពោះសំណើររបស់ក្រុមហ៊ុន រីសត អហ្វ មណ្ឌលគីរី អេនធើធេនមុិន ខូអិលធីឌី (Risotto of modolkiri Entertainment co.ltd) សុំអនុញ្ញាតជាគោលការណ៏សាងសង់មជ្ឈមណ្ឌលទេសចរណ៍ មជ្ឈមណ្ឌលកំសាន្ត រួមមាន÷ សណ្ឋាគារខ្នាតអន្តរជាតិ ផ្សារអន្តរជាតិ ហាងលក់ទំនិញរួចពន្ធ ភោជនីយដ្ឋាន មជ្ឍមណ្ឌលកំសាន្តនានា រង្គសាលទាន់សម័យ ក្លឹបម៉ាស្សា ខារ៉ាអូខេ ល្បែងកូនហ្គោល បក្សីកីឡា ប្រណាំងសេះ/ឆ្កែ ឆ្នោតផ្សងសំណាង ល្បែងអនឡាញតាមប្រព័ន្ធអ៊ិនធើណេត ស្លុតម៉ាស៊ីនអេឡិចត្រូនិកគ្រប់ប្រភេទ តាមប្រព័ន្ធអ៊ិនធើណេត ក្នុងនិងក្រៅប្រទេស កីឡាភ្នាល់គ្រប់ប្រភេទ(sport betting) និងក្លឹបល្បែងផ្សងសំណាងគ្រប់ប្រភេទ(casino) មានលក្ខណៈអចិន្ត្រៃយ៍ដែលរដ្ធទទួលស្គាល់មានទីតាំងស្ថិតនៅ ច្រកព្រំដែនដាក់ដាំ ឃុំដាក់ដាំ ស្រុកអូររាំង ខេត្តមណ្ឌលគិរី (ព្រំប្រទល់កម្ពុជា-វៀតណាម) នោះ។
រាជរដ្ឋាភិបាលបានសម្រេចដូចខាងក្រោម÷
-យល់ព្រមតាមសំណើរ។
-ក្រុមហ៊ុនត្រូវរៀបចំបែបបទជាមួយក្រសួងសេដ្ឋកិច្ចនិងហិរញ្ញវត្ថុ។
-ទីតាំងសាងសង់ត្រូវមានការឯកភាពពីអាជ្ញាធរ។
-ហាមពលរដ្ធខ្មែរចូលលេងល្បែងក្នុងកាស៊ីណូ។
ដោយឡែកក្រោយទទួលបានចំណារឯកភាពពី ទីស្តីការគណៈរដ្ធមន្ត្រី លិខិត ១៧៧៤ ចុះថ្ថៃទី៣១ ខែធ្នូ ឆ្នាំ២០១៤ អភិបាលខេត្តមណ្ឌលគិរី លោក ស្វាយ សំអៀង ក៏បានចារឯកភាពលើសំណើរសុំច្បាប់អនុញ្ញាតសាងសង់ និង បើកដំណើរការ មជ្ឈមណ្ឌលកំសាន្ត ល្បែងភ្នាល់ តាមរយះអាជីវកម្មដោយផ្ទាល់គ្រប់ប្រភេទរបស់ក្រុមហ៊ុន រីសត អហ្វ មណ្ឌលគិរី អេនធើធេនម៉ិន (Risort of moldolkiri Entertainment co.ltd) លិខិតលេខ២២៦/អនញ ចុះថ្ងៃទី១១ ខែកុម្ភៈ ឆ្នាំ២០១៩។
បើយោងទៅតាម សជណ លេខ១៧៧៤ ចុះថ្ងៃទី៣១ ខែធ្នូ ឆ្នាំ២០១៤ របស់ទីស្តីការគណៈរដ្ឋមន្ត្រីនៅ ត្រង់ចំនុចទី៤គឺហាមមិនអោយពលរដ្ធខ្មែរចូលលេងល្បែងក្នុងកាស៊ីណូឡើយ ដូច្នេះអាជ្ញាធរមានសមត្ថកិច្ច ជាពិសេសលោក ស្វាយ សំអៀង ក្នុងនាមជាគណបញ្ជាការឯកភាពខេត្ត គួរតែមានវិធានការចំពោះកាស៊ីណូខាងលើដែលបានបំពានទៅនិង សជណ របស់ទីស្តីការគណៈរដ្ធមន្ត្រី។
ជាងនេះបនល្បែងនេះត្រូវមានទីតាំងស្ថិតនៅច្រកព្រំដែនដាក់ដាំ ក្នុងឃុំដាក់ដាំ ស្រុកអូររាំង ខេត្តមណ្ឌលគិរី ព្រំប្រទល់កម្ពុជាវៀតណាម តែគេបែរជាឃើញលិខិតមួយរបស់ឈ្មោះឈុនសំអឿនក្នុងនាមក្រុមហ៊ុនខាងលើបាន ស្នើសុំទៅចៅហ្វាយខេត្តមណ្ឌលគិរី ដើម្បី សុំអនុញ្ញាត ច្បាប់សាងសង់ នឹងបើកដំណើរការមជ្ឈមណ្ឌលកម្សាន្ត នៅភូមិពូត្រែង ឃុំដាក់ដាំ ស្រុកអូររាំង ដែលមានចម្ងាយផ្លូវប្រមាណជាង១០គីឡូម៉ែត្រពីព្រំដែនកម្ពុជាវៀតណាម ដែលទើបចុះថ្ងៃទី៨ ខែកុម្ភៈ ឆ្នាំ២០១៩ទៅវិញ។ចៅហ្វាយខេត្តលោកស្វាយសំអ៊ាងដែលគេជឿថាមានលាភសក្ការៈបានឯកភាពចឹងទៅ។
អាឡុវអ្វីដែលចាប់អារម្មណ៍នៅត្រង់ថាបនដែលជ្រកក្រោមឈ្មោះកាស៊ីណូដែលកំពុងបើកដំណើរការលេង ក្នុងទីតាំងខាងលើនេះ ក្រៅពីធ្វើសកម្មភាពផ្ទុយពីច្បាប់អនុញ្ញាត ដែលទីស្ដីការគណៈរដ្ឋមន្ត្រី សម្រេចឲ្យដោយត្រូវធ្វើការសាងសង់សំណង់ casino នៅនឹងព្រំដែនដាក់ដាំ ហើយបែជាឃុបឃឹតជាមួយចៅហ្វាយខេត្តទៅធ្វើ កន្លែងកាស៊ីណូ នៅជិតភូមិឋានរបស់អ្នកភូមិ និងថែមទាំងអនុញ្ញាតឲ្យជនជាតិខ្មែរ ចូលលេងសេរី មានតាំងពី ល្បែងជល់មាន់ អាប៉ោង ដែលផ្ទុយពីច្បាប់អនុញ្ញាតថែមទៅទៀត។ ជាក់ស្តែងពលរដ្ឋខ្មែររាប់រាយនាក់បានសម្រុកទៅលេងល្បែងនៅក្នុងកាស៊ីណូមួយនេះ ដែលស្ទើរតែគ្មានវត្តមានជនបរទេស(យួន)សូម្បីម្នាក់។
មិនត្រឹមតែប៉ុណ្ណោះម្ចាស់កាស៊ីណូនេះ មិនបាន គោរពទៅតាមគោលការណ៍ ដែលច្បាប់បានអនុញ្ញាតនោះទេតែគេគ្រាន់តែសាងសង់រោងជល់មាន់មួយកន្លែងសម្រាប់ ភ្នាល់ ដោយគេមិនបាន សាងសង់សំណង់បច្ចេកទេស តាមលិខិតស្នើសុំរបស់ខ្លួនឡើយ។ទង្វើខុសច្បាប់ខាងលើនេះបើមេបនវាមិនចិញ្ចឹមអាជ្ញាធរខេត្តមានប៉ូលិសប៉េអឹមទេវាមិនអាចប្រព្រឹត្តទៅបានឡើយ។
ប្រជាពលរដ្ឋខេត្តមណ្ឌលគីរីនិយាយដោយមោទនៈភាពថាស្រុកគាត់ក្រៅពីព្រៃឈើដែលជាឆ្នាំងបាយអាជ្ញាធរនិងសមត្តកិច្ចជំនាញអាឡូវមានបនល្បែងមួយទៀតត្រូវបានបង្កើតឡើងដើម្បីជាឆ្នាំងបាយ!។មិនអាចសុំការពន្យល់ពីលោកស្វាយសំអ៊ាងដែលមានអំណាចពេញអាណាចក្រខេត្តមណ្ឌលគីរីរឿងបនល្បែងថៅកែតែ សេងអូននិងលោកឈុនសំអឿនធ្វើខុសច្បាប់នោះបាននៅឡើយទេ៕
