បារាំង ៖ អង្គការឃ្លាំមើលការលាងលុយកខ្វក់អន្តរជាតិអាចនឹងដាក់កម្ពុជា ចូលទៅក្នុងបញ្ជីតាមដាន ការលាងលុយកខ្វក់។ ទីភ្នាក់ងារសារព័ត៌មានRuterបានឲ្យដឹងថា៖។ការដាក់ប្រទេសកម្ពុជាចូលក្នុងបញ្ជីពណ៌ប្រផេះបែបនេះ នឹងត្រូវប្រកាសនៅទីក្រុងប៉ារីសពេលខាងមុខ។
ក្រុមការងារសកម្មភាពហិរញ្ញវត្ថុ ដែលហៅកាត់ថា«FATF» បាននិយាយរឿងនេះនៅក្នុងរបាយការណ៍មួយដែលថាប្រព័ន្ធយុត្តិធម៌នៅកម្ពុជាមាន«អំពើពុករលួយខ្ពស់»។ ប្រទេសកម្ពុជាបានប្រើប្រាស់ការស៊ើបការណ៍សម្ងាត់ហិរញ្ញវត្ថុតិចតួចក្នុងការស៊ើបអង្កេត។
អង្គភាពស៊ើបអង្កេតផ្នែកហិរញ្ញវត្ថុរបស់កម្ពុជាមិនបានត្រួតពិនិត្យមើលកាស៊ីណូនិងវិស័យអចលនទ្រព្យដែលបានរីកចម្រើនយូរអង្វែងដែលត្រូវបានកំណត់អត្តសញ្ញាណដោយអង្គការនានាដូចជាការិយាល័យអង្គការសហប្រជាជាតិប្រឆាំងគ្រឿងញៀននិងឧក្រិដ្ឋកម្មដែលត្រូវបានប៉ះពាល់ដោយការលាងលុយកខ្វក់របស់ក្រុមឧក្រិដ្ឋជននោះឡើយ។ បើតាមរបាយការណ៍នេះ គ្មានករណីលាងលុយកខ្វក់ណាមួយធ្លាប់ត្រូវបានកាត់ទោសនៅកម្ពុជានោះទេ។
បើតាមរ៉យទ័រដែលបានដកស្រង់សម្តីមន្ត្រីជាន់ខ្ពស់កម្ពុជាម្នាក់ដែលសុំមិនបញ្ចេញឈ្មោះ ការដាក់កម្ពុជាក្នុងបញ្ជីឃ្លាំមើលរបស់ FATF អាចនឹងបង្កការលំបាកដល់ក្រុមហ៊ុន ក៏ដូចជាបុគ្គលទូទៅ ក្នុងការប្រើប្រាស់ប្រព័ន្ធហិរញ្ញវត្ថុអន្តរជាតិ។តាមសេចក្តីរាយការណ៍របស់ Propertyarea.asia បានបង្ហាញថា មានកាស៊ីណូកំពុងដំណើរការ និងត្រៀមដំណើរការចំនួន៣០កន្លែងហើយ នៅក្នុងទីក្រុងព្រះសីហនុ ខណៈដែលវត្តមាន ជនជាតិចិន ប្រមាណ៥ពាន់នាក់ កំពុងរស់នៅ ប្រកបកិច្ចការ និងរកស៊ីក្នុងខេត្តនេះ។
ស្នងការនគរបាលខេត្តព្រះសីហនុ ឯ.ឧ. ជួន ណារិនធ្លាប់ បាន អោយកាសែតដឹងថា ចំនួនកាស៊ីណូ កំពុងកើនឡើងជាបន្តបន្ទាប់ក្នុងក្រុងព្រះសីហនុ។ក្រៅពីនេះបើតាមអ្នកអ្នករកគេស៊ីនិយាយថា៖ជនជាតិចិនបាននិងកំពុងសម្រុកចូលមកទិញអចលនៈទ្រព្យក្នុងស្រុកខ្មែរដោយពួកឈ្មួញចិនបានចាយលុយសុទ្ធតែម្តងមិនប្រើធនាគារទេ។
គួររំឭកជូនថា កម្ពុជាត្រូវបានដកចេញពីបញ្ជីពណ៌ប្រផេះរបស់ ក្រុមការងារសកម្មភាពហិរញ្ញវត្ថុ «FATF» កាលពីឆ្នាំ ២០១៥ ដូច្នេះការចុះបញ្ជីថ្មីនៅពេលនេះនឹងបង្ហាញថាវាបានដើរថយក្រោយនៅលើកិច្ចខិតខំប្រឹងប្រែងដើម្បីប្រឆាំងនឹងការលាងលុយកខ្វក់។
សូមបញ្ជាក់ថាបើតាមរបាយការណ៍ World Justice Project បានវាយតម្លៃថា៖ប្រទេសដែលមានចំណាត់ថ្នាក់ទាបជាងគេ ក្នុងប្រព័ន្ធយុត្តិធម៌ពិភពលោក គឺ វេណេហ្សុយអេឡា ដែលទទួលបានចំណាត់ថ្នាក់លេខ ១១៣ និងតាមពីក្រោយដោយប្រទេសកម្ពុជា ដែលស្ថិតនៅលេខរៀងទី ១១២ ខណៈអាហ្វហ្កានីស្ថាន ស្ថិតនៅលេខរៀងទី ១១១។ ចំណែកប្រទេសដែលមានយុត្តិធម៌ពេញលេញ ទទួលបានចំណាត់ថ្នាក់លេខ១ គឺប្រទេសដាណឺម៉ាក។
លោកជិនម៉ាលីន អ្នកនាំពាក្ក្រសួងយុត្តិធម៌ បានអះអាងប្រាប់កាសែតថា កម្ពុជាបានធ្វើការកែទម្រង់ច្រើនហើយលើប្រព័ន្ធយុត្តិធម៌នេះ ត្បិតតែនៅមានការខ្វះចន្លោះខ្លះក៏ដោយ។បើតាមរបាយការណ៍គម្រោងយុត្តិធម៌ពិភពលោក មូលហេតុដែលកម្ពុជានៅមានចំណាត់ថ្នាក់ទាបលើប្រព័ន្ធយុត្តិធម៌ គឺមកពីរដ្ឋាភិបាលនៅតែប្រើឥទ្ធិពលទៅលើប្រព័ន្ធតុលាការ ជាពិសេសរឿងក្តីធំៗទាក់ទងនឹងនយោបាយ។
សូមបញ្ជាក់ថា ក្រុមការងារសកម្មភាពហិរញ្ញវត្ថុ ដែលហៅកាត់ថា «FATF» គឺជាអង្គការអន្តររដ្ឋាភិបាលដែលគាំទ្រការប្រយុទ្ធប្រឆាំងនឹងការលាងលុយកខ្វក់និងការផ្តល់ហិរញ្ញប្បទានភេរវកម្ម។ ប្រទេសកម្ពុជាត្រូវបានចុះក្នុង”របាយការណ៍វាយតម្លៃគ្នាទៅវិញទៅមក” លើគោលនយោបាយរបស់ខ្លួនក្នុងការប្រឆាំងការលាងលុយកខ្វក់និងហិរញ្ញប្បទានភេរវកម្មនេះកាលពីឆ្នាំ២០១៧៕
