ខេត្តរតនៈគិរី៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃនៅល្ងាចថ្ងៃពុធ ទី២០ ខែកុម្ភៈ ឆ្នាំ២០១៩ បាន អញ្ជើញសួរសុខទុក្ខ លោកព្រឹទ្ធាចារ្យ ប៊ូ ថង មន្ត្រីជាន់ខ្ពស់គណបក្សប្រជាជនកម្ពុជានិងបច្ចុប្បន្នជា ទីប្រឹក្សាសម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាកម្ពុជាដែលជាមន្ត្រីជាន់ខ្ពស់គណបក្សប្រជាជានមានអាយុចាស់ជរា។
នៅភូមិគ្រឹះរបស់លោកព្រឹទ្ធាចារ្យ ប៊ូ ថង ដែលស្ថិតនៅភូមិទេសអន្លុង សង្កាត់បឹងកន្សែង ក្រុងបានលុង ខេត្តរតគិរី សម្តេចក្រឡាហោម ស ខេង បានសម្តែងនូវការនឹករលឹកចំពោះលោកព្រឹទ្ធាចារ្យ ប៊ូ ថងសមាជិកអចិន្ត្រៃយ៍គណបក្សប្រជាជនកម្ពុជា ដែលជាឥស្សរជនម្នាក់ ដែលមួយជីវិតរបស់លោកព្រឹទ្ធាចារ្យ បានលះបង់កម្លាំងកាយ កម្លាំងចិត្តក្នុងបុព្វហេតុជាតិមាតុភូមិ។
សម្តេចក្រឡាហោម បានជូនពរលោកព្រឹទ្ធាចារ្យបូថងដែលមានព្រះជន្ម៨៤ឆ្នាំនិងជាបិតាលោកប៊ូសាវុនអភិបាលខេត្តរតនៈគីរី សូមមានសុខភាពល្អ ឆាប់ជាពីជំងឺរោគាព្យាធិទាំងឡាយទាំងពួង និងមានជន្មាយុយឺនយូរ ព្រមទាំងជួបប្រទះតែសេចក្តីសុខសេចក្តីចម្រើនតរៀងទៅ។
-ជីវប្រវត្តិសង្ខេបរបស់លោកព្រឹទ្ធាចារ្យ ប៊ូ ថង៖
លោក ប៊ូ ថង កើតនៅថ្ងៃទី១៥ ខែសីហា ឆ្នាំ១៩៣៨ នៅភូមិការចូន ឃុំការចូន ស្រុកវឺនសៃ ខេត្តរតនគិរី មានកូន ៥នាក់។ លោកបានឆ្លងកាត់ការបណ្តុះបណ្តាលនៅសាលានាយទាហានបំពេញវិជ្ជា ផ្នែកយោធា នៅប្រទេសវៀតណាម ចន្លោះពីឆ្នាំ១៩៥៤-១៩៦១។ នៅឆ្នាំ១៩៦២-១៩៦៥ លោក ប៊ូ ថង ជានាយទាហានជើងគោក ផ្នែកវិស្វកម្ម នៅប្រទេសវៀតណាម។ នៅឆ្នាំ១៩៦៨-១៩៧០ លោក ប៊ូ ថង ក៏បានទទួលការបណ្តុះបណ្តាល នយោបាយទាហានជាន់ខ្ពស់ នៅវិទ្យាស្ថាននយោបាយជាន់ខ្ពស់ ប្រទេសវៀណាម។
ដោយចេះភាសាបរទេស ៣ ភាសា គឺវៀតណាម ឡាវ និងថៃ លោក ប៊ូ ថង បានចូលបម្រើការងារក្នុងក្របខណ្ឌរដ្ឋ ក្នុងប្រទេសកម្ពុជាយើង នៅថ្ងៃទី៣០ ខែមេសា ឆ្នាំ១៩៧០។
នៅចន្លោះថ្ងៃទី៣០ ខែមេសា ឆ្នាំ១៩៧០-១៩៧៤ លោក ប៊ូ ថង ចូលរួមចលនាតស៊ូរំដោះជាតិ នៅតំបន់ភូមិភាគឥសាន។ ក្នុងនោះ នៅឆ្នាំ១៩៧១-១៩៧២ លោក ប៊ូ ថង ជាមេបញ្ជាការយោធា ខេត្តរតនគិរី ហើយនៅឆ្នាំ១៩៧៤ លោក ជាជំនួយការយោធានយោបាយភូមិភាគឥសាន។
នៅថ្ងៃទី១២ ខែមករា ឆ្នាំ១៩៧៤ លោក ប៊ូ ថង បានចូលរួមចលនាប្រឆាំងប៉ុលពត និងភៀសខ្លួន ទៅនៅប្រទេសវៀតណាម។ នៅចន្លោះពីឆ្នាំ១៩៧៥-១៩៧៧ លោក ប៊ូ ថង ជាប្រធានជំរំ យ៉ាបក់ នៅប្រទេសវៀតណាម។
នៅចន្លោះពីឆ្នាំ១៩៧៧-១៩៧៩ លោក ប៊ូ ថង បានចូលរួមចលនាផ្តួលរំលំរបបប៉ុលពត។ ពីឆ្នាំ១៩៧៩-១៩៨២ លោក ប៊ូ ថង ជាប្រធានឃោសនា អប់រំមជ្ឈឹមបក្សប្រជាជនកម្ពុជា។
នៅឆ្នាំ១៩៨២-១៩៨៧ លោក ប៊ូ ថង ជាឧបនាយករដ្ឋមន្ត្រី រដ្ឋមន្ត្រីការពារជាតិ។ ពីឆ្នាំ១៩៨៨-១៩៩០ លោក ប៊ូ ថង ជាឧបនាយករដ្ឋមន្ត្រី អគ្គស្នងការនគរបាលកងទ័ពប្រជាជនកម្ពុជា នៅក្រសួងការពារជាតិកម្ពុជា។
នៅឆ្នាំ១៩៨១-១៩៩៣ លោក ប៊ូ ថង ជាអ្នកតំណាងរាស្ត្រ មណ្ឌលខេត្តព្រះវិហារ ក្នុងសម័យសាធាណរដ្ឋប្រជាមានិតកម្ពុជា និងសម័យរដ្ឋកម្ពុជា។
នៅឆ្នាំ១៩៩៣-២០១២ លោក ប៊ូ ថង ជាអ្នកតំណាងរាស្ត្រ មណ្ឌលខេត្តរតនគិរី។ ចាប់ពីឆ្នាំ២០១២-២០១៨ លោក ប៊ូ ថង ជាសមាជិកព្រឹទ្ធសភា នីតិកាលទី៣ នៅមណ្ឌលភូមិភាគ ទី៨៕
