ភ្នំពេញ ៖ ក្រុមប្រឹក្សាអភិវឌ្ឍន៍កម្ពុជាហៅកាត់ថាស៊ីឌីស៊ីបាននិងកំពុងធ្វើការពិគ្រោះយោបល់ជាមួយវិស័យឯកជនសម្រាប់ការរៀបចំសេចក្តីព្រាងច្បាប់វិនិយោគថ្មីមួយទៀតជំនួសច្បាប់ចាស់ដែលលែងសមស្របនិងការវិឌ្ឍន៍នៃសភាពការណ៍សេដ្ឋកិច្ចសង្គមបច្ចុប្បន្ន។
នៅក្នុងលិខិតចំហរផ្ញើជូនសម្តេចតេជោនាយករដ្ឋមន្ត្រីដែលដាក់ក្នុងហ្វេសប៊ុកផ្ទាល់ខ្លួនលោកឧកញ៉លឹមហេងបញ្ចេញមតិជាំអនុសាសន៍មួយចំនួនដូចខាងក្រោម៖សូមគោរពជូនសម្តេច
ដើម្បីទាក់ទាញអ្នកវិនិយោគ និងកាត់បន្ថយថ្លៃដើម នៃការផលិត ខ្ញុំបាទសូមចូលរួមជាធាតុចូលមួយចំនួន ៖ រដ្ឋគួរតែបង្កើតតំបន់រដ្ឋបាលពិសេស ឬ ក៏តំបន់ស្វយ័តសេដ្ឋកិច្ចពិសេស ចំនួនបីតំបន់ជាបឋម :
ទី 1 ខេត្ត ព្រះសីហនុ កំពត និងកោះកុង។ទី 2 តាមព្រំដែនវៀតណាមមានខេត្តស្វាយរៀង ព្រៃវែង ត្បូងឃ្មុំ។ទី 3 តាមព្រំដែនថៃ បាត់ដំបង បន្ទាយមានជ័យ និងឧត្តរមានជ័យ ចំពោះខេត្តដទៃទៀតគួរតែបង្កើនការអនុម័តទំហំទឹកប្រាក់នៃការវិនិយោគអោយធំជាង2លានដុល្លា ដែលមានអនុគណកម្មការវិនិយោគខេត្តស្រាប់ ហៅថា (CDC ខេត្ត)។
ផលប្រយោជន៍ដែលអាចទទួលបានមានដូចជា :
– អ្នកវិនិយោគទាំងចាស់ទាំងថ្មីទាំងក្នុងស្រុកនិងមកពីបរទេស ងាយស្រួលទទួលបាននូវរាល់សេវាបែបបទរដ្ឋាភិបាលនៅក្បែររោងចក្រសហគ្រាសដែលត្រូវស្នើសុំបង្កើតថ្មី នឹងនាំចេញនាំចូលនូវរាល់ផលិតផលដែលផលិតបាន ។
កាត់បន្ថយថ្លៃដើមតាមរយៈការដឹកជញ្ជូនដែលមានតម្លៃថ្លៃទ្វេដងកន្លងមកដែលរោងចក្រសហគ្រាសមួយចំនួន នាំចូលទំនិញឬវត្ថុធាតុដើមពីកំពុងផែក្រុងព្រះសីហនុ និងតាមបណ្តាមាត់ច្រកព្រំដែនផ្សេងៗមកកាន់រោងចក្រនៅក្នុងនិងជុំវិញ រាជធានីភ្នំពេញ ផលិតរួចដឹកនាំចេញទៅវិញ។
កាត់បន្ថយគ្រោះថ្នាក់ចរាចរណ៍តាមផ្លូវជាតិលេខ4 និងផ្លូវជាតិផ្សេងៗទៀត និងការកកស្ទះចរាចរណ៍ នៅក្នុងនិងជុំវិញរាជធានីភ្នំពេញ- បង្ខិតរោងចក្រសហគ្រាសដល់មូលដ្ឋាន ជួយកាត់បន្ថយនូវពលករចំណាកស្រុក។ ការបន្ថយការបំពុលបរិស្ថាន នៅជុំវិញទីក្រុងនាពេលបច្ចុប្បន្ននិងនាពេលអនាគត និងអត្ថប្រយោជន៍ផ្សេងៗជាច្រើនទៀត។
គួរពុំគួរសូមសម្តេចមេត្តាអធ្យាស្រ័យ ៕
