វៀតណាម ៖ ជំនួបកំពូលរវាងលោកដូណាល់ ត្រាំប្រធានាធិបតីអាមេរិក និងលោកគីម ជុងអ៊ុនប្រមុខរដ្ឋកូរ៉ខាងជើងនៅរដ្ឋធានីហាណូយប្រទេសវៀតណាម នៅសល់ពេល១ សប្តាហ៍ប៉ុណ្ណោះ។
ក្នុងពេលដែលរដ្ឋការអាមេរិកបញ្ជូនកម្លាំងជំនាញការពារសន្តិសុខនិងយន្តហោះដឹករថយន្តឧទ្ធម្ភាគចក្រមកមុនដើម្បីត្រៀមរៀបចំទទួលនិងការពារលោកត្រាំវា មានព័ត៌មានលេចឮថាមេដឹកនាំកូរ៉េខាងជើង នឹងធ្វើដំណើរទៅទីក្រុងហាណូយប្រទេសវៀតណាមតាមរថភ្លើង មិនមែនតាមជើងយន្តហោះនោះទេ។
សារពត៍ព័ត៌មាន Reuters ផ្សាយថា៖មេដឹកនាំកូរ៉េខាងជើង នឹងជិះរថភ្លើងផ្ទាល់ខ្លួន ពីទីក្រុងព្យុងយ៉ាង ទៅកាន់ប្រទេសចិនជាប់នឹងព្រំដែនប្រទេសវៀតណាម និងបន្ទាប់មកផ្លាស់ទៅជិះរថយន្តវិញ ចេញពីចិនទៅកាន់ទីក្រុងហាណូយ។ ក៏ប៉ុន្តែ បើតាមសម្តីប្រភព ទីភ្នាក់ងារព័ត៌មានបារាំង AFP វិញចេញ ពីព្រំដែនប្រទេសចិន ទៅកាន់ទីក្រុងហាណូយលោក គីម ជុងអ៊ុន និងជិះយន្តហោះ មិនមែនជិះរថយន្តនោះទេ។
ទោះជាយ៉ាងណាក្តី គេនៅមិនទាន់ដឹងច្បាស់នៅឡើយទេ ពាក់ព័ន្ធនឹងគម្រោងធ្វើដំណើររបស់លោកគីម ជុងអ៊ុន ។ ប៉ុន្តែ គេគ្រាន់តែដឹងថា មានមន្ត្រីកូរ៉េខាងជើងជាច្រើននាក់ បានទៅត្រួតពិនិត្យតំបន់ព្រំដែន រវាងប្រទេសចិន និងប្រទេសវៀតណាម កាលពីថ្ងៃចន្ទ ទី១៨ កុម្ភៈ ដើមសប្តាហ៍នេះ។ នេះ បើតាមទូរទស្សន៍របស់ជប៉ុន។ប្រសិនបើមកតាមចើងគោក លោកគីម ជុងអ៊ុន អាចត្រូវការពេលវេលាវែងយូរគួរសម យ៉ាងហោចណាស់ក៏ចំនួន ២ ថ្ងៃ កន្លះដែរ ក្នុងរយៈចម្ងាយផ្លូវជិត ៤ ០០០ គីឡូម៉ែត។
សម្រាប់ជំនួបកំពូលលើកទី២ រវាងលោកត្រាំ និងគីម ជុងអ៊ុន នេះដែរ ប្រទេសវៀតណាមកំពុងតែ ដុតដៃដុតជើងរៀបចំកិច្ចប្រជុំនេះ យ៉ាងយកចិត្តទុកដាក់ជាទីបំផុត ជាពិសេសលើផ្នែកការពារសុវត្ថិភាពតែម្តង។
សូមរំឭកជូនថា លោកដូណាល់ ត្រាំ និងគីម ជុងអ៊ុន នឹងជួបចរចាជាមួយគ្នា នៅថ្ងៃទី ២៧-២៨ កុម្ភៈ ខាងមុខនេះ។ បើតាមភ្នាក់ងារពត៌មាន Reuters មេដឹកនាំទាំងពីរ នឹងជួបប្រជុំ នៅក្នុងវិមានរដ្ឋាភិបាលវៀតណាម នាកណ្តាលទីក្រុងហាណូយ ក៏ប៉ុន្តែទីកន្លែងប្រជុំនេះអាចនឹងត្រូវផ្លាស់ប្តូរផងដែរ៕
