ភ្នំពេញ ៖ ប្រសិនបើគេចាំមិនភ្លេចទេ លោក ហួត ហ៊ាង អតីតចៅក្រមសាលាដំបូងខេត្តកណ្តាលត្រូវបាន អង្គភាពប្រឆាំងអំពើពុករលួយ ចាប់ឃាត់ខ្លួននៅក្នុងបន្ទប់ធ្វើការកាលពីថ្ងៃទី២០ ខែមករា ឆ្នាំ២០១២ ក្នុងរឿងស៊ីសំណូកពុករលួយជាក់ស្តែងមានទំហំទឹកប្រាក់ចំនួន៥ ០០០ដុល្លារអាមេរិក ។
កាលនោះ(នៅថ្ងៃទី២៦ ខែកញ្ញា ឆ្នាំ២០១២) លោក ហួត ហ៊ាង រងការផ្តន្ទាទោសដាក់ពន្ធនាគារ១ឆ្នាំ (ផ្តន្ទាទោសកំណត់២ឆ្នាំ ដោយដាក់ពន្ធនាគារ១ឆ្នាំ និងព្យួរទោស១ឆ្នាំ)។សំណុំរឿងក្តីពុករលួយរបស់លោកចៅក្រម ហួត ហ៊ាង ក៏បានទៅដល់សាលាឧទ្ធរណ៍សម្រេចផ្តន្ទាទោសតាមអំណាចសាលដីកាព្រហ្មទណ្ឌលេខ០៨ក្រIVត ចុះថ្ងៃទី១៨ ខែមករា ឆ្នាំ២០១៣ ។
តែអ្វីដែលជាការកោតសសើរនិងហួសចិត្តនោះក្រោមការចាត់ចែងរបស់ឧត្តមក្រុមប្រឹក្សានៃអង្គចៅក្រមដែលមានលោកអង្គវង្សវឌ្ឍនាជារដ្ឋមន្ត្រីក្រសួងយុត្តិធម៍ជាអគ្គលេខាតាមរយៈនាយករដ្ឋមន្ត្រីលោក ហួត ហ៊ាងមនុស្សដែលប្រើតួនាទីជាចៅក្រមប្រព្រឹត្តអំពើពុករលួយ កាលពីថ្ងៃទី១៧ ខែធ្នូ ឆ្នាំ២០១៨ ត្រូវបាន. ព្រះមហាក្សត្រ ទ្រង់ត្រាស់បង្គាប់លើកលែងទោសទាំងស្រុងតាមព្រះរាជក្រឹត្យលេខនស/រកត/១២១៨/១៤០០ ចុះថ្ងៃទី១៧ ខែធ្នូ ឆ្នាំ២០១៨ ហើយអនុញ្ញាតឲ្យបន្តមុខងារជាចៅក្រមនៅក្នុងក្របខ័ណ្ឌចៅក្រមវិញអាដែល។
ព្រះរាជក្រឹត្យ បង្គាប់អនុញ្ញាតឲ្យ លោកហួត ហ៊ាង បន្តមុខងារជាចៅក្រមនៅក្នុងក្របខ័ណ្ឌនៃអង្គចៅក្រមវិញតាមសេចក្តីក្រាបបង្គំទូលថ្វាយរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយព្រះរាជក្រឹត្យលេខនស/រកត/១២១៨/១៤០០ ចុះថ្ងៃទី១៧ ខែធ្នូ ឆ្នាំ២០១៨ ។ករណីមួយនេះ គេសសើថា លោក ហួត ហ៊ាងពិជាខ្លាំងមែនមករកកន្លែងប្រព្រឹត្តពុករលួយវិញបាន។
ផ្ទុយទៅវិញ លោកចៅក្រម អាំង មាលតី អតីតប្រធានសាលាដំបូងរាជធានីភ្នំពេញពាក់ព័ន្ធការប្រព្រឹត្តអំពើពុករលួយ ត្រូវបានលុបឈ្មោះចេញពីក្របខ័ណ្ឌអង្គចៅក្រមដោយព្រះរាជក្រឹត្យលេខនស/រកត/០២១៧/១៦០ ចុះថ្ងៃទី០៩ ខែកុម្ភៈ ឆ្នាំ២០១៧ និងលោក តុប ច័ន្ទសិរីវុធ អតីតព្រះរាជអាជ្ញានៃអយ្យការអមសាលាដំបូងខេត្តពោធិ៍សាត់ ពាក់ព័ន្ធការប្រព្រឹត្តអំពើពុករលួយ ត្រូវលុបឈ្មោះចេញពីក្របខ័ណ្ឌ ដោយព្រះរាជក្រឹត្យលេខនស/រកត/០១១៥/០៨៩ ចុះថ្ងៃទី២២ ខែមករា ឆ្នាំ២០១៥មិនមានវាសនាដូចលោកហួតហ៊ាងឡើយ។
សូមបញ្ជាក់ថា៖ចៅក្រមសាលាដំបូងខេត្តកណ្តាលចំនួន ២ នាក់ គឺលោកចៅក្រម ហួត ហ៊ាង និងចៅក្រមម្នាក់ទៀត លោកស្រី ខូវ ច័ន្ទផូ ដែលត្រូវបានឃាត់ខ្លួន កាលពីល្ងាចថ្ងៃទី២០ ខែមករា ឆ្នាំ២០១២នោះ តាមភស្ដុតាងដែលអង្គភាពប្រឆាំងអំពើពុករលួយមាន អាចធ្វើការចោទប្រកាន់ពីបទស៊ីសំណូក។ ចៅក្រមទាំងពីរ ត្រូវបានបញ្ជូនទៅកាន់តុលាការខេត្តកណ្តាល នៅថ្ងៃអាទិត្យ ទី២២មករា ឆ្នាំ២០១២។
ក្នុងសំណុំរឿងពុករលួយ ទារប្រាក់ ៥.០០០ ដុល្លារ កាលពីខែមករា ដើមឆ្នាំ២០១២នេះ ក្រឡាបញ្ជីរបស់ចៅក្រមម្នាក់ ឈ្មោះ លោក លឹម កុម្ភៈ ក៏បានជាប់ចោទពីបទស៊ីសំណូក ហើយត្រូវបានតុលាការសម្រេចផ្តន្ទាទោស ដាក់ពន្ធនាគារ ២ឆ្នាំ ផងដែរ ។ ប៉ុន្តែលោកស្រីខូវ ច័ន្ទផូបានរួចខ្លួនវិញ។
