ក្រចេះ ៖ ពិធីបុណ្យមាឃបូជា គឺជាពិធីបុណ្យសាសនាដ៏ធំមួយនៅក្នុងព្រះពុទ្ធសាសនា ដែលជាសាសនារបស់រដ្ឋនៅក្នុងព្រះរាជាណាចក្រកម្ពុជា ។ ដែលប្រជាជនខ្មែរយើងភាគ ច្រើនសុទ្ធតែបានប្រារព្ធពិធីនេះជារៀងរាល់ឆ្នាំមិនដែលអាក់ខាននោះឡើយ។
នារសៀលថ្ងៃទី១៩ ខែកុម្ភៈ ឆ្នាំ២០១៩ ត្រូវនឹងថ្ងៃអង្គារ ១៥កើត ខែមាឃ ពេញបូរមី ជាថ្ងៃបុណ្យមាឃបូជា ព្រះសង្ឃ រួមជាមួយថ្នាក់ដឹកនាំ អាជ្ញាធរគ្រប់លំដាប់ថ្នាក់ ពុទ្ធបរិស័ទ ប្រជាពលរដ្ឋ និងយុវជនគ្រប់ស្រទាបវណ្ណៈ បានជួបជុំគ្នាប្រារព្ធពិធីឡើងយ៉ាងឱឡាឬក ដោយបានដង្ហែរព្រះបដិមាករចេញពិសាលាស្រុកស្នួល ឆ្ពោះទៅកាន់វត្ត សទ្ធារង្សីខន្តីយារាម ហៅ (វត្តផ្សារស្នួល) ស្ថិតក្នុងឃុំស្នួល ស្រុកស្នួល ក៏ដូចជានៅទូទាំង ខេត្តក្រចេះផងដែរ។
ក្រោមគណៈអធិបតីភាពព្រះតេជគុណ ព្រះគ្រូ ជន ស៊ីអ៊ីម ព្រះមេគុណខេត្ត លោក គង់ គឹមនី អភិបាលស្រុកស្នួល និងលោក សុំ ជួន ប្រធានក្រុមប្រឹក្សាស្រុក ព្រមទាំងពុទ្ធបរិស័ទ និងប្រជាពលរដ្ឋ យុវជន យុវនារីយ៉ាងច្រើនកុះករ ។
លោក គង់ គឹមនី អភិបាលស្រុកស្នួល បានលើកឡើងថា បានមានប្រសាសន៍ លើកឡើងថា ៖ ការជួបជុំគ្នាក្នុងពេលនេះ ប្រកបដោយទឹកមុខសប្បាយរីករាយ គឺបានមក ពីកត្តាប្រទេសជាតិយើងមានសុខសន្តិភាព បើសិនជាប្រទេសជាតិយើងមិនមានសុខ សន្តិភាពទេ យើងក៏មិនមានឱកាសបានជួបជុំគ្នាធ្វើបុណ្យទានជាមួយគ្នាដូចពេលនេះដែរ ។ កន្លងទៅ ដូចជា របបប៉ុលពត ដែលពុកម៉ែបងប្អូនរបស់យើងទាំងអស់គ្នា បានឆ្លងកាត់យ៉ាង វេទ្ទនានោះ តើយើងមានឱកាសបានជួបជុំគ្នាអញ្ចឹងដែរទេ? ដូច្នេះហើយសូមពុកម៉ែបងប្អូន ជាអាណាព្យបាល ត្រូវពន្យល់នែនាំដល់កូនចៅ ជាយុវជនជំនាន់ក្រោយ ត្រូវយល់ដឹងពី ដំណើរនៃការទទួលបានសុខសន្តិភាព ស្ថេរភាព និងសិទ្ធិសេរីភាព របស់ប្រទេសកម្ពុជា និងបន្តចូលរួមថែរក្សាការពារ និងផ្សព្វផ្សាយដល់ពិភពលោកឲ្យបានដឹងពីវប្បធម៌ និងអរិយ៍ធម៌ចំណាស់ដ៏ទន់ភ្លន់ និងរឹងមាំរបស់ដូនតាយើង ក៏ដូចជាការអភិវឌ្ឍន៍រីកចម្រើន របស់ប្រទេសសព្វថ្ងៃផងដែរ ។
គួរំលឹកថា ការប្រារព្ធពិធីបុណ្យមាឃបូជា គឺដើម្បីរម្លឹកនូវព្រឹត្តិការណ៏សំខាន់ ៣យ៉ាង ដែលរួមមាន ទី១ ការធ្វើចតុរង្គសន្និបាត និងទី២ ព្រះពុទ្ធ សម្តែងឱវាទបាតិមោក្ខដល់ភិក្ខុ ហើយទី៣ ព្រះពុទ្ធ ដាក់អាយុសង្ខារ។
ចតុរង្គសន្និបាត មានន័យថា ជាការជួបជុំគ្នារបស់សាវ័ក ព្រះពុទ្ធ នៅក្នុងថ្ងៃមួយ ហើយប្រកបដោយអង្គឬហេតុ៤យ៉ាង។ អង្គឬហេតុទាំង៤ ដែលកើតឡើងក្នុងថ្ងៃជួបជុំនោះ គឺទី១ ជាថ្ងៃឧបោសថ ដែលមានព្រះចន្ទពេញវង់ល្អ ទី២ ជាថ្ងៃ ដែលព្រះភិក្ខុទាំង១២៥០អង្គ មកជួបជុំគ្នាក្នុងសំណាក់ព្រះសម្មាសម្ពុទ្ធ ដោយមិនមានការណាត់ជាមុន ទី៣ ព្រះភិក្ខុទាំង អស់នោះ សុទ្ធសឹងតែជាព្រះអរហន្ត និងទី៤ ព្រះភិក្ខុទាំងអស់នោះ សុទ្ធសឹងតែជាឯហិភិក្ខុ។
ហើយពិធីបុណ្យមាឃបូជានេះ ជាពិធីបុណ្យសាសនាមួយដ៏មានសារៈសំខាន់ណាស់ នៅក្នុងពុទ្ធិសាសនា ប្រហាក់ប្រហែលនឹងបុណ្យពុទ្ធសាសនាដទៃទៀតដែរ រួមមាន៖ ពិសាខបូជា, អាសាឍបូជា និងបុណ្យបវារណា (ចេញវស្សា)ជាដើម ។ បុណ្យមាឃបូជានេះ ត្រូវបានរាជរដ្ឋាភិបាលកម្ពុជា កំណត់ចូលជាបុណ្យជាតិរបស់កម្ពុជាផងដែរ ដោយនៅថ្ងៃ ប្រារព្ធបុណ្យនេះ រាជរដ្ឋាភិបាលបានអនុញ្ញាតឲ្យមន្ត្រីរាជការ សិស្សានុសិស្ស រួមទាំងវិស័យ ឯកជន ឈប់សម្រាកមួយថ្ងៃផងដែរ ៕
ដោយ កិះខន
