ភ្នំពេញ ៖ ស្ថានទូតអាមេរិកប្រចាំកម្ពុជា ប្រកាសថា “លោកកឹម សុខា អតីតប្រធាននៃអតីតគណបក្សសង្គ្រោះជាតិ ជាមនុស្សស្អាតស្អំ ដែលត្រូវបានឃុំខ្លួនដោយអយុត្តិធម៌។ ហ្វេសប៊ុកផ្លូវការស្ថានទូតអាមេរិកប្រចាំកម្ពុជាបាន សរសេរបែបនេះនៅល្ងាចថ្ងៃទី១៥ ខែកុម្ភៈ ។ “តើអ្នកមានដឹងទេថា លោក កឹម សុខា បានជាប់ក្នុងការឃុំឃាំងជិត ១៨ខែមកហើយ? វាមានរយៈពេល ៥៣០ ថ្ងៃនៃការជាប់ឃុំ”។
ទូតអាមេរិកបញ្ជាក់ថា”គាត់ជាមនុស្សស្អាតស្អំ ដែលត្រូវបានឃុំខ្លួនដោយអយុត្តិធម៌ ក្រោមការចោទប្រកាន់មិនពិត។ មិនមានភស្តុតាងណាមួយប្រឆាំងនឹងគាត់ឡើយ ហើយក៏មិនទាន់ការកំណត់បើកសវនាការកាត់ទោសគាត់ដែរ។ គ្មានភស្តុតាង គ្មានសវនាការកាត់ទោសគ្មានយុត្តិធម៌”។
សូមបញ្ជាក់ថាលោកកឹមសុខាប្រធានគណបក្សសង្គ្រោះជាតិត្រូវបានសមត្តកិច្ចចាប់ខ្លួនទាំងកណ្តាលអាធ្រាតពីគេហដ្ឋានដឹកយកទៅដាក់គុកត្រពាំងផ្លុងទាំងយប់កាលពីថ្ងៃ៣ខែកញ្ញាឆ្នាំ២០១៧(បច្ចុប្បន្នឃុំនៅក្នុងផ្ទះ)។បន្ទាប់មកនៅថ្ងៃទី១៦វិច្ឆិកាឆ្នាំ២០១៧តុលាការកំពូលបានចេញសាលក្រមរំលាយគណបក្សសង្គ្រោះជាតិដែលធ្វើឲ្យសមាជិកក្រុមប្រឹក្សាឃុំសង្កាត់ជាង៥០០០ពាន់នាក់បាត់បងតួនាទីនិងព្យួរសិទ្ធធ្វើនយោបាយមន្ត្រីជាន់ខ្ពស់គណបក្សនេះចំនួន១១៨នាក់(បច្ចុប្បន្នសល់១១៦នាក់ដោយសារលោកគង់គាំនិងកូនប្រុស់ឈ្មោះគង់បូរ៉ាបានស្នើសុំលើកទោសវិញតាមមាត្រា៤៥ថ្មីច្បាប់ស្តីពីគណបក្សនយោបាយដែលត្រូវបានវិសោធនកម្មបើកសិទ្ធឲ្យនាយករដ្ឋមន្ត្រីមានសិទ្ធស្នើសុំមហាក្សត្រលើកទោស)។
រដ្ឋអាជ្ញាអមតុលាការរាជធានីភ្នំពេញបានចោទប្រកាន់លោកកឹមសុខាពីបទសន្និធិភាពជាមួយបរទេសតាមមាត្រា៤៤៣នៃក្រមព្រហ្មទណ្ឌ័ដែលអាចជាប់គុកពី១៥ទៅ៣០ឆ្នាំ។សំណំរឿងលោកកឹមសុខាកំពុងស្ថិតនៅក្នុងដៃលោកគីឬទ្ធីចៅក្រមស៊ើបសួរដែលមកដល់ពេលនេះមិនទាន់សម្រេចចោទប្រកាន់លោកកឹមសុខាយ៉ាងណានោះទេ។
សូមបញ្ជាក់ថាការចាប់ខ្លួនលោកកឹមសុខាគឺយោងតាមឃ្លិបវិដេអូដែលលោកកឹមសុខាថ្លែងនៅប្រទេសអូស្ត្រាលីកាលពីឆ្នាំ២០១៣មានខ្លឹមសារ ថា៖«តាំងពីឆ្នាំ ១៩៩៣ ដែលខ្ញុំជាប់ជាតំណាងរាស្ត្រដំបូង អាមេរិកាំង រដ្ឋាភិបាលអាមេរិក គឺគេហៅខ្ញុំទៅស្រុកអាមេរិកមុនគេបង្អស់ក្នុងនាមអ្នកនយោបាយខ្មែរក្នុងប្រទេស ដើម្បីឱ្យ យល់ពីដំណើរការប្រជាធិបតេយ្យ។
គេហៅខ្ញុំមួយឆ្នាំម្តងៗ អោយខ្ញុំទៅអាមេរីម្តងតាំងពីឆ្នាំ ១៩៩៣ រហូតចុងក្រោយនេះ ក៏គេបានសម្រេចថាដើម្បីឱ្យកម្ពុជាមានការផ្លាស់ប្តូរនោះ គេត្រូវឱ្យខ្ញុំដកខ្លួនចេញពីនយោបាយមួយដំណាក់សិន ខ្ញុំក៏បានលាឈប់ពីនយោបាយ ពីគណបក្សនយោបាយដែលខ្ញុំធ្លាប់នៅនោះនៅឆ្នាំ ២០០២ ដើម្បីបង្កើតអង្គការមួយឈ្មោះថា មជ្ឈមណ្ឌលសិទ្ធិមនុស្សកម្ពុជា។ តើគេឱ្យបង្កើតដើម្បីអី?។
គេថាបើចង់ប្តូរថ្នាក់ ដឹកនាំ យើងមិនអាចទៅជល់ខាងលើបានទេ មុននឹងប្តូរខាងលើបាន ទាល់តែគាស់អាក្រោមសិន ទាល់តែប្តូរពីក្រោមទៅមុន ជាយុទ្ធសាស្ត្រ របស់ប្រទេសប្រជាធិបតេយ្យគេធ្វើ។ ហើយសហរដ្ឋអាមេរិកដែលគេជួយខ្ញុំនេះ គេឱ្យខ្ញុំយក ម៉ូឌែលតាមប្រទេសយូហ្គោស្លាវី នៅស៊ែប៊ី ដែលគេប្តូរមេដឹកនាំផ្តាច់ការ មីឡូសូវិចបាននោះ មីឡូសូវិច រថក្រោះសម្បើមណាស់បងប្អូន ប៉ុន្តែគេប្តូរបាន ដោយសារតែគេធ្វើយុទ្ធសាស្ត្រ ហ្នឹង ហើយគេយកបទពិសោធន៍ ហ្នឹងមកឱ្យខ្ញុំធ្វើនៅស្រុកខ្មែរ តែអត់មាននរណាដឹងទេ។
ប៉ុន្តែយុទ្ធសាស្ត្រនេះដោយសារតែ ថ្ងៃនេះ យើងបានឈានដល់មួយដំណាក់កាលហើយ ខ្ញុំត្រូវតែប្រាប់បងប្អូនឱ្យបានដឹង ហើយនៅបន្តទៀត ជោគជ័យយើងទទួលបាន ខ្ញុំអត់មានបានធ្វើតាមខ្ញុំនឹកឃើញទេ គឺមានអ្នកជំនាញការ សាស្ត្រាចារ្យនៅ សាកលវិទ្យាល័យទីក្រុងវ៉ាស៊ីនតោន និងទីក្រុងម៉ុងរ៉េអាល់ ប្រទេសកាណាដាដែលអាមេរិកាំងគេជួលមក ដើម្បីធ្វើការផ្តល់មតិឱ្យខ្ញុំរបៀបជាយុទ្ធសាស្ត្រក្នុងការផ្លាស់ប្តូរមេដឹកនាំ ហើយបើខ្ញុំធ្វើតាមក្បួនប៉ុណ្ណឹង ហើយ ហើយយុទ្ធសាស្ត្រប៉ុណ្ណឹងហើយ បើមិនជោគជ័យទៀត ខ្ញុំមិនដឹងថាយ៉ាងម៉េចទៀតទេ»។
ក្រៅពីប្រកាសថាលោកកឹមសុខាជាមនុស្សស្អាតស្អំត្រូវឃុំខ្លួនដោយអយុត្តិធមិកាលពីថ្ងៃទី១២កុម្ភៈថ្មីៗនេះ ទូតអាមេរិក ក៏ប្រកាសគាំទ្រចំណាត់ការសហភាពអឺរ៉ុបព្យួរ ប្រពន្ធ័អនុគ្រោះពន្ធ័( EBA )ពីកម្ពុជាផងដែរ ៕