ខេត្តរតនៈគីរី៖ រូបភាពដែលកើតឡើងចំពោះករណីជួញដូរ និងដឹកឈើចេញទៅលក់នៅក្រៅប្រទេស នៅតែបន្តកើតមានជាហូរហែ ក្នុងទឹកដីនៃខេត្តរតនៈគីរី បើទោះជាសម្ដេចអគ្គមហាសេនាបតិតេជោ ហ៊ុន សែន នាយករដ្ឋមន្ត្រី ខិតខំប្រឹងប្រែងយកចិត្តទុកដាក់រិះរកគ្រប់វធានការណ៍ក្នុងការបង្ក្រាប ក៏ដូចជាទប់ស្កាត់នុវរាល់សកម្មភាពកាប់បំផ្លាញព្រៃឈើ និងជួញដូរឈើយ៉ាងអាណាធិបតេយ្យពីសំណាក់ឈ្មួញខិលខូច រហូតដល់មានការបង្កើតគណៈកម្មការជាតិទប់ស្កាត់ និងបង្ក្រាបរាល់បទល្មើសព្រៃឈើ ដោយមានឯកឧត្តម នាយឧត្តមសេនីយ៍ឯក ផ្កាយមាសបួន សៅ សុខា មេបញ្ជាការកងរាជអាវុធហត្ថលើផ្ទៃប្រទេស ជាប្រធាន និងអនុវត្តដោយផ្ទាល់ នៅតែទប់ស្កាត់ និងបង្ក្រាបមិនបាន។
ជាក់ស្ដែងនៅខេត្តរតនៈគីរី ប្រជាពលរដ្ឋដែលរស់នៅតំបន់នេះបានលើកឡើងថា ទោះបីលោក នាយឧត្តមសេនីយ៍ សៅ សុខា ឧស្សាជិះឧត្ថម្ភាចក្រ ចុះមកត្រួតពិនិត្យសកម្មភាពដឹក ជញ្ជូនលើប្រណិតចេញទៅលក់នៅប្រទេសវៀតណាជាញឹកញ៉ាប់យ៉ាងណាក្ដី ក៏ឈ្មួញដែលធ្លាប់រកស៊ីមុខរបរហ្នឹង ដូចជាលោក ឧកញ៉ា ផាន ដែលមានប្រពន្ធឈ្មោះ ចែ ច្រឹប នៅតែបន្តដឹកជញ្ជូនឈើប្រណិតទៅលក់នៅវៀតណាមយ៉ាងគឃ្លើន។
ដោយថ្មីៗនេះ គឺបានដឹកឈើចេញពីភូមិបាំង ឃុំប៉ុង ស្រុកវើនស៉ៃ ខេត្តរតនៈគីរី ទៅច្រកអន្តរជាតិអូរយ៉ាដាវ តាមរថយន្តសេរីទំនើបៗ ដូចជាLexus RX 330 , RX 300 ជាដើមដោយពុំឃើញមានមន្ត្រីសមត្តកិច្ចពាក់ព័ន្ធណាចេញមកធ្វើអន្តរាគមនឡើយ។ ទង្វើទាំងនេះ ធ្វើឲ្យប្រជាពលរដ្ឋនៅតំបន់នោះ បានដាក់ការសង្ស័យថាមន្ត្រីមានសមត្តកិច្ចទាំងនោះច្បាស់ជាមានសើមមាត់សើមក ពីលោក ផាន និងអ្នកស្រីច្រឹប ជាក់ជាមិនខាន បានជាស្ងាត់មិនឃើញចុះអន្តរាគម និងបង្ក្រាបលើករណីនេះសោះ។
ជុំវិញព័ត៌មានខាងលើ សារពត៌មានយើងមិនអាចទំនាក់ទំនងសុំការបំភ្លឺពីលោក ផាន ក៏ដូចជាមន្ត្រីពាក់ពន្ធបានទេនៅរសៀលថ្ងៃ២០ ខែកក្ដដានេះ ៕
