វៀតណាម ៖ យន្តហោះ ក្រុមហ៊ុនអាកាសចរណ៍វៀតណាម នឹងអាចហោះហើរត្រង់ទៅកាន់សហរដ្ឋអាមេរិកនៅពេលឆាប់ៗខាងមុខនេះបន្ទាប់ពី រដ្ឋបាលអាកាសចរណ៍សហព័ន្ធសហរដ្ឋអាមេរិក បានប្រកាសថា ប្រទេសអាស៊ីអាគ្នេយ៍មួយនេះ បានអនុលោមតាមស្តង់ដាសុវត្ថិភាពអន្តរជាតិ។
នៅក្នុងសេចក្តីថ្លែងការណ៍កាលពីថ្ងៃព្រហស្បតិ៍ទីភ្នាក់ងារសុវត្ថិភាពអាកាសចរណ៍សហរដ្ឋអាមេរិក បាននិយាយថា ខ្លួនបានផ្តល់ជូនវៀតណាមនូវអត្រា “ថ្នាក់ទី១” រយៈពេល២សប្តាហ៍ ក្រោយទីភ្នាក់ងារព័ត៌មានរ៉យទ័រ បានរាយការណ៍ថា ការសម្រេចចិត្តមួយសម្រាប់ការហោះហើរត្រង់វៀតណាមអាមេរិក ត្រូវបានគេរំពឹងទុកថានឹងកើតមានឡើង។
ទីភ្នាក់ងារព័ត៌មានរ៉យទ័របានឲ្យដឹងថា៖លោក ង្វៀន ង៉ុក ដុង អនុរដ្ឋមន្ត្រីក្រសួងដឹកជញ្ជូនវៀតណាម បាននិយាយអអះអាងថាវាគឺការទទួលស្គាល់មួយ ដោយក្រុមអាជ្ញាធរអាកាសចរណ៍ដែលទាមទារឲ្យមានស្តង់ដាខ្ពស់នៃសុវត្ថិភាព និងសន្តិសុខ។
សូមបញ្ជាក់ថា ក្រុមហ៊ុនអាកាសចរណ៍ Vietnam Airlines JSC, Bamboo Airways និង VietJet Aviation JSC សុទ្ធតែមានបំណងចង់ហោះហើរត្រង់ទៅកាន់សហរដ្ឋអាមេរិកដូចៗគ្នា។បច្ចុប្បន្ន គ្មានការហោះហើរត្រង់នៅឡើយទេរវាងវៀតណាម និងសហរដ្ឋអាមេរិក ។
