ភ្នំពេញ ៖ នាព្រឹកថ្ងៃទី១៣ ខែកុម្ភៈ ឆ្នាំ២០១៩ វេលាម៉ោង៨ព្រឹកនេះ ក្រសួងមហាផ្ទៃ បានបើកសន្និបាតត្រួតពិនិត្យលទ្ធផលការងារឆ្នាំ២០១៨ និងលើកទិសដៅការងារឆ្នាំ២០១៩ ដោយមានការអញ្ជើញចូលរួមពីថ្នាក់ដឹកនាំក្រសួងមហាផ្ទៃ និងអភិបាលរាជធានី-ខេត្ត ទូទាំងប្រទេស។
ក្នុងនោះចំណុចដែលគួរកត់សម្គាល់សម្តេចក្រឡាហោម ស ខេង បានមានប្រសាសន៍ផ្តល់ជាអនុសាសន៍សំខាន់ៗនិងរស៊ើបៗជាច្រើនសម្រាប់ក្រសួងនិងអាជ្ញាធរថ្នាក់ក្រោមជាតិអនុវត្តន៍៖
-ក្រសួងមហាផ្ទៃ នឹងបង្កើនថវិកាដល់ឃុំសង្កាត់ដើម្បីធ្វើការអភិវឌ្ឍន៍ដោយផ្ទាល់ ។ នៅឆ្នាំ២០២០ នឹងទទួលបាន៧៣០០០ដុល្លាអាមេរិក និងបន្តកើនឡើងជាបន្តបន្ទាប់ទៀត។-អត្តសញ្ញាណប័ណ្ណប្រជាចន បានធ្វើអោយពលរដ្ឋបានចំនួន១០លាន៩សែនហើយ។
-ការប្រើប្រាស់កម្លាំងក្នុងការដោះស្រាយបញ្ហានៅមូលដ្ឋាន(ដូចជាបញ្ហាដីធ្លី) មិនអាចយកកម្លាំងទាហានទៅអនុវត្តន៍ច្បាប់បានឡើយ។
-គ្រប់ខេត្តក្រុង ពេលដោះស្រាយរាល់បញ្ហា ត្រូវយកច្បាប់ជាធំមកដោះស្រាយ មិនមែនអ្នកប្រព្រឹត្តខុសទៅប្រើហឹង្សាបាញ់បោះនោះឡើយ។
-សម្រាប់ក្រសួងមហាផ្ទៃនគរបាលជាតិនិងអាជ្ញាធរថ្នាក់ក្រោមជាតិ (យើង)ត្រូវបន្តផ្តល់សេវាសាធារណ:ជូនពលរដ្ឋ។ យើជាអាជ្ញាធររដ្ឋ ត្រូវបម្រេីពលរដ្ឋទូទៅ មិនមែនបម្រើតែក្រុមណាមួយឡើយ។
-ប្រធាននាយកដ្ឋាន ឬមន្ត្រីផ្សេងៗត្រូវដឹងពីតួនាទីខ្លួន ហើយត្រូវជាមន្ត្រីមុខងារសាធារណៈអោយច្បាស់និងមានជំនាញ។
-អ្វីដែលសារព័ត៍មានផ្សាយប៉ះពាល់អង្គភាពខ្លួនតាំងពីរឿងតូចរហូតដល់រឿងធំ ត្រូវតែបកស្រាយអោយបានលឿន។ -ការដកមន្ត្រី ឬអភិបាលខេត្ត ត្រូវឈរលើហេតុផលអោយជាក់លាក់ ។
-ស្នងការដ្ឋាននគរបាលរាជធានីភ្នំពេញ បានបង្ក្រាបចោរប្លន់បានលឿន ហើយមន្ត្រីនគរបាលមូលដ្ឋានរបស់ខ្លួន ត្រូវយកចិត្តទុកដាក់ខ្ពស់បន្តទៀតលើការសន្តិសុខ។
ក្រៅពីនេះទាក់ទងរឿងបង្ក្រាបគ្រឿងញៀនសម្តេចក្រឡាហោម ស ខេង បានឲ្យដឹងថា មួយរយៈពេលកន្លងមកនេះសមត្ថកិច្ចបានបង្ក្រាបគ្រឿងញៀន បានជាងកន្លះតោន។
សម្តេចបញ្ជាក់ថា៖ ចុះបើយើងចាប់មិនបានចំនួននេះ នឹងចូលសម័យឈាមប្រជាពលរដ្ឋប៉ុន្មាន? យើងនិយាយអីញ្ចឹងចុះ តែវាអាចថាក្នុងចំនួននឹង( គ្រឿងញៀន )ចរាចនៅប្រទេសទី៣ ឬទី៤ ថែមទៀត ក៏ប៉ុន្តែយើងបង្ក្រាបបាន តែសួរថាអស់ទេ គឺមិនទាន់អស់ទេ នៅទៀត ប៉ុន្តែវាបង្ហាញស្នាដៃថាមន្ត្រីយើងធ្វើបាន »។
សម្តេច ស ខេង បានបន្ថែមថា ចំពោះលទ្ធផលដែលបង្ក្រាបបានគ្រឿងញៀននោះគឺជាមូលដ្ឋានដើម្បីឈានដល់ការបោសសំអាតបន្តទៀត ដោយមិនទុកឲ្យរីកបន្តទៀត នោះវានឹងរីករាលដាលកាន់តែធំហើយ។ ប្រសិនបើទុកឲ្យរីករាលដាលហើយ ចាប់ផ្តើមបង្ក្រាបនោះនឹងមានការប៉ះទង្គិចគ្នា រហូតដល់បង្ហូឈាមដូចនៅប្រទេសមួយចំនួនដែលយើងដឹងគ្រប់គ្នា ។ តែកម្ពុជាមិនចង់ឃើញសកម្មភាពបែបនោះទេ ។
ពាក់ព័ន្ធនឹងការបង្ក្រាបគឿងញៀននេះដែរ សម្តេច ស ខេង ក៏បានលើកឡើងថា នៅពេលសមត្ថកិច្ចចុះបង្ក្រាបម្តង ជនល្មើសក៏មានអាវុធ ការពារខ្លួនហើយសមត្ថកិច្ចទៅបង្ក្រាប ក៏ត្រូវតែមានអាវុធការពារខ្លួនដែរ(ច្បាប់)ប៉ុន្តែរហូតមកដល់ពេលនេះយើងមិនទាន់មានករណីរំលោភសិទ្ធិមនុស្សពាក់ព័ន្ធនឹងការបង្ក្រាបគ្រឿងញៀននោះទេ ។
សម្តេចបានបញ្ជាក់ថា៖« នេះជាចំណុចល្អ ខ្ញុំសុំកោតសសើរចំពោះសមត្ថកិច្ច របស់យើងដែលចូលរួមអនុវត្តបញ្ហានេះ។ យើងក៏បានគិតពីរឿការស្តារនីតសម្បទាហើយឃើញបណ្តាខេត្តមួយចំនួនកំពុងយកចិត្តទុកដាក់ ហើយថ្នាក់ជាតិកំពុងដំណើរការហើយ សង្ឃឹមថាឆ្នាំ២០១៩នេះបង្ហើយនូវមជ្ឈមណ្ឌលស្តារនីតិសម្បទានៅ ក្នុងខេត្តព្រះសីហនុ»។
សូមបញ្ចាក់ថាអង្គសន្និបាត បានប្រារព្ធឡើងនៅទីស្តីការក្រសួងមហាផ្ទៃ ដោយពិធីបើកសន្និបាត ធ្វើឡើងក្រោមអធិបតីភាពដ៏ខ្ពង់ខ្ពស់របស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។ រីឯពិធីបិទសន្និបាត នឹងប្រារព្ធឡើងនៅរសៀលថ្ងៃទី១៤ ខែកុម្ភៈ ឆ្នាំ២០១៩ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន៕
